2017年4月15日〈星期六〉
一早起身，第一個工作就係去Lobby搵救兵先，
尋晚問過呢位哥哥，佢話可以幫我將行李宅急便去金沢架！
佢好專業，幫我填好表，仲打電話去金沢間酒店確認，抵讚！
寄出三件行李，每件1664円，換來幾日唔駛拎住個喼，抵呀！
上次嚟急急腳連呢個打咭位都影唔到，今早好悠閒，補張先。
喺經過名古屋站前時，見到有位婆婆問路，
警察叔叔同佢一齊踎喺路邊研究地圖，果然好親民好貼地喎！
我唔敢話俾人知嚟過名古屋，只可以話係路過，
不過喺度影番張合照，起碼都證明我嚟過名古屋駅吖！
四圍盪吓盪吓都仲有時間，點打發好呢？
JR駅有幾間好大嘅手信店，團友們都行得好開心呀！
喺月台候車期間，站長居然主動過嚟同我哋影相喎！好開心喔！
車到嘞！埋站嘞！向高山出發嘞！Go Go Go......！
出發前開始病病哋，剛剛就去藥房買咗樽感冒藥，
就係佢哋陪我撐住呢段呢段旅程嘞！
兩小時四十分後，就到達高山嘞！
可惜落住雨，咁就去搵食先啦，嚟高山，梗要食牛啦！
嚟飲杯先啦！旅程愉快呀！
午市套餐，再另加牛肝牛舌白飯，4位共5960円。
由於天雨關係，今日下午個高山祭取消咗，好失望啊！
咁唯有先去check in啦！民宿位置就係喺呢條幽靜嘅街度嘞！
民宿正門，成間都係我哋架，好似好大吓喎！
介紹番吖，入門口右邊有個日式休憩間，不過唔係睡房嚟架！
左手邊係我最鐘意嘅洗衣房。
我好鐘意個浴室有櫈仔，腰骨無咁痛又有溫泉feel。
樓下樓上各有一個洗手間，就算多幾個團友都唔駛爭。
最鐘意個大廳有Kotatsu，令我諗起小丸子爺爺。
後面就係西式大廳，住一晚嘅我哋，基本上無乜點坐過呢度。
廳嘅另一邊，有一個開放式廚房，我哋只係用嚟煲水咋！
最特別係呢道啦！客廳外面居然係一個私人溫泉，好犀利呀！
但係今晚只住一晚，我唔夠時間浸浴，好彩團友有幫趁啫！
我估呢間屋都歡迎家庭團，因為我見到摺紙書同顏色筆。
行完樓下，開始參觀吓二樓啦！
二樓有兩間房，一間係和室，我住呢間。
另一間係洋室，佈置簡單，企企理理咁啦！
喺間屋玩咗一大餐，出發認識高山嚕。
「高山祭」被喻為日最美麗三大祭典之一，
我哋本來係特登夾啱日期嚟睇高山春季山王祭嘅，
就係希望睇到呢啲屋台花車巡遊，
但係今日就係因為落下所以取消，而家唯有喺道睇啦！
其實啲工作人員都好失望架，活動取消就一於就地野餐啦！
喺飛驒古街行完買完，就要搵條最長嘅龍排吓買嘢食先。
又見到飛驒牛幾個字嘞，咁多人排一定係好嘢啦！
係飛驒牛壽司呀！下面塊蝦片又可以吸吓油，
食完壽司食埋塊蝦片，又唔駛揸住個紙碟，都幾有智慧吖！
唔少得食番串牛啦！都唔錯嘅！
大家開開心心：「我唔客氣嘞！」
由於呢度係古街，連7-11都要改變顏色遷就吓。
行到晚飯時間，搵間平民食堂醫肚先。
入到去果時只有一台客，點解咁冷清？時間尚早啫！
十分鐘後，一班遊客衝入嚟，客滿嚕！
簡簡單單食個定食，好飽！
無論去到邊，我哋都可以搵到Supermarket嘅！
大家喺度買吓手信，呢間超市嘅嘢好平好抵買架！
咦，呢款消脂可樂係新出嘅喎，試吓先。
連金菇都有Hello Kitty包裝？真係一個注重包裝嘅國度呀。
返到去，梗係Hea住喺日式客廳伸對腳入去曖住睇電視啦！
我都要坐！對腳就好暖，但係個背脊無得俟就好攰囉！
我好滿意呢間民宿，設施齊全又新淨，地點方便價錢又抵，
喺高山祭期間，普通商務酒店都加曬價，
而呢間民宿都係平均每人$620左右，抵住。
沒有留言:
張貼留言