2016一人成行初體驗新春大吉沖繩團〈一〉

2016年2月11日

Gin's Tour 新嘗試嘅：

「鬼鬼鼠鼠膽粗粗一人成行初體驗新春大吉團」

今日終於如期出發嘞！

其實想試吓自己一個人出遊好耐嘞，

搞過幾次但係都失敗，

因為最後都會有朋友話想join，

所以又變成二人行、三人行、四人行......

今年1月初，突然心️血來潮合指一算

決定 - 「就係呢個假期嘞！」

於是乜都未check未plan就訂咗張機票嘞！

仲要去一個自己無咩概念嘅地方添，

總之……訂咗先算啦！

呢幾個禮拜不斷有朋友問我過年去邊度玩，
我都死忍住唔講️，話就話唔想有人叫我做代購啫，

其實講真係怕自己信心動搖或者聽太多意見或者要解釋太多
或者見到朋友露出詫異嘅眼光......

朋友們，下次同下次同再下次我都會繼續出團架️，

只係今次撇甩大家一次咁多啦！

食個早餐之後就登機啦！

今次去新嘅登機閘口，地勤話過去要成30分鐘，一定係講多啦！

我由1號閘口出發慢慢盪過去都係12分鐘之嘛。 

 其實我都幾鐘意搭港航架，啲位都算闊。

 可惜無傳統餐，咁食個飽，睇套戲，好快就到架嘞！

不過我呢程機都幾災難吓，

首先，坐我後面係一家三口，個BB得幾個月大，

係咪已經想死呢？佢哋全程郁嚟郁去踢我張櫈⋯⋯

坐我前面個呀Dee一開餐就成杯汽水倒落地下，

而我個袋就放喺前面張櫈下面⋯⋯

話咁快就到啦！ 

由於唔趕，慢慢行認識吓機場先，仲喺度拎咗好多資料添。

 如果喺香港無買上網咭，呢度都有得㩒。

 不過貴一倍之嘛！3000円得1GB咋，記得去鴨記買定先嘞！

 雖然機場細細，但係一個魚缸就突顯呢度嘅特色啦！

 由國際線行去國內線搭Monarail出市區，車頭係景觀位嚟架。

 呢幾晚住Grace Naha，好平，4500円住三晚，

不過，中年人住青年旅舍，真係笑大人個口呀！

呢道都好安全好企理，不過就無個人Locker，

有咩都係掛喺自己床邊，就算去沖涼都要帶住貴重物品，

可能唔係旺季，同房只有一人個日本年青人，

所以可以自己任揀床位，我梗係揀樓下啦，起碼有位放喼嘛。

 安頓好去行吓食吓先，呢個鯛魚燒勁多人排，我又排吓先。

 呢個沖繩菜園放題好似好抵食，不過一個人入去怪怪哋嘅。

 獨遊客，都係食番啲面壁思過餐把啦！

 呢pat嘢，高人指點，話係淮山喎！

 睇吓佢「杰撻撻」又「滑San san」，真係好難接受呀！

 話說要用嚟撈飯食喎！

 飯後梗要行吓便利店啦，嘩！Royce綠茶雪條呀！

 Haagen Dazs期間限定雪糕呀！可惜咳梗，無福消受啦！

 都係去行吓國際通先啦！

日本，真係乜都有限定㗎，百力滋有⋯⋯ 

 Kit Kat都有⋯⋯

上次去大阪招兵買馬，點知就差大雄無貨，

好開心今晚搵到佢，終於一家齊齊整整過新年囉！ 

聽講呢間係勁嘢嚟，喺國際通已經有幾間分店！ 

 全部都係賣鹽同埋鹽嘅製成品，門口仲有賣鹽雪糕添！

 偷影中，呢道鹽都有百幾種。

 行藥房時間，見到傳說中嘅「凍死曱甴剎蟲水」，勁呀！

 呢邊仲勁多搞怪Mask，好我意呀！

 古裝同喪屍都幾搞笑，純玩就OK，唔知有無功能啦！

 呢幾款又如何？買嚟玩遊戲做大懲罰都好喎！

 行夠買夠就返房嘞！第一日就有收穫啦！仲要即刻食添呀！