2017年4月20日〈星期四〉
今早未夠七點已自然醒，打開窗一睇，嘩！大晴天呢！
嗱嗱聲著好禦寒裝備出去視察一下先，
由酒店一出去已見到剷雪車努力工作中嘞！
好感動呀！尋日上到嚟大風大雪，乜都見唔到，
今日天朗氣清，終於可以講：我上到室堂嘞！
喺山上，立山飯店算係最豪華最方便因為直接連住車站，
除此之外，呢度仲有其他酒店：(みくりが池温泉同雷鳥莊，
不過就要行幾遠吓，天氣好都無所謂，
假如好似尋日咁大雪，靠呢個路牌搵酒店都幾徬徨吓！
酒店後面有條雪之回廊，係雪牆迷你版。
清晨時份，只有幾個住客，簡直可以包場呀！
趁住無人，快手啲啦！
喺飯店借咗雪杖，用途係：扮曬嘢。
天氣不似預期，尋日差到差啲上唔到嚟，今日個天又咁靚，
我哋上嚟個過程咁曲折，大家笑吓啦！
行咗一圈，趕住返去食早餐，因為餐廳夠鐘閂門嘞！
食完早餐再出去影過，事實上除咗影相都係影相啫，就算唔影呢張相，我都唔會忘記海拔2450嘅立山室堂高原嘅。
旅行團大軍剎到嘞！好彩今朝影咗先啫！
所有地標牌前都要影番張嘅，重點景點：雪之大谷喎！
可惜，咁好天都要中止，雪之大谷今日全日都唔開呀！
無天理呀！已經見到個入口，但係只可遠觀咋，只差幾步......
不過去旅行最緊要識自娛，去借個雪兜玩吓又笑番啦！
既然唔可以入雪之大谷，咁就走啦！
話說由富山入扇澤出的話，就稱之為立山黑部；
相反由扇澤入富山走，就叫做黑部立山，
咁我哋今次就係黑部黑部囉，因為我哋係沿路走吖嘛！
尋日又趕時間又唔好天，都無機會停留，今日先去大觀峰。
等待索道，見到咁靚嘅景緻，等待絕對係享受。
再番到黑部水庫，雖然已結曬冰，但係天氣同尋日天淵之別。
6月26日至10月15日期間嚟，可以睇充滿振撼力嘅水庫洩洪，
如果可以，我都想喺唔同季節嚟多次，更深入認識立山黑部。
到扇澤嚕，即係代表立山黑部之旅已經完結，
雖然今次旅程遇到小意外，差啲令我哋陣腳大亂，
不過最後都解決曬問題，仲得到呢個非常難忘嘅經歷，
而且今次個反人潮方向同時間，令我哋全程都唔駛排隊。
跟住時間表預備搭巴士離開，
但係......一班內地朋友加一大班泰國朋友......
唔守時、不停阻止巴士開出、夠鐘先嚟買飛、
買咗飛又話朋友啱啱先去咗廁所......工作人員都好無耐。
搭咗35分鐘，去到信濃大町，只有十分鐘時間轉JR，
完全無時間食嘢，唯有喺便利店買埋最後幾件三文治啦！
1小時後，到達松本駅，咦~又返到文明世界囉！
就喺車站旁邊，已經有shopping mall嘞，我覺得仲旺過高山。
尋晚住咁貴，今晚要住返平啲，唯有瞓碌架床啦！
相連房間每位5800円包早餐同大堂自選五樣小禮物，
係我Hotel list入面前五名嘅：Super Hotel，
朋友都話張床好好瞓。
早餐大堂，有好大量坐位供應。
經過Dormy Inn嘅免費洗衣，呢啲500円洗衣加乾衣就顯得太貴嘞！
放低行李去松本城，喺櫻花襯托下，好似一幅畫咁靚。
仲有新喺度影結婚相添。
而家仍然保存五重天守閣嘅只有姬路城同松本城，
係日本政府指定嘅國寶古城，我哋好好彩嚟到，
我哋去到已經4點幾，入唔到城，唯有影番張相留念啦！
今次入唔到，哈哈......即係有藉口可以再嚟啦！
今次旅程途經每一站，都同櫻花擦身而過，
估唔到喺毫無期望嘅情況下，居然有意外收獲呢！
其實有啲地方已經開始吹雪嘞！
日本人真係好有閒情逸緻，自己賞櫻都唔止，
仲帶埋狗狗嚟，唔知係賞狗定賞櫻呢？
一切好似日劇咁，突然聽到好有趣嘅流動廣播，
雖然我哋唔識聽啫，但係都聞到啦！係煨蕃薯呀！
食完煨蕃薯，繼續行去另一邊，如果滿開一定仲靚。
太鼓門旁嘅櫻花已經飄落河中，又係另一種風景。
夢寐以求嘅櫻花道路。
今日係第七日，由於坐骨神經痛，無辦法連續行多過1小時，
呢七日都係靠止痛藥，而家連止痛藥都止唔到痛嘞！
晚餐，是但搵一間，食烏冬啦！
沒有留言:
張貼留言