第十天@曼谷朋友團

2017年2月4日

今日又包車，都係娜姐嘅車，

價錢比較平，不過講真架車唔夠尋日果架咁舒服。

團友C今日要返香港嚕，送完我哋車佢就去機場嘞！

今日第一站先去美功鐵道市場。

我哋架車剛到車站附近時，司機突然好緊張，

猛咁叫我哋落車跑過去，原來剛剛好有火車經過。

一落車就見到大家人頭湧湧個個高舉手機。

火車路過之後，軌道又回復平靜囉。

其實呢條火車線路仲係運作緊架，下一班車14:30。

軌道另一邊係街市，真係好多人，收嘢時真係要爽手啲嘞！

有乾貨有濕貨，由於有好多魚賣，空氣中充滿住街市嘅氣味。

水果同蔬菜種類好多，而且價錢好平，
我哋都買咗好多龍眼同芒果返去食呀！

行完要去搵食啦！肥哥哥好叻架，整梗乜呢？

係徒手畫卡通Pancake呀！

雖然今次無去食榮泰，但係都要去食吓魚蛋粉嘅。

我估喺泰國求其一間都好味嘅。

第二站就係去安帕瓦水上市場嘞！

話時話嚟泰國咁多次，我都係第一次行水上市場咋！

我哋六個人，包咗一隻船行一個圈，都好舒服喎！

沿途見到好多高腳屋，好似大澳。

一定唔少得有寺廟啦！

呢間好靚靚，不過我覺得坐喺出面食嘢好似好危險咁嘅！

以前啲旅行社廣告相都會見到類似嘅圖片架。

其實我覺得呢道都幾好行架，好多嘢買。
不過我就唔會喺道食嘢嘞，感覺衛生情況非常麻麻。

今晚最後一站，喺Atelier @ Pullman食Buffet ，
係喺Eatigo訂位，有5折，都算幾抵食啦！

食物種類唔算好多，不過以呢個價錢都算OK啦！