第三天：常滑Rinku→名古屋駅

2016年12月25日

嚟到第三日，今日嘅行程就係行街買嘢，
因為之後都無乜機會買架嘞！

巡例食個面壁思過餐啦！咦～今日無稀飯喎！

尋晚發現洒店附近原來有便利店架，shopping就由呢度開始啦！

 喺seven hea一陣，就搭一個站去常滑Rinku，明啦！

 大到吖，應該可以行三個鐘。入面有Aeon store、有藥妝、有食街、有賣衫賣鞋賣書賣旅行用品童裝⋯⋯有排行。

 兒童零食精品部分已經有happy bag嘞！

 包包都好吸引，好想買番去。

 家庭用品happy bag都已經開賣喇！

 即食麵都有好多種，點買到咁多呀？

 合味道福袋，1000円有7個杯麵，其實都唔係平好多啫。

可惜我最想買嘅童裝仲未開始賣，今年買唔到福袋俾姪女嚕！

 腳痛發作，就此收手，出去搭shuttle bus，又見到常滑名物。

 就係呢架，咁快去機場？唔玩嗱？

其實唔係，我只係嚟接機啫，之後幾日又有陪囉。 

 仲有，要嚟食嘢，因為呢道無咁多人排隊。

尋日喺名鐵商場要排40分鐘，呢道10分鐘就得嘞！

 登登登櫈！就係名古屋好出名嘅鰻魚飯嘞！

就算係唔太好鰻魚飯嘅我，都俾十個讚佢呀！

鰻魚外脆內軟，三種食法中，我最愛原味，份量啱啱好呀！

 出返名古屋站，第一時間去換證劃位，

yeah yeah yeah，全部派到第一志願呀！

 今晚住平民化嘅super hotel，好平，二人房7500円，

缺點係遠啲離車站7分鐘步程，但係優點都多，

首先可以自選枕頭，一個啱自己嘅枕頭真係好重要。

大堂提供睡衣，另外仲可以自己揀5種禮物，

例如mask、cream、髮圈⋯⋯ 

 大堂有免費早餐，未知好唔好食，暫時見到地方好⋯⋯大。

 有我最愛嘅洗衣機，自由行必備設施。

 我好鐘意呢個方法，用密碼開門鎖，唔駛袋住鎖匙或房咭。

只要記低密碼，同房各自去買各自番房都得。

 Super Hotel一大特色，節省空間嘅雙人房：碌架床。

感謝團友體諒我年紀大兼腳痛，俾我瞓下格床。

 安頓好就去千里馬買曬所有藥妝，行吓行吓已經好夜，

回程見到手羽先已經關門，無可選擇下，

估唔到朋友到名古屋第一餐居然係食：吉野家！

 今晚買新口味，聽日早車，洗完衫就瞓啦！