2015聖誕除夕關西城崎食買浸〈二〉

12月28日〈第二天〉

好嘅天氣，係快樂旅程嘅開始，今日個天靚到吖！

將行李寄存酒店之後，就向住京都車站出發嚕！

話咁快就到去到目的地......附近，感謝Google Map大神帶領。

到嘞到嘞！朋友仔要嚟朝聖，一於去入學吓嘢先。

創於1905年，已經109歲嘅老店：一澤信三郎http://www.ichizawa.co.jp/

京都百年老店嘅招牌帆布袋，
年輕人用百年老店袋，又豪無違和感喎！

店內帆布袋有好多款式，真係花多眼亂。

由於全店都係售賣hand made帆布袋，講真價錢都算貴，
朋友已經揀好款式嘞，只是一直糾結選邊隻色啫，呢個好嗎？

玩咗成朝，離開今日唯一景點嘞！幫你派張咭片先。

買完出門口轉右過對面馬路，就有巴士返京都車站嘞！

返酒店攞返行李，就喺京都車站搵食啦！
我哋去咗Lipton食西餐，食物質素OK而且環境又舒適。

午餐時間，每位大約1200円，價錢算公道啦！

食完就行去京都車站，由於係自由席，早啲去排吓隊先。

由於計劃去城崎溫泉，單程車費已經要4320円，
所以我哋買咗5天JR KANSAI WIDE AREA PASS
計啱時間，13:25搭ＪＲ特急きのさき7号去城崎溫泉。

要搭2小時24分，尋晚已經買定水果，上車食個柑先。

唔駛轉車，準時15:49到嘞！一到站就睇到7個外湯嘅介紹。

但係唔可以慢慢研究嘞！因為車站有酒店shuttle bus等梗呀！
今晚住大江戶溫泉物語，真係超級抵，
一泊二食，只係每位$617.5，選擇正確！
三人一房，和式，都算好大間。

個浴缸好細好舊嘅感覺，不過有乜所謂啫，
喺一間溫泉旅館入面，佢只係一件裝飾品啫。

但係窗外個景，真係好靚好靚。

再由大門睇一次吖，為方便大家去外湯借用嘅鞋。

為方便大家去外湯借用嘅籃，可以自己揀顏色架。

如果唔想帶貴重嘢，可以鎖喺道架！

大堂一角〈右邊〉可以自選浴衣，都係免費架！

如果嫌件浴衣唔夠靚，可以揀有料呢邊架！

個有料蝴蝶又確係靚過人嘅。

大堂有好大嘅休憩空間，好靜好舒適架。

呢邊可以借閱漫畫書，藏書量都好多吓，可惜我睇唔明啦！

呢個位啱我呀，唔知點解我好鐘意行溫泉旅館嘅手信店架！

玩到時間差唔多，早啲去餐廳排隊食飯先啦！

係自助餐形式，款式唔係勁多，不過一定夠飽。

如果鐘意食甜蝦刺生同燒牛排，就已經值回票價啦！

食埋甜品水果同雪糕，就差不多收手啦！

抖抖先，等個肚腩收番少少先，OK就大門口集合出發啦！

出面又凍又落雨，我都有少少懷疑頂唔頂得住，
見啲日本女孩子都問櫃台借大褸，我哋又去借件先。

大門口有shuttle bus車我哋去7個外湯，
司機會同我哋溝通吓先，問清楚我哋第一站去邊，
會俾地圖我哋睇，會話我哋知邊個湯今日休館，
如果你無idea，佢都會建議路線俾你，服務好好。

初到貴境，又凍又盛，都係近近哋去最近嘅柳湯啦！

今日就玩住咁多先，聽日仲要征服其他幾個外湯呀！