2016年3月31日
今日離開礁溪向羅東進發。
瞓醒向窗外睇吓，見到對面有一間溫泉旅館居然有滑水梯喎！
酒店早餐嘅地方，佈置簡簡單單。
自助形式，選擇都幾多啦！
呢啲就係在下份早餐嘞。
食完早餐寄存行李去附近行吓先，樓下就有靚靚影相位啦！
行去路口，有簡單嘅指示路牌，跟住行就得嘞！
先去辣椒文創館，賣嘢都要有啅頭，好似呢道咁，
加多啲冷知識，啲客都買得開心啲啦！
呢度有大量辣椒產品，我都買咗支好辣嘅辣椒油俾同事食架！
再加埋到處都有呢啲影相位，都吸引唔少遊客架！
行多幾步就係湯圍溝溫泉公園嘞！
可以玩吓溫泉魚體驗館，俾魚仔咬吓腳皮，不過我就唔敢嘞！
如果怕魚仔，又可以免費浸吓腳。
四圍都見到呢啲溫泉蕃茄，形狀係好特別嘅。
之後行咗去礁溪溫泉公園，裏面有個森林風呂。
朋友們都唔想入去，所以只可到此一遊囉，
下面係入場費，聞說2016年11月起已經由宜蘭縣政府收番，
所以票價已經唔同咗，變咗80台幣就可以入場嘞！
呢度分男湯女湯，而家一個價錢可以入去任浸。
礁溪溫泉公園都有好多足浴嘅地方架。
返去食個超平價午餐先，然後返去酒店拎行李同礁溪講拜拜嘞！
今日住晨露莊，去到羅東火車站打電話俾莊主，
佢哋會有車嚟接我哋架啦！
民宿外形係咪幾靚呢？網上評價好高架！
門口有個休憩區，不過都無坐過，一來唔夠時間，二來太多蚊滋嘞！
其實環境都真係唔錯嘅，如果無蚊滋都想喺度食吓下午茶架。
大廳係公用地方，由於屋主庒爸庒媽一家人都係住喺度，
所以公用地方嘅陳設都好生活化，好有家嘅感覺。
另一邊有個小偏廳，坐喺小板櫈上茗吓茶都應該幾寫意喎！
多數民宿都會有留言冊，呢度居然已經留到第18本喎！勁呀！
上到二樓，喺公眾地方都有啲寧靜嘅小角落。
經過其他房，參觀吓先，原來呢間係子母床，小朋友最Like啦！
另一間係雙人床房間，佈置好溫馨好舒適。
好多細緻位都令人好窩心架！一行去床頭已經有受歡迎嘅感覺嘞！
呢間房可以住5個人，呢邊有兩張雙人床，另一邊仲有兒童床。
床尾係一個客廳，勁舒適，坐落去就唔想走嚕。
民宿同樣提供奶茶咖啡，而且啲杯同匙羹都好鬼靚。
閂埋個閘，成個小天地就係屬於我哋架嘞！
安頓好，想出去玩玩，嘩，外面有咁靚嘅田野風光噃！
民宿後院有大量單車，免費借用，咁我哋一於：
大眾踩單車郊野上，良朋共享身心舒暢......
沿途風景好靚，可惜蚊患都好嚴重吓，
有啲位我直情想用洗衣袋笠住個頭呀！
返到民宿後，庒哥好熱情問我哋想去邊，知我哋想去夜市，
就拎出手繪地圖，話我哋知有邊檔係必食，然後又幫我哋叫的士，
去到羅東夜市，我估已經係羅東最熱鬧嘅地方嘞，
唔信？睇吓連病人推住鹽水袋都要嚟食喎！
第一站去食蔥油缾，都係庒哥推介，真係堅好食喎！
好食到我哋行完食完夜市一轉，最後再返轉頭外帶返民宿架！
之後去食花生卷冰淇淋，我鐘意食花生製品，所以都俾個Good佢。
用潤餅包住雪糕球再加上花生糖碎同香菜，係一個特別嘅組合。
跟住食我最鐘意嘅杏鹽酥鮑菇。
雖然好熱氣，但係好好味！
沒有留言:
張貼留言