第六日：白川鄉→高山

2016年12月28日

第六日，係奇蹟嘅一日，

你信唔信，旅行都有旅行運？

我信，我諗，我有少少。

尋日仲唔開心點解會落雨？

四圍濕淋淋霧煞煞係算點？

今日，就俾我見到奇妙嘅事情發生嘞，

真係好似小朋友瞓醒見到聖誕禮物一樣咁開心呀！

民宿早餐，好家庭式，好精緻，

但係我三扒兩撥食曬，因為醉翁之意⋯⋯

其實尋晚浸完泉回程果時已經開始落雪，

今朝刷牙果時我就心思思開咗少少門望咗一望，

呢份係年尾大禮，今日白川鄉居然全舖滿雪呀！

 啲魚真係好勁，咁凍都可以悠悠閒閒咁游水，

白雪襯冰河，橙色魚仔顯得份外精靈。

 民宿後面條吊橋，晨早流流只有民宿住客，

未有遊客到訪，點影都得。

 原本濃飛巴士站喺吊橋呢邊，

好彩搬咗，唔係都唔知點拖喼呀！

 喺旅行團大軍剎到之前，我哋趕緊影低寧靜嘅白川鄉先。

 四圍都好靚，想不到今次會見到雪景。

 藍天襯托會更靚。

 昨天嘅水影位。

 昨天嘅稻田位。

 雪嘅稻田上好似一個個波波咁。

 好多戶門前都有柿樹，白雪中一點鮮艷顔色，真識搶鏡。

 藍天白雲白雪柿樹，大自然嘅顏色。

只係用智能電話，都影到好似明信片一樣。

上去展望台果時見到勁多人排隊等車，要排到第二架車，

車已爆滿，我哋仲要係企位添。

雖然尋日已經上咗，但係今日呢個情境，

又點可能唔去多一次呢？

 影完張相落番嚟，見到小小郵車，好可愛。

 平成28年12月28日，白川鄉，我會記住你架。

 到此一遊相，白川鄉真係值得嚟㗎！感謝旅遊之神保佑，

俾我兩日內見識兩個不同景象。

 清晰啲，同一位置，左邊係尋日，右邊係今日。

 係時候要走嘞！走之前，食個飛驒牛肉包先。

 搭50分鐘巴士，返到高山，第一時間衝去丸明。

 已經過曬午餐時間，所以無人等位，好彩。

 呢個飛驒牛雜肉餐，有3-4人份量嘅肉，

應該係切頭切尾又切唔出正正方方果啲啦，

但係肉質好好而且價錢超平，小資女食午餐，梗係揀呢啲啦！

 肉嘅品質好好架，不過食完咁多會有啲怕囉！

 呢幾日食太多燒嘢嘞，食埋呢餐夠嘞啩？

 食完午餐去check in，今晩住「高山櫻庵」，好近JR站，

係港台遊客熱門住宿飯店，一定有原因嘅。

 先飲杯黑豆茶welcome drink先啦！

 除咗Front desk之外，全間酒店都要脫鞋，

Check in時你除咗獲派房門鎖匙，仲有大堂鞋櫃匙。

 脫鞋區好大，啲鞋櫃好有特色。

一入去房，就感覺好似Dormy inn，

其他酒店唔會有嘅床頭向大門雙床格局。 

 床尾對正一個大窗，旁邊有個小客廳。

 房間窗外景色，我住最高，真好運。

 貼心嘅安排，温泉籃已等梗你，

唔駛左執右執，一抽起個籃就可以去浸浸嘞，

所有細微位都準備得好好。

 因為全間酒店都要脫鞋，所以酒店都送埋忍者襪。

又繼續無營養嘅報告，Hea吓執吓又食飯，

一泊二食，又⋯⋯係⋯⋯牛！

 都係朴葉燒，熱氣死，好彩仲有蔬菜。

 貼心服務，有英文版教你點食朴葉燒。

Main dish之後 

牛係main dish，自助區有甜蝦！

有甜品區

 冷盤區，不過唔算多。

 炸物區係最多款式嘅，不過睇見到怕怕。 

 日式燉蛋

 好味嘅朱古力蛋糕同芝士蛋糕

 芝麻布甸同蜜瓜

 同好好好好味嘅柿。

 甜品水果時間

食完飯抖一抖就去浸浴， 

浸完浴去洗洗衫，重點係：洗衫免費架！

乾衣就要收費，不過都好抵啦！

都話呢度似Dormy inn啦！浸完浴後都有免費拉麵，

不過我真係無能為力喇！

 不過免費益力多都飮到嘅，補充一句，酒店整體好好，

我暫時俾9.5分，睇埋早餐至總結分數啦！

 左邊係原味，右邊係蘋果味，貪心嘅我，飲曬兩支。