2016年3月29日
今日會喺台北活動，去一啲熟口熟面嘅地方。
酒店早餐，係半自助嘅，隔日會中西式對調，還算OK。
之後就上貓空，點知今日勁多人，都要排咗一陣。
本來想上去茗茶，但係時間唔啱，唯有下次啦！
今日只可以四圍逛逛，影影相，因為趕時間要走嚕。
因為今日中午約咗時間去KT火鍋店食晏嘛。
幾經轉折講到牙血都出至訂到位，點都要嚟啦！
今日下午食大啲：我哋打邊爐！勁喱！
入去要先喺門口等等，由入門口開始就已經到處KT嘞！
等待期間可以放吓血先囉。
利申：我唔係KT粉絲，不過我都覺得裝修好有心思。
好多細緻位都見到KT架！
坐呢道應該幾舒服，起碼對腳可以伸直啲。
我哋就坐埋邊嘅假疊疊米，屈住個肚都有啲啲辛苦。
餐牌好大個，但係唔駛擔心選擇困難噃。
因為選擇唔多，就係一般A餐B餐C餐果啲，啱晒我呀！
好快就決定好點餐嘞！坐定定擺好餐具等食囉！
主菜未到之前，先上醬料。
一人一個鴛鴦鍋，可以自選湯底，個木蓋好靚呀！
個侍應幫我哋每人落咗兩個KT頭入湯度，佢話係骨膠原喎！
嘩！上「菜」嘞！份量都幾多架！
肉類可以選擇豬或牛，我梗係揀牛啦！
未水滾時，食個燉蛋頂住吓先。
齊腳啦！我唔客氣嘞！
食完去行吓街街，去line friend store睇睇先。
要買手信俾大姪女，一於用whatsapp一齊揀揀啦！
點解佢會咁鍾意呢幾個公仔呢？真係有代溝囉！
跟住又去探KT？同佢有親咩？呢道係邊度？
好似好多嘢食咁喎，無錯，呢度就係淡水嘞！
不過今日冷冷濕濕，街上無乜人，檔口都唔多旺。
終於行吓買吓就返酒店嘞！不過其實夜晚無食嘢，
所以買咗啲嘢食返酒店開餐，梗係唔少得我最愛嘅鹽水雞啦！
沒有留言:
張貼留言