2016年12月27日
又嚟報告一下第五日嘅行程先，今日主要去白川鄉。
2009年聖誕節，同幾個朋友第一次嚟白川鄉，
覺得好靚，好想住吓，估唔到今日真係實現咗喎！
睇返今朝個早餐先，好多選擇㗎！居然食朴葉味噌燒喎！
新鮮出爐嘅麵包。
燒魚，係拎返自己張枱自己燒喎！不過咁食法真係太熱氣嘞！
心型玉子燒，咁有心思你又見過未？
食早餐果時，見到呢個心型玉子燒好靚想影低，
但覺得舉機拍照有啲無禮貌，殊不知廚師反而高度配合，
真心欣賞佢寓工作於娛樂嘅態度。
拎齊就開餐嘞！
尋晚無停過落雨，窗外滴滴答答響，搞到我成晩都無覺好瞓，而今朝出面又煙霧瀰漫，好似天色麻麻喎！
同足湯無緣啦！啲櫈都濕曬坐唔到，唯有下次啦！
搭shuttle到下呂車站再搭1小時JR到高山。
利用之前劃好位嘅飛，順利上咗濃飛巴士嘞！
車上仲有wifi提供噃！
50分鐘後，就到達白川鄉嘞！
波折重重終於book到嘅民宿，今晚住利兵衞，
唔係最熱門嘅選擇，不過我就好滿意嘞，
屋主好好人，兩點嚟到諗住放低行李，
點知屋主已經招呼我哋入房喇。
屋主係個婆婆，可能唔會擅長同遊客溝通，
但係牆上嘅告示好清晰，大家要愛護呢個民化遺產呀！
一般要注意嘅時間都清楚列明。
朝食同夕食係大家一齊喺大廳食，要準時唔好要人等呀！
好似大約有5間房，今晚有3間住客，咁點解咁難book嘅？
呢間就係我哋今晚間房，
枱下面係電暖毯嚟，一定唔會冷親啦！
房門無鎖，其實民宿大門都係無鎖，不過窗門就鎖咗。
長長走廊，兩邊就係客房嘞！
公用洗手間，有分男女廁嘅。
公用梳洗間，朝早大家排排企喺道刷牙。
公共浴缸，聽說用完唔好放水，大家要輪流浸。
公用沐浴區，唔駛驚，你洗梗果時只要外面掛個牌，
咁就唔會有人入嚟㗎嘞！
注意入浴時間呀，我平時慣咗朝早洗頭，喺道就唔得嘞！
出去搵食，凍凍哋好肚餓，連齋麵都照殺！
外面天色昏暗，但係襯落合長造度又有另一番味道噃！
好多門前都有柿樹，仲有稻田。
老實講，一心諗住嚟感受冬天嘅白川鄉，
見到呢個天氣真係有啲失望，四圍都濕漉漉，
我嘅心情真係有啲低落。
稻草人喺道同大家招個招呼，Hi hi！
又食飛驒牛，450円一串。
都係尋日果間好味啲。
不過我都食得一樣咁開心架。
開始落雨，其實間間手信舖都差不多，
咁不如上展望台啦！行上去都成20分鐘架。
行上到嚟，果然無白費，一覽無遺嘅風景真係好靚。
傻人有傻福，搭到落山嘅尾班車。
記低個時間表先，可能聽日再嚟，多謝200円一位。
再行手信舖。
好多合掌造型嘅手信。
所有迷你版嘅嘢都好似零舍可愛嘅。
合掌造門前有咁多柿樹，一定有柿嘅食物啦！
沿路行番民宿，朋友好想試食五平餅，我上次已經試咗。
夜嘞，又落雨，又凍，我估夜啲會落雪添，返民宿嚕！
返到民宿抖一抖，換件浴衣先。
準時六點出去大廳開飯，連埋我哋一共有三組客人。
大廳個炭爐係間民宿嘅特色嚟㗎！
又食到超級好味嘅飛驒牛啦！
嘩！晚餐豐富喱！我鐘意食魚嘅人都食曬成條燒魚呀！
食完問屋主拎張拆扣券，一陣出去浸溫泉可以平200円。
張相係白天影嘅，因為夜晚實在太黑嘞！
白川鄉之湯係夜晚全村唯一娛樂，由民宿行過去都要十分鐘㗎。
由民宿出門口行去白川鄉之湯，嘩！真係落雪呀！都幾密添！
折扣後500円一位，毛巾自傋，有露天風呂。
由於嚟咗呢道浸浸，我就無用過民宿嘅浴室嘞！
無人，咁就可以影吓個女更衣室俾大家睇吓啦！
浸完湯，梗要飲枝奧飛驒牛乳啦！
床鋪已準備好，呢條村，十點就全村覺覺豬㗎喇！
雖然外面好凍，但係呢張被真係勁溫暖。
好啦！我都要入鄉隨俗早啲瞓，聽朝要準時7:30食早餐㗎！
希望聽朝起身積雪未溶，可以影少少雪之白川鄉啦！
沒有留言:
張貼留言