2017年4月14日〈星期五〉
喺好耐好耐以前，我就想去立山黑部，全因為鐘意雪境啫。
果時係跟團年代，但係咁啱次次假期都就唔到，
講真我亦無真心詳細研究過，咁就一直只存喺wish list啦！
一般嚟講，立山黑部係4月中開山，要就吓假期先。
睇番近10年嘅復活節假期，今年似乎係最啱時機喎！
咁啱朋友叫我搞個團，咁就即係有腳啦！何樂而不為？
雖然，當時我已經買好聖誕節名古屋機票，但係無影響吖！
咁就當聖誕節係探路之旅囉，〈事實證明果然有用〉，
然後，再有多兩個朋友報名參加，成團嘞！
〈朋友真係少呢！打鑼打鼓先得四個團友！
〉
〉
復活節期間，機票貴得很，直航HKE未計行李都4千幾，
國泰同ANA更加貴到飛起啦，本來諗過東京進出嘅，
見埃塞俄比亞航空有平機票，時間又好，即check，
但係正所謂優惠期有限，平嘢真係一瞬即逝，即係又行唔通，
最後，都係行番窮人玩法啦：台灣轉機名古屋，
雖然頭尾兩日用咗嚟搭飛機，但係中間仲有整整7日玩，
機票價錢$3788，旺季算平啦！14:00起飛嘞！
台灣等候轉機，同朋友一齊食個小籠包先。
又或者悠悠閒閒咁喺圖書館睇吓書，扮吓文青。
上機嘞，食今日第二餐飛機餐先，個魚飯好好好好好味呀！
21:00到達中部國際空港，我覺得機場檢查行李頗為嚴格，
我嘅心得係，女遊客排男關員果行會容易過啲，
佢哋見到男遊客好多時都要求開喼check，
相反女遊客再加上講英文佢就好易俾你過。
我好快過咗，團友就遇著前面果group有啲阻滯，
於是連累團友都遲咗好多至出到嚟，
搭名鐵去到名古屋已經係10:40，但係我哋唔係即刻返酒店，
而係趕住11:00關門前買Pass同埋劃好JR嘅指定席先，
好開心，全部劃到第一志願呀，今晚有覺好瞓嚕！
喺計劃行程時，最初真係頭都大曬，最難搞係：交通。
最初諗住用「阿爾卑斯、高山、松本地區周遊劵」，
不過佢只得5日，對我哋嚟講似乎唔係太啱用，
後來發現呢張「立山黒部アルペンきっぷ」，
嚴格嚟講佢唔係一張pass，而係方便玩立山黑部旅客嘅車票，
不過呢套車飛各方面條件都好適合我哋個行程，
用足8日由名古屋順一個方向玩埋立山黑部，
票價係18610円，去程同回程各包一次指定席，
計落一定抵過散買嘅，好開心可以認識到呢套車票。
呢套套票都有啲限制架：
首先一定要順時針或者逆時針方向行，劃位時就要決定，
另外，有啲站係唔可以中途落車架，
仲有，如果要去白川鄉，呢套車票係唔包要自費架，
而立山黑部間嘅交通工具係不限方向同次數任搭嘅，
我估應該係方便喺山上面住嘅行山旅客，彈性大啲吖嘛！
四套飛有咁多張，要小心啲用，唔好撈亂呀！
搞掂車飛就快快趣趣去check in嘞，今晚住名鐵格蘭飯店，
網上評價都唔錯，講真JR站附近嘅住宿都幾貴，
今晚間雙床房每位$573唔包早餐，喺我標準算係貴，
但係間房都算大，整理行李夠曬位，
而佢最大賣點係個位置，喺正名鐵站上面，非常方便，
尤其是第二日要搭早車嘅朋友，貴啲都值得嘅。
標準浴室，今日咁奔波，洗個白白先啦！
安頓好，即刻落街買宵夜啦，估吓買乜嘢？
登登登櫈：係鱆魚小丸子呀！
同大阪食果啲質感好唔同噃，紮實好多喎！
食完之後梗係要行便利店啦！
本來我plan咗聽朝去食名古屋早餐嘅，
因為我想試吓買飲品送紅豆多士嘅早餐文化吖嘛，
不過團友提醒我聽朝又要寄行李又要準時搭JR，
又啱嘅，都係去便利店買啲便利早餐就算啦！
沒有留言:
張貼留言