九州の夏2014第十二天〈回程篇〉
七月二十九日〈星期二〉
今次我哋喺九州係用放射式嘅旅遊方式，
即係以博多為基地，頭、中、尾都租住同一間酒店方便寄存行李，
中間去其他地方玩小住一晚，孭個背囊或者拉個細喼就得嘞！
話時話，住咗呢道三次，原來都無介紹過佢：Hotel Sunline Fukuoka。
一間商務酒店，第一晚入住時房間空間超大〈仲有按摩椅〉，
雖然都係同一途徑訂，但係第二次啲房就細好多，
價錢合理，平均每人每晚$330左右，
價錢合理，平均每人每晚$330左右，
工作人員都幾好，有時會有識講中文 / 流利英文嘅staff，
離JR站大約10分鐘路程，唔趕時間的話可以接受。
都話最憎編最後一日行程架啦！又唔去得遠，
咁同朋友分頭行之後，我又心思思再上嚟睇吓鐵道神社囉！
今日咁早上嚟，啲舖頭都有開嘞，火車仔都有小朋友幫襯添！
另一邊有個corner有班媽媽帶小朋友嚟戲水，似乎好好玩噃！
最得意係點解見佢哋個個都喺道餵小朋友食西瓜嘅？
原來係商場提供架，我喺外圍影吓相啫，
都有個年青人拎盆西瓜過嚟請我食，呢啲就係待客之道囉！
好想試試牛腸鍋呀，不過今次唔夠時間嘞！
踏住同一系列嘅波鞋，出發回程嘞！
今次唔搭地鐵因為大家太多行李唔想上落太多電梯，
所以改搭巴士，一樣咁方便啫。
睇啱路線，就喺個門前面排好隊等車啦！
話咁快就到達福岡空港嘞！
今次我哋自己三個人，無人送機，機場又無嘢行，唯有等啦！
食個午餐先，應該係短期內最後一次食定食啦！
真係要俾個「叻」自己呀！回程行李居然係19.8kg喎！
等上機期間，再買多兩樣野嘢係我覺得幾好食嘅：
東京Banana同埋紅豆味KitKat。
話咁快，12日之旅就完結嘞！每次旅程，都有一啲我期望嘅嘢，
好似今次咁，我期望京都間Tsumugi Inn同埋九州各式各樣嘅火車，
佢哋果然無令我失望！
每次旅程，又一定會留下一條尾巴，係我下次再嚟嘅原因，
應該係湯布院，下次一定會再嚟，
呀！仲有今次無去過嘅鹿兒島呢！
仲有仲有，我仲想試吓牛腸鍋同埋食好多好多桃呀，
總之，九州，可以再嚟一次！
