2016年12月29日至12月30日
通常最後兩日都寫埋同一篇架啦!
第七日係最後一晩,實在太⋯⋯忙嘞,
又要shopping又要忙住執行李嘛,
反正第七日都無咩特別,咁一次過寫埋啦!
起床開窗一睇,今日好好天呢!原來對面最後一重係雪山嚟㗎!
補充番,個早餐水準一般,同Dormy inn係無得比喇!
所以呢,維持原判:9.5分。
大門口有足湯,團友心思思想去浸,
但係昨日行白川鄉已搞到對鞋濕曬,仲要佢偷運入房吹乾,
今日又趕行程,終於無浸到,都話同足湯無緣啦!
返嚟古代,有人力車導覽。
一早已經好多遊客,呢度係高山古街。
一條街直落都係古老建築物,兩旁都係手信、小食、美術館之類。
兩個唔係咁鐘意影相嘅人去旅行,合照都係得個影。
咁多人排隊,一定係好嘢,不過啱啱食完早餐,無排到。
舖頭門前係一條水坑,老闆都會喺門前架上木板俾大家出入,
雖然水好乾淨,但係行果時都要小心啲呀。
貓貓產品始終佔第一位,三隻茶匙扮貓賣萌,
又點忍得住唔帶佢返香港呢?
為保持古街傳統嘅建築風格,7仔都要讓路配合一下啦!
自由行,梗係要行吓朝市啦,今次行宮川朝市。
做日本人生意同時,都好多遊客幫趁。
除咗街市嘢,都有啲新穎玩意嘅,好似呢杯咖啡,
飲完可以食埋隻杯,解決咗喺日本無垃圾桶嘅問題吖嘛!
行到中午就走嘞!要趕JR落返名古屋吖嘛,
今餐預定食火車便當,呢個sarubobo夠特色嘞啩!
打開張紙,原來仲送電話繩噃!
便當內容,都有蝦有蛋有肉有冬菇㗎!
拉住個喼衝吓衝終於去到酒店,
本來今日一早book咗上次名古屋JR附近間碌架Super hotel,
但上次經驗令我知道佢唔係旅行最後一日嘅好選擇,
所以即時Cancel佢再book咗呢間Rinku常滑駅嘅J hotel。
房間極大,方便今晚執行李,最搞笑係床尾兩張櫈,
我形容佢好似家有喜事個老爺奶奶坐喺度睇電視嘅位置 。
房間仲有空氣清新機,感覺良好。
茶水齊全
呢個浴室好大,分三部份,廁所、化妝室同浴室,
最重要係水力勁強。
酒店對面就係Aeon Mall,5分鐘腳程,最後一日都可以去補貨。
今日好似好多人噃,停車場已經停滿車喇!
買完執完,仲有幾粒鐘可以瞓。
埋吓數、執吓行李、食吓雪糕⋯⋯搞成晚,今朝走喇!
由出酒店房門行到名鉄月台,只需5分鐘,
搭名鉄去機場只需3分鐘,真係好方便!
又自己一個人回程嘞喂
只係多一件行李啫,都唔係買咗好多嘢。
今次終於買咗把遮,將佢單獨寄艙。
中部機場展望台,可以上嚟睇飛機!
一望無際嘅景觀,真係好大,未入閘前有時間可以上嚟走走。
機場行吓街,比卡超喼套,幾盞鬼噃!
北海道名物,中部機場都買得到啦!
唔明點解大家去機場都係掃Kit Kat,今次係蜜瓜味。
日本Starbucks啲杯時時會出特別版,我好鐘意呢個。
最後都買嚟送咗俾自己,店員問我想入咩咖啡,我話唔駛,
佢就俾咗一張coupon我,話任何時候再嚟日本都可以換一杯咖啡喎!
可能空姐覺得我個樣有氣有力,佢俾我坐緊急逃生位,
咁又係,佢應該估唔到我好人好姐係傷殘人仕嚟㗎!
雖然可以伸好長隻腳,但係無咗前而擺嘢個位,
個電視就細咗啲,不過有得已經好好啦,又食喇喂!
台灣轉機中,又搵個靚位上吓網先,寫埋呢篇,行程完結嘞!
下次,我要喺4月去立山黑部,都係名古屋出入,
所以話今次係探路之旅呢。
沒有留言:
張貼留言