2016一人成行初體驗新春大吉沖繩團〈五〉

2016年2月15日

第五日，報告。
今日取消美國村行程，可以再hea啲，
其實都係因為感到個感冒開始發出嚟嘞！
都係咪咁自信，一個人都係留喺民宿附近安全啲。

今朝瞓到九點自然醒，係自然痛醒，
事緣腰肩痛已個多月，今朝勁痛，
咁一於落樓下買嘢貼啦！報告：今日天氣又凍又大風⋯⋯

話時話真係要格吓價，國際通同超市賣500，呢度賣350咋。

之後去Tokyu hands，點知越行赿暈，又想嘔，
正所謂過到初一過唔到十五，個感冒要發出嚟嘞！
拿拿聲喺洗手間門口張梳化休息一陣先，
多謝好友一直越洋同我whatapp吹住水，
令我保持清醒唔駛客死異鄉。

再坐落去都唔係辦法，而家我有兩個選擇，一係返去民宿瞓，
一係食完嘢先再決定。咁我見有blogger話呢間壽司店好掂，
咁捱埋去啦！唔知係咪假期完咗呢？無乜人咋喎！

佢個迴轉帶好得意，上層轉壽司，
下層轉唔同款嘅杯呀、豉油碟呀⋯⋯
客人可以自己揀款，而對間舖嚟講都好方便，
就算打爛杯碟都無所謂，是但買番咩款都得啦。

喺無乜力量嘅情況下，求其揀咗個定食，
味道一般啦！跟手即刻啪包藥。
可能食咗嘢加食咗藥，精神啲決定繼續行街街。

呢區有好大間Daiso、無印、Best、玩具反斗城、Uniqlo......
其實都幾好行嘅。

又有24小時Cafe，半夜都可以嚟食嘢架。

其實呢區最出名嘅地標係DFS，
不過呢啲及點會係我哋呢啲平民啱入嘅地方嚟呢？

買張Rui Rail one day pass，one day係24小時計，
咁就可以用埋嚟聽日出機場，咁就抵番晒啦！
忽然好掛住國際通果種遊客區嘅氣氛添，一於落去索吓啦！
首先行吓卡樂B專門店先。

附近好多體驗教室，可以做米餅啦⋯⋯

可以將自己張相印喺森永食品盒上面啦⋯⋯

入去平和通之後，仲有仲有......

仲有好多好多其他體驗⋯⋯

例如可以造隻Shinsa電話座啦⋯⋯

可以做海洋生物圖案印染啦......等等，啱晒親子遊。

其實我個目的地係呢度：花笠食堂。

喺後街嘅一間小舖，但都幾多人幫趁喎！

真正家庭料理，我就好鐘意嘞！

店面無乜裝修好傳統，都係由一班大嬸同兩個婆婆打理。
為免人多，今晚提早六點就食完飯，
之後再去驚安之殿堂感受吓旅遊氣氛先。
行到八點幾買齊嘢就返去lu！

返到去諗起聽朝一早就走，唔記得買麵包添！
由民宿行去Main Plaza或者便利店要成10分鐘㗎噃！
頂硬上啦！好彩終於都見到我至like嘅包包啫。

咁鐘意食，不如自己買架機整啦笨！

俾錢之際，俾我眼尾哨到靴下屋喎，
帶得3000円出嚟，一於買盡佢！

臨離開商場見到Mister Donut，呢期嘅禮物好靚吓喎！

幾靚都好，我又點可能食7個donut呢？

好啦！沖繩之旅報告到此為止，
而家要諗辦法將呢啲嘢同埋對Crocs拖鞋放入個21吋喼度呀！