2017年4月18日〈星期二〉
老套啲講句：美麗嘅一天由豐富嘅早餐開始，
我鐘意Dormy Inn，早餐都係其中一個原因，
不過老實講，呢度同北海道果間水準相差太遠嘞。
今日由金澤去富山，因為套票唔包要自費，方法有三：
第一：最快捷搭JR，但係太貴，要2810円；
第二：搭巴士，其實我好鐘意，但係時間唔啱兼有行李限制；
第三：搭IR，時間慢好多但係勝在夠平，1220円就搞掂。
最後，我梗係揀第三啦！
最緊要有位坐，慢啲都唔怕，有59分鐘補眠嚕！
去到富山站，見到佢哋啲路面電車好得意，不過我哋無緣搭呢！
真係好想試吓租單車呀，不過唔識用。
呢度天氣變化莫測，尋日就全日落雨，今日又藍天白雲。
放低行李，唔好浪費個好天氣，我哋漫步去環水公園。
呢度好適合一家大細嚟親親大自然，就好似日劇啲人嚟玩棒球咁。
可惜櫻花已落，如果唔係，坐喺度賞櫻一定好正！
聽講呢間係最美麗嘅星巴克，可惜太多人排隊嘞，放棄。
玩完返富山站搵食，確係有啲難度，
富山駅周邊好似係一個商業區咁，選擇少唔在講，
有收多食肆做完午餐就唔開，偏偏我哋返嚟時已經過咗午市。
求求其其食咗個餐，我哋就出發去高岡市嘞！
高岡市係藤子不二雄嘅出生地，所以呢度又叫丁噹的故鄉。
因為網上資料唔多，唔想盲中中周圍搵，我哋去遊客中心攞料，
個staff非常好，除咗俾地圖我哋外，仲幫我check埋巴士班次。
其實都唔難搵，只要去到佐野新町嘅巴士都OK。
落車記住check埋回程巴士時間表，因為有啲班次都幾疏架！
點解轉兩次車都要嚟公園，雖然個公園都幾好玩，
不過我哋今程都無小朋友，應該無人想玩瀡滑梯啩？
其實我哋今日係嚟探童年好友吖嘛！
如果想搵公園官網，全名係「Otogi的森林公園」。
山長水遠嚟到，梗要一齊影吓相玩吓啦！
其實轉轉折折都係為咗去影幾張相咋，影完又返高岡站，
一出JR駅，對面就係多啦A夢的散步道嘞。
JR站下面，放有好多漫畫任睇，果然係漫畫之市鎮呀！
周圍都有檯有櫈方便大家睇漫畫，相信好多人都希望住喺度啦！
再細啲嘅小朋友都有落腳嘅好地方架！
上地面搵嘢食，點知俾我哋見到佢，無緣搭都要影低啦！
其實高岡市嘅食肆仲多，今日都係和風定食，飯加蕎麥麵。
追加個墨魚餅大家食，都好味。
再追加一份玉子大家食，好味！不過叫得太多，大家都食唔曬。
今晚住富山Comfort hotel，貪佢超近JR駅，
而且好平，網上訂有優惠，每晚每位4400円包早餐，抵呀！
沒有留言:
張貼留言