九州の夏2014第八天〈阿蘇火山篇〉

九州の夏2014第八天〈阿蘇火山篇〉

7月25日〈星期五〉

東橫Inn嘅免費早餐，無期望就無失望啦！

食早餐期間，我一直上網check住阿蘇火山纜車會唔會開，

到臨出門口再請酒店職員再check一次，都係顯示因為火山危險而唔開。

咁仲去唔去呢？由於已經劃咗回程車飛，都係博一博照去啦！

去程劃唔到「九州橫斷」，所以只好搭普通列車啦，

但係朋友們好鐘意喎，因為可以喺車頭睇住司機開車，

佢哋都讚司機好專業好有態度，去到啲無人嘅站都會招手鞠躬。

「九州橫斷特急」呀！今次同你無緣，下次一定要與你同遊。

到達阿蘇站，大家又再影影影......

有啲團友又去咗洗手間，我就去買九州產交巴士嘅車飛，

原來搭唔到呢班，就要等個幾兩個鐘，

吓！我大叫一聲，六人組即刻九秒九集合，廁所都去唔成。

職員很好，其實應該夠鐘開車嘞，但售票員立即叫停巴士等我哋上車。

匆匆買好飛，車上已無座位，我哋六個上到去，要拉開中間座位坐。

上到纜車口，咦！幸運之神眷顧，纜車有開呢！

纜車單程750円；雙程1200円，我大膽提議買單程飛，

天氣咁好，回程時候徒步下山，大家居然讚成喎！

今日天氣真係好好呢，同對面嘅朋友揮揮手啦！

車上坐位不多，但係無所謂啦！四分鐘車程之嘛！

到達火山口嘞！好壯觀啊！真係值得轉車再轉車嚟到呢道。

嘩！咁人齊，大家嚟張大合照啦！

玩咗成粒鐘，依依不捨咁沿住下山步道漫步返去纜車站囉！

沿途見到好多疊高嘅石頭，係許願嗎？

到纜車站口仲有時間食個午餐......定......定......定......食！

食個雪糕做甜品先，Cheers！

落返阿蘇站，要等大約一個小時，於是四圍行吓，架車好靚呀！

呢架都係，一睇就知係九州特產啦！

就算幾靜幾偏僻嘅車站，都有shopping嘅地方，而且地方仲好大添。

嘩！牧場牛奶呀！飲番樽先！

行完室內仲有戶外，戶外部份都係賣蔬菜嘅。

嚟一個透心涼嘅阿蘇產冰蕃茄先！

買完手信，係時候上車囉！

一定要嚟嘅其中一個原因，係回程已經劃咗Aso Boy嘅坐位。

我哋就係搭ＪＲ特急あそぼーい！104号回到熊本喔！

因為佢係特色列車，好難劃到位，而且一般只開星期六、日，

好彩我哋行程係七月尾，可能因為暑假所以就有連星期五都開埋嘞！

車內佈置好得意，大小朋友都走嚟走去影影相。

途中車上職員拎住小告示板請我哋行去前面車卡，

原來我哋有一小段路程會同人吉號並排而行，

兩架列車並排時車上乘客互相揮手打招呼，很有歡樂氣氛啊！

百密一疏，原來我完全忘記劃熊本返博多嘅車飛，

於是攞返行李後，請各位團員等等，我就去劃位啦，點知......

都係一陣啫，行李量增加一倍啊！無時無刻都買到嘢，在下甘拜下風！

回程囉！唔駛急但係要快，因為我今晚計劃去一間唔駛食定食嘅餐廳。

登登登櫈：就係好多網友都去過嘅「釣船茶屋」嘞！

因為返到熊本已經六點幾，攞完行李上房仲要左等右等大家集合，

我怕餐廳無位，所以請酒店職員幫我打電話去先訂位！真好訂到位！

入面放咗兩隻船，客人可以選擇坐船上定係坐房間，我哋梗係坐船啦！

餐廳知道係香港人訂位，特別安排咗一個會講普通話嘅服務生招呼我哋！

除咗喺餐牌點餸，每檯仲會獲派一枝魚幹，想食魚就俾啲心機自己釣啦！

嘩！釣到嘞！開心到吖......

今晚大家豪一豪佢，叫到一檯都係。

但係都唔算貴啫，六個人又食又玩，除開大概每人$250左右，OK喎！

今日嘅全日行程都好好彩，因為好多朋友都話上唔到火山，

點知我哋又上到，而且我仲以為朋友會對呢個行程無乜興趣，

點知啱啱相反，大家都玩得好開心喎，原來大家都唔係淨係鐘意shopping啫！

作為一個travel planning，令團友開心係最大嘅使命，我都好開心呢！

仲有仲有，夜晚終於唔駛再食定食嘞！

釣船茶屋雖然唔係話不可不吃嘅餐廳，但係確係幾好玩架！