2015聖誕除夕關西城崎食買浸〈三〉

12月28日〈第三天〉

日頭補番個酒店大門景先，

今朝起身個地濕濕哋，應該尋晚落過雨嚟，

不過好好彩，check out後出發又天晴喎！

我哋今日要轉酒店，步行過去大約要10分鐘，

見好天，咁我哋選擇自己拉住個喼行過去啦！

今晚就係住呢間：「東山莊」。

放低行李，終於有機會行吓呢條溫泉街，
我哋決定慢慢行一大圈，認清七個外湯嘅位置先。

就由我哋旅館門口做起點，趁住藍天白雲，出發囉！

酒店職員教我哋行捷徑，10分鐘內就可以行到城崎溫泉駅嘞！

車站附近有好多舖頭，而且仲可以拎到好多資訊添。

轉頭行後幾步望吓個站，其實佢係一隻蟹嘅造型嚟架！

點解要係蟹？行吓溫泉街搵答案先。

成街都係海鮮，而且價錢都好抵！

嗱！歡迎主角出場呀！

蟹蟹蟹，全部都係蟹！

仲有尋晚無限任食嘅甜蝦。

咁大盒先至2000円，可惜帶唔到返嚟香港啦！

唔係淨得蝦同蟹架，呢個又點睇？

一直行都唔係辦法架，會唔會有咩景點呢？
有，日本好多景點都有嘅吊車，呢道都有。

咁一於搭山頂吊車上去睇吓風景啦！

好彩有藍天白雲啫，都幾多人上嚟架！

人在高處，又凍又大風，此地不宜久留，撇！

城崎最出名就係松葉蟹同但馬牛，咁我哋就周圍揾吓和食啦！

呢道舖仔細細，已經有另一家人幫趁中，我哋都要等一輪先有得食。

我哋叫咗三個唔同嘅定食，呢個係燒海鮮。

喺日本，點都要食番個刺生啦！

又湊熱鬧叫咗幾隻蟹腳添，我覺得係食氣氛多過食物質素。

有溫泉嘅地方，就一定有溫泉蛋啦！

自助形式，好似幾好玩咁喎！可惜我哋已經食飽飽。

城崎溫泉元湯，唔通呢個就係溫泉嘅泉源？

附近有免費足浴，大家都唔怕麻煩，一於一齊浸吓。

開始尋找七個外湯之旅。
御所之湯：係城崎最新建成嘅公共浴室，
有露天區可以欣賞楓葉，唔明點解要改個咁嘅名呢？

柳湯：係城崎最細嘅公共浴場，尋晚已經浸咗，
喺城崎中心位置，非常方便，我對佢嘅感覺係：非常熱！

地藏湯：由兩個浴場組成，話說仲有家庭使用嘅私人澡堂添。

一の湯：係日本西岸最早嘅公共浴室，

設施現代化，建築物比較西式。

鴻の湯： 當地傳說，從前有一隻鸛為了治療疾病，到了一塊沼澤地洗澡，

這塊沼澤地就是現在的鴻の湯，沼澤地的水因為具有治療效果而出了名。

鴻の湯就建在這塊地上，成為了城崎的第一個公共浴室。

它以露天浴場而聞名。

因其位於茂竹山下，鴻の湯提供了一個既私人又風景優美的休閒地。

曼陀羅湯：四周環境清靜，是一個吸引人嘅傳統風呂。

里湯〈駅の湯〉：就喺車站旁邊，

係七個溫泉中最大而且地理位置最方便嘅，

話說裏面有桑拿室同露天風呂，有日式溫泉同羅馬浴室，

男女浴場每日互換，要浸晒兩邊，起碼要兩日。

可惜、可惜我哋最後都浸唔到呢個湯，

所以呢，下次一定要再嚟多次。

今晚住東山莊，同尋晚唔同，係比較傳統，
價錢比較貴，一泊二食每位21850円。
住溫泉旅館，梗要早早check in，快啲歎吓吖嘛，入房睇睇先。

無人會用嘅裝飾物：房內浴室。

一入房又落番大堂？唔係咁早借籃出去行街嘛？梗係唔係啦！

是咁的，飯店除咗房內果件浴衣外，仲可以到大堂任選款式，
啲款真係好多好靚，而且有專人俾意見添！

返到房，唔好諗住hea一陣呀！無時間架，
因為佢哋接到order就會有專人上嚟服侍你：
一個姨姨會專門幫你著衫，另一個就會執定檯開飯。

件浴衣長到六尺到啱著，但係姨姨三兩吓手勢就幫我執靚靚嘞。

兩個傻婆，浴衣著得多，第一次咁豪有專人服侍，興奮到吖！

完不了的豪華，居然......喺房內食但馬牛同松葉蟹。

前菜...............

刺生.............

兩位主角..................

蟹棒刺生..........

牛.............

鍋物..........

燒牛肉............

日式燉蛋............

仲有甜品...........食完，飽到唔想郁。

但係我哋無放棄到，抖一抖，
點都唔好嘥咗件靚浴衣，一於出去浸吓啦，
但係咁，考慮到一陣浸完自己都著唔番件靚嘢，
所以，去最近個湯浸先，仲要帶埋房果件普通嘢，
浸完就著件普通嘢返嚟再放低件靚嘢，
然後再出發繼續去其他湯打咭，
淨係講吓都覺得複雜呀，
不過，係值得嘅！
今晚浸完，可以好好瞓嘞！