2017年4月19日〈星期三〉
今日，真係好緊張好刺激，係太緊張太刺激至啱，
成個流程簡直令我畢生難忘呀！
話說尋日有個朋友由黑部入，立山出，天氣好好，
又見到好多網友放咗好多相上facebook，我個心充滿希望呀！
我哋由富山入，先要搭富山電鐵到立山車站，
而最緊張嘅就係由立山車站搭登山纜車上美女坪，
只要呢段係需要提早預約車飛，之後嘅車排隊上車就可以嘞！
用pass的話一定要晨早去排隊預約富山電鐵同立山纜車嘅飛，
萬能嘅網友日日都上載啲朝早五點幾車站排隊嘅人龍相，
搞到我都囖囖挛，最終7點幾去到富山車站，
果然係著名遊客區，換飛時有個旅遊大使幫我快速搞掂曬，
一切安頓好〈我以為〉，先至7點幾，個天啱啱光齊。
換咗11:22富山電鐵，然後轉13:00登山纜車嘅飛，
一心諗住安樂曬，可以返酒店食埋個早餐同眠一眠先。
雖然我補眠中，但都係手機不離身嘅，無時無刻注意官網，
點知，居然睇到以下嘅驚人消息：高原巴士可能停駛！
咁嘅情況下，都無可瞓得著啦！不如早啲去車站仲好啦！
點知，啱啱去到車站，見到站務員貼緊張通告，
埋去睇一睇，個心真係離一離呀！
高原巴士全日停駛呀！！！
呢件真係最壞嘅事，今晚我哋訂咗山上酒店，
係最貴嘅一晚，今日取消當no show收曬100%架，點算呀？
呢位職員好熱心，見我望望吓，就主動話我知停駛可以退票，
知道我訂咗室堂酒店，又嘗試同我聯絡可唔可以取消，
知道唔可以取消，就幫我諗辦法教我搭新幹線由扇澤上，
但係幫我check過時間，去到應該趕唔到最後一班上山嘅車，
後來，佢又搵到另一個辦法，見我擔心去到無位上唔到車，
仲主動打電話俾巴士公司，確定我哋去到一定可以上到車。
好彩四個朋友都係醒目仔女又唔計較，
大家一致決定轉Plan，首先搭11:19新幹線去長野。
嗚嗚嗚......點解個天要咁樣試煉我呀？
唔通......連個天都唔鐘意我？
11:19出發，12:22到著，好彩大把位，可以坐低諗吓對策。
係囉，坐吓抖吓啦！今日會好奔波架！
呢程車要自費，6580円，好乸脷呀！
到達長野係12:22，而長野到扇澤嘅高速巴士就12:30開出，
即係話，我哋有八分鐘處理「落車出閘搵巴士站」，驚驚！
好彩，富山車站個職員講定我知係25號巴士站，唔駛盲中中，
巴士司機見得哋行埋嚟，問我去邊，知我上立山佢都嚇一跳，
但我話佢知我會住山上酒店佢就話OK嘞！
原來呢架唔係繁忙時間巴士，要上山嘅人早就上曬，
所以全車加埋我哋只有六個人，都係自費每位2600円。
今日應該無得食架嘞！剛才喺新幹線度買定三文治。
朋友就買咗個飯盒。
頭先上巴士果時明明好好天架，點知越近扇澤天色就越差，
唔知係咪司機知我哋趕車，最後個站開快咗，14:10就到嘞！
一落車睇吓，嘩！雪呀！好大雪呀！
哈！點解仲有好多旅遊巴停喺度嘅？
過五關斬六將嚟到，每個關卡都大大隻字提我哋「中止」；
每個車站職員見我哋想搭車，都好驚訝，怕我哋趕唔切落山，
我哋要不厭其煩解釋我哋已經訂好酒店，佢哋至話OK咋。
你睇，開山旺季，你有無見過車站空無一人呢？
我哋行去排咗一陣隊，就有幾架旅遊巴嘅遊客一湧而上嘞！
而呢一班遊客，大部份時間都同我哋共同進退架。
14:30我哋上咗「關電隧道無軌電車」。
一車扣一車，全部滿曬架，話說佢哋係旅行團，
原本由富山入，但係天氣關係即刻變陣同我哋一齊由扇澤上。
車程16分鐘，到達黑部水庫。
只要跟住人潮一直向前行，一定唔會盪失路架！
呢段路正常要步行15分鐘左右，不過天氣差就另計，
好似今日咁，大風大雪，啊！係大風大冰至啱。
雖然吋步難行，但係真係好壯觀，真係非筆墨同相片能形容。
呢度係經過艱巨建設工程嘅日本最高黑部水庫〈海拔186公尺〉，
呢個天氣，呢個經歷，真係好難得好難忘。
我估我哋俾正常時間行耐咗，終於到達黑部湖駅。
跟住要搭黑部登山纜車，設計有啲似香港山頂纜車咁。
今日天氣唔好，反而唔駛同人爭，車嘅班次好順，又可以悠閒啲。
車箱坐位好窄，而且好多遊客都帶大背囊，有位都坐唔到。
望返落去，好似時光隧道咁。
無位坐都唔緊要，車程好短，5分鐘就到。
15:25到達黑部平，等待立山架空索道，15:30出發。
越接近室堂，發現越來越大雪，視野都變得更差。
15:37到達大觀峰，但係天氣太差我哋無辦法出外睇風景，
於是立刻去坐立山隧道無軌電車啦，
找亮點，呢程車同之前有乜分別呢？
無錯嘞！旅行團遊客無曬嘞！因為佢哋唔係住山上，
搭完索道已經沿路返去嘞！叫做見識咗幾種昂貴嘅交通工具啦！
包車，向住室堂15:45出發。
15:55，到達室堂車站，都係果包啦，大堂咁少人，少有喱！
而家大雪，氣溫-7度。
天氣好凍，經過一日勞碌，大家都想食熱嘢，可惜呢個包......
咁辛苦都係想上嚟住一晚啫，立山飯店，報到！
今晚訂四人房，咁多晚最貴今晚嘞！一泊二食每位21600円，
可能由於行李少啦，我覺得房間都尚算寬敞。
床上有個毛巾包包，因為呢間房無浴室架，今晚要去大浴場。
打開窗一睇，窗邊積滿雪，可想而知出面有幾大雪呢。
呢個就係四點鐘窗外景色嘞！伸手不見五指呀！
休息一陣去認識酒店先，大堂職員都有禮貌而且英文唔錯添。
另一個休憩間，不過人影都無隻，燈都係我哋自己開嘅。
住客專用儲物櫃，要入100円，不過開櫃時會退返錢架，
我第二日check out咗都偷雞係將行李放呢度，
唔駛拎住行李方便出去玩雪吖嘛！
住客可以免費借用雪杖雪抓雪兜等，算係幾大方架嘞！
仲有防水鞋添。
行完就梗係要去shop一shop啦！我哋無乜機會買嘢架咋！
我估呢間都係海拔最高嘅The North Face嘞啩！
今晚個餐單，應該會好飽嘞！
入坐後，個Waiter好有禮貌行埋嚟，
腰板挺直單手放身後用非常順暢嘅英文介紹菜色，
果然係一間四星級酒店呀吓！
呢度係一部份咋，影都影唔曬，飽到吖！
今日辛苦曬，大家真係要慶祝吓！乾杯！
好啦！大家今日都無食晏，唔好客氣嘞！
沒有留言:
張貼留言