2017年4月16日〈星期日〉
民宿唔包早餐，咁我哋就喺便利店自選啦！
三文治，杯麵，飯團，加埋個開放式廚房，好味。
清晨嘅街道，好清靜，我好鐘意呢個小小市鎮，
好多地方都可以徒步到達，亦好適合踏單車，下次要試吓先。
今次無租單車，天氣咁好，不如就行吓啦！
自由行，最鐘意行吓街市啦！我哋今日去行宮川朝市，
佢喺江戶時代已經開始存在，係日本三大朝市之一。
點知入口第一個檔口，已經嚇親我嘞！
Espresso with Cookie Cup，我都想試，
可惜佢只可以裝咖啡，朱古力又唔得，咁我唯有旁觀啦！
飲杯，我估應該幾好味嘅！
冬天嘅宮川河畔，好舒服，買餸都可以買得好悠閒，
我覺得佢同近江町市場、錦市場果類又唔同，呢度有氣質好多。
一個早上行吓買吓食吓，返去check out然後拉行李去高山駅嘞！
由於一早已經上網訂好車飛，今日一切順利唔駛排隊買飛，
好快就到達目的地，好多旅客快快步去搵Locker，
因為真係供不應求吖嘛，不過我哋今晚住呢道所以唔駛煩。
拉住小量行李，要行10分鐘去到民宿。
上次住右兵衛，今次住人氣之選「一茶」。
放低行李之後，第一時間就係去搵食啦！
喺呢邊算係最多選擇架嘞！
一個非常飽肚吓價值2100円嘅午餐，始終都係遊客區，係貴少少嘅。
正式介紹返吖，今日個目的地係白片鄉，
呢道四面環山，水田縱橫，係一個安靜嘅小山村，
但係，自從近年成為旅遊熱點之後，呢度日間就再唔安靜嘞！
經過2016聖誕嘅奇妙經歷，我已經見識過呢度嘅秋同冬，
今次嚟到，見埋春天添，唔知有無機會見到夏天呢？
村莊處處都係影相位，一於減少啲文字，放多幾張相啦！
下午陽光特別猛烈，呢張相好似幫得哋打埋spotlight咁。
趁住藍天白雲，合個照先。
咁好天，一定要上展望台啦！
喺度望返落去，整條村莊一覽無遺，
如果冬天落雪時嚟到，真係就好似一條童話村莊一樣，
呢條童話村莊入面一共有114間合掌造，
喺1995 年已經被指定爲聯合國教科文組織的世界文化遺産架嘞！
我認識白川鄉係2008年睇咗「最美麗的第七天」，
當年好多旅行社即時推出白川鄉嘅行程，
所以我同朋友們就喺2009年12月跟團第一次嚟到，
可惜當年走馬看花，只有1小時自由時間，
所以我當時好似曾經講過：一定要自己再嚟過，
終於，7年後可以實現到，而且係連續兩次。
來來來，回味一下，七年前嘅我哋@白川鄉。
上完展望臺又再四圍逛逛買吓影吓相就返民宿嘞，
民宿好易認，因為對面有一間酒舖，都係影相位。
嚟白川紃想體驗更深入啲，可以試吓住合掌造民宿架。
又嚟介紹返吖，合掌造嘅屋頂呈人字型，
就好似人雙手合十咁樣，所以叫做「合掌」，
合掌造係全部用木建造嘅，陡峭嘅屋頂就用茅草舖蓋，
呢個建築特色令到冬天落雪時積雪容易滑落，
唔會因為積雪太多而壓爛個屋頂，
而另外一個建築特色係全間屋一粒釘都無用過架！
喺香港想book合掌民宿唔容易，由於民宿主人多數都係老人家，
佢哋未必識上網，所以多數要自己打電話或fax嚟，
好似我咁唔識日本，就要靠Agent嘞，俾少少手續費解決，
我就係透過「日遊自慢」book嘅，每位收$90手續費，
今晚住嘅「一茶」，網上評價都唔錯，一齊嚟參觀吓啦！
入門口旁係共用梳洗區，大家朝早就排排企洗面啦！
代朋友寫少少意見，雖然我哋知呢度係好環保，
但係梳洗區只有一隻漱口杯，好似又唔係幾衛生。
民宿客人共用洗手間。
為免影響其他住客，必須注意入浴時間呀！
入住合掌造，先要調教好心態，最好用體驗真正民宿嘅態度，
因為呢度唔同酒店，無商務酒店嘅細心服務，
更加無豪華酒店嘅華麗設施，房，就係正正方方一間房，
無雪櫃無電水煲無梳化無電視，甚至連大床都無，
我哋四個人，今晚就係住呢兩間打通嘅房嘞！
返去仲未夠鐘食飯，於是換咗件浴衣周圍影吓相先。
係時候開飯嘞！係咪每一間合掌民宿個飯廳都一樣嘅呢？
飯菜同上次住右兵衛差不多一樣，精緻又好味，飽曬！
飯後都係去白川鄉之湯浸浸啦
，
，
無他嘅，呢度都真係無其他娛樂架，
而且咁又可以解決排隊沖涼嘅問題添。
繼聖誕節住過「右兵衛」之後，今次入住「一茶」，
基本上兩者都係差不多模式，但我覺得右兵衛比較細心，
在房內都會見到一啲告示，指示非常清晰，
而且，起碼佢提供唔止一個漱口杯吖！
沒有留言:
張貼留言