九州の夏2014第三天〈伏見稻荷+貴船神社篇〉

九州の夏2014第三天〈伏見稻荷+貴船神社篇〉

7月20日〈星期日〉
今日瞓到晏晏先起身，再食個營養早餐先，咁先係旅行吖嘛！

咁都要食番啲港式無營養嘅早餐嘅！



團友都未去過伏見稻荷大社，所以我決定今日重遊舊地。

車未到，喺熱辣辣嘅天氣下，又無櫈坐，點算呢？
我哋居然無賴到走入對面月台另一架未開嘅車度嘆冷氣！

好快就嚟到稻荷站嘞，JR一出就到伏見稻荷大社，好方便。




口中擔住鑰匙嘅狐狸，係稻荷神嘅使者嚟架。


嚟到果時天氣好好，又有著和服嘅少女，好有氣氛喎！



好雄偉嘅鳥居呀！今日好熱鬧喎！



兩旁掛滿燈籠，充滿歡樂嘅氣氛，入場囉！



入屋叫人；入廟拜神，
入神社前，就先要到「手水舍」洗洗手漱漱口。
洗手都有規有距架：
「先以右手攞水杓，盛水洗洗左手，
然後換左手揸水杓，盛水洗右手，
再換右手攞水村盛水到左手，然後以左手將水漱口，
記住水杓唔到以掂到嘴巴架！
最後再洗洗左手然後將水杓直立，
用水杓中殘餘嘅水洗埋水杓柄，搞掂！」



上次行咗好少就差不多天黑，今次天氣咁好要行多啲！



越行越高，就會發現神社嘅size越來越細。



睇清楚地圖先，吓！原來行咗差不多十分一咋！



狐狸大人化身繪馬，大家都嚟許個願啦！



呢處好多人排隊，祈個願然後搬一搬舊石頭。



再行多十分鐘左右，就見到呢啲迷你神社嘞！



本來都想繼續上架，但係......天有不測之風雲！




好大雨呀！激死人嘞，避咗一輪都無乜好轉，唯有掉頭啦！



更激死嘅係：落到去居然又再放晴喎！



大社旁邊有一條人山人海嘅小路，即係有嘢食啦！



肚餓嘞！掃掃街先！燒魷魚好少有得輸嘅！



係時間要食晏啦！朋友係咪睇到好悶呀？又係定食！



食完之後返落人頭湧湧嘅京都站行行街睇吓B仔袋先。



日光日白嘅京都塔，都係夜晚靚啲。



買到最後一秒，九秒九衝落嚟上巴士，
點解要咁趕？呢個故事教訓你shopping要預時間退稅呀！


一定要搭到呢班巴士架，因為今晚約咗團友個姪仔食飯，
呀姪仔好叻仔架，嚟咗日本京都大學進修，
今晚佢就帶我哋嚟宿舍附近嘅平價飯堂食飯嘞！


一個餐一般學生肯定夠晒飽啦，但係我哋就會嫌太多嘞。



食完飯姪仔帶我哋搭叡山電車上山，我都未搭過呢條線喎！



由一乘寺出發，目的地係貴船口。



呢種列車好特別架，有一半坐位係面向外嘅，
好似話唔知係方便睇櫻花定係楓葉之類啦！


落咗電車之後，仲要再搭一程巴士至上到嚟架，
上到嚟天都黑齊啦！原來呢度都有好多旅館架喎！



沿住呢條兩旁有紅燈籠嘅樓梯拾級而上，
就係我哋目的地「貴船神社」嘞！



上到頂嘞！用另一種光影返落去，同現場睇又係唔同喎！
聞說呢度有季節性的流水細麵，好想試吓噃，
不過由於今晚怱怱一遊，當然無法嘗試啦！


呢度比較少香港人會到，以我觀察，
現場除咗我哋之外，應該仲有一對情侶係香港人，
我見佢哋都有喺度許願掛喺樹上面。


有乜嘢願望，就寫喺繪馬度啦喂！



本殿仍然開放，但係已經無人參拜嘞！
因為已經夠鐘關門嘞，要快啲走搭尾班車嘞！


其實呢幾日有祭典先至開到咁夜咋，
我哋真係有幸撞啱日期又有貴人帶我哋嚟見識見識呀！



認住佢啦！唔搭巴士的話，30分鐘左右就上到去，
如果係日間好天，慢慢徙步上去都不失為一個好活動。
不過如果比我自己編都唔識去呢度啦，
因為一般旅遊書都無介紹嘅，
希望有機會再嚟由鞍馬寺行到貴船神社，
沿途又可以感受吓大自然嘅風景，最好有埋紅葉啦！

去貴船神社，完全係編排以外嘅突發行程，

呢個體驗都幾好幾特別，令我想更加深認識呢個地方。