2015聖誕除夕關西城崎食買浸〈一〉

12月27日〈第一天〉

今朝9:15機，6:30就要去到機場，

好彩同朋友住附近區，佢又已經call定的士，

咁我就梗係一於死跟啦！

不過，就算搭的士，我都要天未光就出門口嘞！

去到機場，巡例都要上一上磅，12.6，勁輕喎！大把Quota啦！

入去Plaza Premium Lounge食個免費早餐先，
會員可以免費帶一個朋友，有好嘢梗要開心share至係架嘛！

今日搭UO，但係就借咗港航隻機，無得搭燒賣添！

9:15起飛，好快就可以正式開始我哋個假期嘞！

搭JR Express Haruka去京都，又快又舒服。　

今次買咗「ICOCA & HARUKA」咭，方便又抵用，
啱晒直接去京都，然後又停留關西地區嘅朋友。
https://www.westjr.co.jp/global/tc/ticket/icoca-haruka/

京都 - 並唔係我哋今次嘅重點，只係一個中途站，
所以，我搵咗一間近京都車站又唔太貴嘅旅館。
佐野家旅館〈Ryokan Sanoya Hotel〉

旅館細細，但係都有得泡大眾浴池，
睇吓佢個形狀，朋友稱呼佢為米奇老鼠浴池。

雖然只有3個團友，但都有分A、B組架，
好多時會因為時間、票價同機位問題，
遲join團友好多時都會分開唔同機嚟，今次就係咁啦！
我同朋友係A組，早到，B組另一位朋友會遲3個小時，
所以，我同朋友仔就出去行吓先，黃昏京都塔。

B組團友搞唔掂張上網咭，所以我哋失晒聯，
咁我計啱佢車程時間，去京都車站等佢，好彩接到，
匯合後第一件事，梗係食飯啦！

我哋三個都唔係食神，但係就係為食鬼，
團友時時話：喺日本食嘢，都唔會點伏架嘞！
所以，我哋喺幾間都留名，邊間快就食邊間啦！
最後，最快有位就係呢間食牛嘅，就佢啦！

第一餐，多數都係定食架啦！大約1500円左右，OK啦！

今次大家喺群組列出好多必食list，長到肯定食唔晒，
食完飯見仲有時間，就去買定零食先，
呢個紅豆Pocky同益力多布甸都喺list入面架！

Yummy！呢個布甸真係好好味架！