九州の夏2014第一天 〈京都住宿篇〉

九州の夏2014第一天 〈京都住宿篇〉

7月18日〈星期五〉
出發前，先將行李過過磅先，
我哋今次搭HK Express，網上口碑一般般啦，
但係我知唔可以信晒討論區架，親身試過至算。
揀佢第一因為佢平吖嘛：

香港飛大阪$1210，福崗飛香港就$1150，
未計內陸機來回先$2360，係咁多次去日本最抵嘅一次。
仲有一個好處：加$100就可以將行李加大到30KG嘞，
我唔算係shopping queen，所以無加，

但係同團就有3個團友加咗。
15.8KG，唔......可以買幾多嘢就有預算啦！

除咗平之外，時間都好正架：

去程上午10:00出發；回程18:00起飛，
呢啲時間我鐘意呀！唔駛晨早起床或者搭通消車返屋企。

之前都坐過其他廉航如樂桃同Jetstar，
相比之下，我覺得HK Express啲位比較好坐。

例牌無嘢食無水飲無娛樂，不過我就無乜所謂，
如果真係想食嘢，都可以喺機上面Order嘅，
除咗包檸檬茶太貴之外，其他食物價錢都係可以接受嘅程度。

本來呢次諗住用B-mobile，但係太早搞掂晒行程，
放低後反而忘記上網訂咭，終於遲咗訂唔到，
所以頭五日唯有用住櫻花咭先啦！

話說出發當日仲係三號風球，

我都好擔心會唔會又無限期Delay，
點知佢又好準時喎，仲好穩陣添，邊個話平嘢無好架？
由於第一站去京都，為咗慳錢慳時間，

所以落機第一件事去買張one day pass先。

注意注意：已經全線加價嘞！＿

今次唔係住酒店，租果間屋喺丹波口，

距離京都站一個站，都算方便嘅。

沿途會經過啲民宿，見到啲單車好靚呀！真係好想玩吓！

行咗大約10分鐘，見到間Lawson，

我哋就係約咗屋主喺度見面嘞！
由於我哋早咗小小，咁就一直企喺便利店門口等，
第一次咁租屋法，我一邊等就一邊驚，

屋主點架？會唔會唔出現呢？
每有人經過都望吓然後諗「會唔會係佢呢？」
終於，屋主中田先生喺轉角位突然出現嘞！
睇吓時間，居然同約定時間分秒不差，真係佩服佩服！

喺便利店轉彎，行入去一條非常民居嘅巷仔，靜到不得了！

兩分鐘左右，就到我哋呢幾晚住嘅地方嘞！

呢度叫Tsumugi Inn，我哋3人住全屋每晚$1888。
先將行李放喺樓下大廳，

然後屋主用非常不錯嘅英文同我哋介紹吓間屋。

大廳呢邊有個好日本家庭feel嘅休息區，

冬天仲可以開暖爐伸腳入去添！好似日劇咁呀！

呢度預咗俾家庭住，所以周圍都有小朋友嘢，

睇吓，暖爐上面都有玩具呢！

除咗大人鍾意睇嘅旅遊雜誌之外，

仲有嘅摺紙書同手工紙添！帶小朋友嚟都唔怕佢悶啦！

呢度好現代化架，有風扇小型影印機同吸塵器喎！

另一邊係一個開放式廚房，亦係我哋最鐘意嘅地方。

廚房用具真係一應俱全，真係要乜有乜架！仲勁過屋企呀！

除咗一般廚具煮食爐調味料外，仲有個洗碗機添！

呢個係令我最煩惱嘅設施：喺屋企都要垃圾分類！
因為有時有啲嘢真係分唔到類架嘛，又無第四個桶喎！

呢度真係我嘅dream kitchen呀！
可愛嘅嘢太多嘞！不能盡錄，自己睇啦！

屋內仲有好多窩心位，例如啲毛巾咁啦，

如果有小朋友就可以用彩色毛巾嘞！

登登登櫈：隆重介紹我最鐘意嘅設施「洗~衣~機」！

洗完唔夠乾仲可以烘烘佢，細菌都剎晒啦！

浴室，有櫈仔喎，咁似溫泉酒店嘅！我鐘意呀！

最巴閉嘅係，廚房有個製，按下之後，

佢會幫你較水沖涼，又唔駛驚水滿瀉喎，

因為到水位會自動停低仲會有聲音通知你，真係正呀！

廁浴分離，不過全屋得一個廁所咋！請排隊啦！

跟住就開始上二樓啦！呢間係主人房，呢度係有兩張床嘅。

我就住另外一間房，呢間係瞓Tatami嘅，可以開到三張架！

最後，屋主除咗送Welcome gift俾我哋之外，
仲另外送多一份小禮物，因為我哋係第二百組顧客喎！Lucky！

日本人做嘢真係超級細心，屋主已預備好手繪地圖，
詳細記錄熱門旅遊景點嘅交通路線同埋附近食肆嘅地圖！
最後，屋主同我哋plan吓路線後，就交低鎖匙俾我哋，
呢四日三夜佢唔會過嚟，間屋就係得哋架嘞！

一切安頓好之後，就去京都站搵食嘞！

第一日到埗，點都要食個日式定食嘅！

食完去睇睇京都塔啦！指定動作吖嘛！

喺間屋住三晚，點可以唔去便利店入小小貨呀？

嘩！好健康呀！聽朝嘅早餐已經排好隊嘞！

總結嚟講，我好滿意今次住宿經驗，

既不是酒店，又唔算民宿，但係又處處又窩心位喎！

下次再嚟京都，如果可以的話，我都會再租番呢道架！