2017年1月30日
呢個係酒店大門，位置尚算方便，
向左行係Ratchadamri站，向右行係Chit Lom站，
去邊道玩都咁容易，而且酒店仲有免費Shuttle篤篤去BTS站。
酒店早餐，都幾豐富架，泰國都應該唔衰得去邊嘅。
麵包區，牛油係用一個個紙兜裝住嘅，果醬都唔係獨立包裝。
蛋糕區，有我最愛嘅花生醬。
泰國酒店早餐嘅水果區一向都係最精彩架啦！
同水果最配嘅就係Yogurt嘞，仲有米奇米妮版添。
飲品區都幾多選擇，不過只係第一日有菠蘿汁，之後都無出現過嘞！
呢個最特別，分別係泰式奶茶同泰式咖啡，真係超級甜，
甜到無可能飲到一杯，我通常會將佢兩溝，自製泰式鴛鴦，好味！
熱飲仲有薑茶添。
蛋區，家姐每日都有幫趁架。
因為有小朋友，今日居然去夢幻樂園，
對我嚟講真係無可能，我平時好少會去樂園架，
最難得係，我兩個朋友都陪埋我哋一齊嚟喎！
呢道交通非常不便，一行六人，唯有call 兩架uber啦！
不過經驗麻麻，其中一架車有呃我哋錢，
雖然唔係多，但係都唔忿氣，
嬲完就算啦！入場開開心心去玩啦！
入去巨人屋之前，先喺門前同向日葵影張相先。
入到巨人屋，原來佢瞓咗，妹妹叫大家要靜啲呀！
咁大張櫈，坐多幾個都得啦！
曳曳豬，今日就喺垃圾鏟罰企啦！
一人一隻鞋，啱啱好。
今次喺香港買定套票，包括入場、午餐同玩雪，入場嚕！
其實最好玩就係呢個滑水泡啦，我哋排咗幾次呀！
一大個棉花糖至20銖，平到笑，兩姐妹食得好開心。
玩咗幾種機動遊戲，玩到攰曬，去拍照呃吓like先。
一家大細喺水果屋前大合照。
入去糖果屋，妹妹喺大衣車前車件衫。
窗台邊有個大水果籃，不過個洗手盆唔洗水果洗妹妹喎。
喺呢張麵包櫈上面，兩姐妹坐得好優雅噃。
最後我哋去坐下水上單車遊吓湖，玩咗好耐。
其實我好多年前跟團都係去呢個樂園，即係已經幾舊，
所以好多嘢都唔駛排隊，可以輕輕鬆鬆咁玩，
而且，$127已經包入場、午餐同雪屋，都算抵玩嘅。
完場真係搵唔到車，唯有包架車返嚟啦！
第一站去林真香，買曬手信叫佢送返酒店，安樂曬。
今日大家都攰嘞，去金MK食個火鍋先，
〈不過講真認真麻麻哋呀！〉
沒有留言:
張貼留言