九州の夏2014第七天〈熊本篇〉

九州の夏2014第七天〈熊本篇〉

7月24日〈星期四〉

尋晚好夜至Check in，咁今朝瞓醒就要睇清楚吓間酒店啦！

喺日本自由行多數都住商務酒店，好少住到咁具規模嘅。

今次呢間係水印長崎豪斯登堡酒店，

喺園區以外，唔算係豪斯登堡品牌酒店，

網上訂房，3人房$2700，未包早餐。

大門口都幾華麗吖，全程最貴呢間架嘞！不過都係宿一宵啫！

酒店大門對正千陽號，Fans一定好開心嘞！

一早就有人排隊等登船嘞！我哋無搭，

都同無處不在嘅One Piece角色影合照留念啦！

酒店左手邊直行就係豪斯登堡，

諗住向呢邊行睇吓搵唔搵到早餐食先。

可惜好多舖頭都未開，食漢堡又太太太貴嘞！

於是唯有返酒店喺販賣機買嘢食啦！

還好仲有幾款麵包揀吓，

喺最貴嘅酒店食最平嘅早餐，真係好大反差。

酒店有免費shuttle bus出去豪斯登堡JR站。

我哋要搭10:48嘅ＪＲ特急ハウステンボス12号到新鳥栖。

12:07到達，大家仲四圍影相，但係我好無情咁阻止咗，

因為我哋要轉12:20ＪＲ新幹線さくら549号到熊本，

新幹線到嘞！好有型喎，呢兩程車原價要5900円架！

呢班傻瓜次次都用唔同嘅方式影車飛，玩到無嘢好玩。

12:44就到達熊本嘞，真係想喺架車度坐耐啲呀！

先放低行李，又住番商務酒店嘞：Toyoko Inn。

東橫Inn喺日本有好多分店，相信好多人都住過啦！
偵錢OK，每人每晚大約$320左右，勝在設施夠細心。

呢間特色係熊本熊，佢教我哋點插鎖匙噃！

呢個Cam係招募會員果時用嚟影會員證相片嘅。

房間小小，但係應該有嘅都會有。

酒店用盡空間，呢啲書令酒店顯得有啲文化氣息，攞分！

安置好行李，行返出去熊本站，搞搞啲車飛先。

為免嘥時間買飛，雖然未必好抵但係都買咗1 Day Pass，500円。

我哋今日會搭路面電車遊熊本，呢架車好靚呀！

搭到「水道町」落車，因為要去一趟辦公室。

呢個唔係一般嘅辦公室，而係「熊本部長辦公室」。

咦！今日有嚟返工喎，仲好精神添！

入到熊本，所有產品都有佢，熊~熊~熊~熊~熊......！

最頂癮係呢個面膜，最好送俾你個敵人，哈哈......

大家探完熊，就諗住去上通搵吓食，話晒今朝大家都係食麵包咋！

呢度好難搵食，最後居然食香港都有嘅連鎖咖哩店！

食完飯又自由活動〈shopping〉一陣，再去藥房掃貨，

我哋就向熊本城出發嘞！其實起程時已經係黃昏啦！

夏天嘅熊本係好遲天黑嘅，以為五點幾入場好遲，但天仲光，

而且遲嚟有好處，因為入場有大特價。

三大名城，我去第二個，嚟打打咭先！希望下次去埋姬路城！

影張到此一遊紀念照啦！一、二、三，笑！

返酒店放低戰利品，大家都無乜力量，

於是喺酒店大堂hea咗一輪至出門口，咪誤事囉！

點解？稍後分解！

我哋終於決定去激安の殿堂買手信，

然後又食晚餐......定食。

放低大家一陣啫，就生出以下幾袋嘞，

仲有幾日，咁買法，點算呀？朋友！

最大件事係，買完食完，路面電車已經收工，
咁，我哋唯有又再搭的士囉！哈哈......

熊本，都未係好深入了解你，或者下次再嚟，

我會再探索一下除咗shopping以外仲有乜嘢好玩嘅嘢！