九州の夏2014第六天〈豪斯登堡篇〉

九州の夏2014第六天〈豪斯登堡篇〉

7月23日〈星期三〉

今日開始入正題嘞！食個營養早餐，開始鐵道之旅囉！

今日要搭8:34嘅ＪＲ特急ハウステンボス3号去豪斯登堡，

用Pass可以坐指定席，張飛原價要3360円架！

車到嘞！豪斯登堡號紅噹噹好醒神架！

10:19就到達嘞，仲諗住坐車果時可以補眠一下，

但係成班嘩鬼一齊，又點可能可以休息呢！

呢個車站好靚，大家淨係喺道都影咗唔少相。

由呢道直行入去就係入口嘞！旁邊呢間係其中一間樂園酒店。

近年都無乜恆心收集印仔，但係呢個又幾靚喎！

我哋book咗樂園園區外嘅酒店，都可以喺入口先寄存行李，

到check in前就會幫我哋send去酒店，唔駛自己拎！

門票分套票6100円同散策3600円，即係全包定齋行，

由於近年對樂園設施已無乜特別興趣，而且又想慳錢，

所以我哋決定買3張套票3張散策，唔想玩嘅朋友可以用散策，

如果有非常值得玩嘅園區，就分兩組用套票入，好聰明啊！

1998年嚟過一次，印象中呢道好多鬱金香同風車。

一入大門口就有一間相當吸引嘅建築物，一於入去睇吓啦！

原來係Teddy Bear博物館，可惜我唔係Fans吖！

其實都唔係隻隻都咁靚架，都有啲係凶神惡剎歪口歪面架！

喺充滿熊嘅世界入面，我反而鐘意佢！

望吓呢邊笑吓啦，用大光圈餅鏡，影得你幾靚仔架！

一家大細人齊嘞，不過......可以坐好啲嗎？

佢哋係泰廸熊之母，好叻呀，如果可以收版權就發嘞！

行返出嚟後天氣又好番啲噃！

遠遠見到一大片向日葵，我已經第一個飛奔過去啦！

呢道比較人工啲，唔夠北海道果啲咁自然。

共通點係：大家都引嚟好多小蜜蜂，所以人類係難以埋身嘅！

然後繼續四圍逛逛，四圍都靜英英嘅！

話咁快又到中午嘞，開飯嘞喂！

繼續遊園，有團友去Trick Art Museum，有團友去玩鬼屋...... 

行多兩行，覺得唔係幾對路，咁攪法，點行到黃昏呀？

雖然四圍都好靚，但係咁行法......會攰架！

於是，我做咗一件十幾日行程中最開心嘅一件事：租單車。

等我用單車帶大家睇吓呢道啦！

玩到黃昏，我哋決定豪一豪佢，唔食定食啦！去食buffet！

入夜亮燈後嘅豪斯登堡，又有另一種美態。

行到見到千陽號，對面就係我哋今晚要住嘅酒店嘞！

雖然已經喺園區外，但呢間已經係咁多晚以嚟最貴嘅一間嘞！

房間利用暖色調照明同仿古木製傢具，營造出歐陸嘅氣氛。

浴室外仲有一個小小化妝間，夠晒氣派！

有浴缸，唔係細細個果種，係標準尺寸嘅。

沐浴同洗頭用品都係好嘢！

十幾年前嚟過，果時豪斯登堡係主要景點，
今次因為團友都未嚟過，所以咪要到此一遊囉，
事隔多年，見到啲嘢多數都無改，明顯有舊咗，
可能係自己年紀大咗，覺得裏面嘅設施真係唔係幾吸引，
園區裏面到處都係日文，差不多全無英文翻譯，
訂酒店時覺得感覺更加麻麻，好似唔想做外國人生意咁，
喺中英網站全數顯示無房，
但係入日文網站就有好多不同優異方案，
最後我只好喺日本網站訂房囉！
所以，朋友都話，應該無下次lu！