2016年3月30日
今日要轉酒店，因為會由今日起展開三日兩夜宜蘭之旅啦！
去台灣咁多次，都未去過宜蘭，終於今次成行嘞！
是日酒店早餐，轉咗西式。
其實酒店轉角就係咖啡弄，不過呢幾日都無時間去試。
食完早餐拎住簡單行李，就去台北轉運站搭客運去礁溪，
我好鐘意坐客運，又舒服又平仲有wifi添。
喺車道瞓一覺就到嘞！落車行幾步就到酒店捷絲旅啦！
大堂好舒適，啲梳化好好坐，仲有免費茶點提供添。
Check in完放低行李，預備出發去玩啦！
行幾分鐘就到達礁溪車站，成個礁溪都好寧靜，無咩人。
搭一個站就到，Check啱班次時間，咁就唔駛等好耐啦！
目的地係：宜蘭，一出閘已見到個車站好得意呀！
沿路有好多人擺賣呢啲藝術品。
仲有呢啲手工鉛筆，真係幾靚架。
去到幾米公園！呢度好有人氣喎，咁先似去旅行架嘛！
向左走？咪咁匆匆忙忙住，一齊影張相先啦！
你又向右走？留意吓係身後面啦！
拎唔起個背包喎！好重好重！
一齊排吓隊喺宜蘭等車啦！
次後去買張名信片寄番香港先。
然後行前少少就係丟丟噹噹森林喇！
主要都係同呢列火車合個照啦！咁今日主要景點就完結嘞，
講真都係幾米先嚟呢道啫，計埋影相都唔駛30分鐘就玩完嚕。
呢道都好難搵食，跟住旅遊書介紹，
但係好多舖頭都唔憂做，好幾間都閂咗門，
終於喺路邊搵到一間酒家，但係佢哋已經預備關門休息，
就叫我哋快快趣趣叫嘢食做埋我哋呢單咋。
叫咗三個餸，都唔錯，
而且老板娘好好人，問吓我哋想去邊，仲幫我哋叫的士添。
其實我係無咩idea要去邊嘅，我只知道宜蘭有幾米公園咋，
咁旅遊書話有個地方係橘之鄉，咁咪即管去吓囉。
其中一棟門口最多人入，我哋就由呢道開始啦！
門口有飲品提供，飲咗中意可以喺入面買架。
門口有隻好可愛嘅狗，而佢都有一個好可愛嘅主人。
入面有好多嘢賣，我哋都有喺求消費吓！
對面另一棟，個門閂實咗，我哋推門一睇，好靚呀！
呢度有手作蜜餞工作坊，朋友好鐘意所以參加咗。
一份一份材料已經預備好嘞，參加者預備好未呀？
趁住未有人到之前，扮嘢影張相先。
呢樽就係整好咗嘅蜜餞嘞！
咁俾NT150嘅朋友，就梗係無咁大樽啦！
玩完工作坊，就去對面睇吓個工場。
離開橘之鄉，附近仲有其他景點嘅，好似呢條山寨村咁啦！
我以為會好似妖怪村咁，點知唔係，就只係裝修特別啲啫。
之後就call的士返去嚕，返去酒店hea吓先，
礁溪酒店嘅重點梗係浸溫泉啦！
房裏面有私浴，不過今晚落樓下大眾浴場先浸啦。
我哋三人一房，有兩張雙人床。
茶水間設計幾特別喎！
樓下有個特別室，係一個教室嘅佈置。
裏面有好多懷舊玩具，都幾得意架！
我哋都喺道玩咗一輪影相架。
之後酒店就幫我哋叫的士去食飯囉！
又係旅遊書同盧覓雪介紹囉，所以去食甕窰雞。
話說呢間係最旺最出名架，啲雞就係喺個窰裏面烤熟架嘞！
有名聲，不過全無服務，所有嘢都自助，出去睇餐牌買嘢食啦！
有啲蔬菜我都未見過架。
三個人，最多只可叫三個餸啫，都唔錯嘅，
呢個係隻雞未分屍之前，餐廳提供手套，自己動手啦！
朋友好努力將佢分好屍，可以起筷嘞！
宜蘭最出名三星蔥，點都要叫啦！
但係其實我麻麻哋鐘意食蔥，食完之後，都係無改觀。
沒有留言:
張貼留言