2017年4月17日〈一〉
喺民宿嘅膳食好似宿舍一樣，係集體活動，
民宿主人請大家7:30到大廳，咁就要準時唔好要其他人等呀！
今日個早餐，唔算好豐富，但一定夠飽嘅。
8:00食完早餐，仲有時間行吓，民宿門外已經可以遙望雪山嘞！
早上嘅白川鄉未有遊客到，我哋可以坐喺馬路中心影相都得。
朋友話想參觀吓合掌造內部，
話時話，雖然我哋都係住喺合掌造入面，
但係活動只限於地下果層嘅自己間房同飯廳，
如果想更加睇清楚裏面嘅建築，可以去參觀指定嘅示範單位：
包括「和田家」、「神田家」、「合掌造民家園」，
同埋我哋今日去嘅「長瀨家」，先由地下起參觀啦！
牆上掛滿好多照片，感覺好似香港啲圍村咁。
「長瀨家」樓高五層，由於長瀨家三代都係醫生，
所以一樓已經展示咗江戶時期嘅醫療用具，
另外其他樓層分別展示咗白川鄉村落嘅生活用品、
農具、織布用具、養蠶等等嘅設備。
終於爬到上嚟，見到斜頂嘞！
最上呢層唔可以上，但係都可以見識到個尖頂內部真面目架。
斜斜嘅窗台。
經過另一間民宿山本屋，感覺佢好似好有規模咁，
團友話下次推介朋友住呢度喎。
再見嘞！白川鄉，雖然我口口聲聲話未必會再嚟，
但我估我應該會再嚟，感受埋個夏天。
搭濃飛巴士到金澤，需時1小時25分，
今晚住我最愛嘅Dormy Inn，就喺JR駅附近，好方便。
今晚間房幾特別，和洋客房，可以住四個人，
每位7000円包早餐。
鏡頭一轉，第一日喺名古屋宅急便過嚟嘅行李已經送到，
而且早已著好雨褸乖乖喺房等我哋，行李宅急便真係好好用。
放低行李之後去商場搵食，呢間餐館叫「四、六」，
我哋食木桶飯，都OK喎！日本食嘢好少有伏嘅〈我估〉。
食完搭車去兼六園，去到櫻花已到尾聲啦！
咁總有一兩棵遲發育嘅呃到人嘅。
落雨絲濕，只好離開兼六園，去近江町市場行吓啦！
唔知點解我哋次次都錯過最佳食飯時間，只好齋睇唔買啦！
雨越落越大，不如提早返酒店啦！好彩有湯啫。
大浴場外嘅等候區，有大量漫畫供應。
點解我咁鐘意Dormy Inn呢？其中一定係佢個洗衣設備啦！
真係一啲都唔孤寒呀！咁細間已經有八組機，
喺女湯更衣室仲有兩組，一定唔駛等啦！
即使唔識日文，都識得睇「無料」啦！
無錯，呢度洗衫係免費架，只係乾衣要收費咋！
而且仲提供洗衣液添，抵讚！
大浴場女更衣室，唔方便影咁多嘅！
趁住朋友小休，我一個人去附近行吓，
剛才一直大雨，影唔到金澤JR站東口對出個具型「鼓門」，
雖然雨一直持續無停過，但係就算擔住遮都要補影一張啦！
鼓門對出仲有一個噴水池時鐘，差不多要搵食囉！
返去之前先去地下街行吓，話說金澤最出名係「金」，
果然，連手信都係，有金面膜。
食得落肚嘅金箔。
金澤美人咖啡，話說裏面係有金箔嘅。
美容用金箔。
就算幾唔鐘意收到鎖匙扣嘅朋友都應該感覺到金箔嘅誠意啦！
諗住喺車站附近是但食餐啦！點知真係中伏，又貴又唔好食。
好彩返去浸完溫泉之後，仲可以食碗免費拉麵補返啫！
沒有留言:
張貼留言