第二天：犬山市→名古屋駅

2016年12月24日

今日可以好悠閒咁認識一吓名古屋，

一個人之旅，因為唔需要對團友負責，

所以無行程嘅狀況下好容易會變得懶散，Hea Hea吓就半日架嘞！

我唔想咁，所以今日都訂個目標俾自己，

決定上午起碼要去犬山市行吓，下午就......到時再決定啦！

朝早補張酒店相先，呢間酒店喺常滑站附近，

5分鐘腳程，其實唔算遠，不過尋晚自己一個夜晚10點幾到，

咁啱未搞掂張上網咭無法搵google大神，一個女子都幾恐怖吓，

而家日頭睇番，原來都好真係近啫。

就係佢喇，雖然我後來搵到更好嘅選擇，但我仍然鐘意呢道。

點解鐘意？首先一定因為有大浴場啦、又有小型商務中心啦、

雖然細細間都有Lobby㗎、仲有免費提供咖啡添，

當然仲有我最鐘意嘅免費早餐啦！

免費嚟講都算OK架喇！我試過有啲酒店只有飯團同麵包咋，
起碼佢有每朝必食嘅蔬菜、沙律同乳酪吖。

喺飲品區旁邊仲有冬天必飲嘅粟米湯。

咁啱食食多啲，唔啱食食飽啲囉。

呢份係在下嘅早餐。終於可以坐自閉位嘞！Yeah！



食完早餐去附近行吓，認識一下呢道，
常滑市應該係以陶瓷聞名，車站旁有好多陶瓷貓作品。

行一陣，就決定起程搭名鉄去犬山市。

我揀咗搭慢車，貪佢唔駛轉車吖嘛，要搭25個站架，

喺呢1小時19分，正好用嚟寫facebook，寫完啱啱到犬山站嘞！

第一站係犬山城下町，一條幾有氣氛嘅古裝街。

呢間係犬山祭山車展館。

門口大排長龍嘅昭和橫丁，原來條龍係嚟買小丸子甜點嘅。

其實裏面都係古裝街，有好多小攤檔賣零食同小食。



買咗自己入去搵位食啦！

呢間舖都好搞笑，可能怕大家左問右問，
所以寫明「This is a pen」。

飛驒牛留番上高山至食，先食霜降牛啦！

俾呢間皮革店吸引住，入去時有個後生女喺度整梗皮革品，
睇咗一陣有個婆婆用托盤送飯俾個女仔食，好家庭式架。

入面啲嘢都好靚，好似呢個I phone套咁，幾有特色！

行兩行又食，係花生味嘅五平餅，不過我都係麻麻哋鐘意咋！

上去之前先睇睇個簡圖，了解一下地理位置先。

順路行去第一站犬山祭擧辦場地：針綱神社。

旁邊就係三光稻荷神社，聽講係出名求姻緣，
所以都有好多小情侶嚟喎！

神社都要搞綽頭，地上有人造影相位。

幫朋友代購嘅：Keropi御守。
因為朋友好鐘意Keropi，所以我whatsapp俾佢睇，
朋友問我呢個御守係保咩嘢，我就將張相放喺群組問吓達人，
達人話只係寫住“keropi 御守“， 可能係保佑 keropi，
另一達人話側邊有幾隻字，應該係「お守り 無事わな」，
字面大概係事事順利，所以最後我都幫朋友買咗。

再行上就係犬山城嘞！

俾500円入場，唔俾的話，乜都睇唔到。
話時話，我都好鐘意呢張自拍照。

今日係一個大好天，個天靚到吖！

影完張相之後唯一活動：換鞋登天守閣。

我未行過咁直咁窄咁高咁滑嘅樓梯，
好難行，中間想過放棄⋯⋯最後都上咗去，
點知，上山容易落山難......

終於都登頂喇，影張全景相啦！

四邊各有不同風景，另一邊景觀⋯⋯

沿路離開，再經三光稻荷。

上半場完，去名古屋駅行吓，太多人嘞！

首先去搵吓聽晚間酒店個位置先，費事聽日拉住個喼四圍騰啦！

行到四點幾，諗住去食人氣鰻魚飯啦！但係，要排40-50分鐘？

唯有食另一人氣：矢場豬排啦！叫一個定食啫，是生漬嗎？

再去搵吓聽日換Pass嘅位置，唔駛聽日傻更更四圍搵啦！

最後做埋指定動作：去藥房格價，然後就買枝水返洒店休息嚕！



今日行咗好多路，I phone話俾我知係19000步呀！
搞到對腳好似唔係自己嘅咁，我諗主要係犬山城落樓梯果吓，
真係好直好難行，而後面不斷有人落梗，唔敢停，
最後用盡全身力量至落到嚟，原來後果都好嚴重，
對腳痛到死，彎唔低身，一定要急救一下，
所以番酒店後落去浸吓大浴場，
然後又坐吓按摩椅補番吓，仲有六日噃！