2016一人成行初體驗新春大吉沖繩團〈三〉

2016年2月13日

第三天：從未試過如此放任嘅行程，
今朝瞓到10點至起床呢！可惜尋日收到通知，
今日天氣變壞，賞鯨要取消lu！

落街行吓，咁嘅天氣，點會係壞呀！

於是再死心不息聯絡Seasir，

希望可以去賞鯨啦！

等候期間，喺Mosburger食個brunch先，

我決定到12:00再唔覆我，我就另外搵嘢玩㗎嘞！

終於，11:55收到Email啦！可以如期出發lu！

12:55，Seasir架車準時去住處接我。

出發前，雄心壯志咁款。

現實啲，去碼頭旁個Office度俾埋錢先。

每年1至4月，係賞鯨嘅季節，夏天嚟就無得睇嘞！

先聽咗啲重要資訉先，

帶隊呢位係香港人嚟㗎，有咩唔明隨便問！

呢班洋人都搞笑，開開心心出船後突然掉頭取消活動。

今日個天咁靚，點可以淨係去行街㗎！

不過其實都好大浪吓，好彩食定暈浪丸。

拋咗成粒鐘，喺我成身標曬汗之際，架船停定咗，

全船人靜曬四圍望，只聽到有個女仔：「嘩！利害(日文)」

然後大家就起哄。五分鐘後，回程。

講真我乜都睇唔到，就落船嘞！好彩無嘔，唔係早餐都蝕埋。

返房放低相機先，咦！同房check out咗喎！

搵食啦！見到定食嘞，覺得好有安全感，

呢度無乜定食㗎，唔係沖繩料理就係燒肉或者石垣牛。

為咗彌補我睇唔到鯨魚嘅創傷，我要食好啲。