2016一人成行初體驗新春大吉沖繩團〈四〉

2016年2月14日

第四日，用盡雙腳嘅一日。

今早check out轉場，九點幾就出門口嘞！

決定今日除咗靠雙腳，就係靠Google map嘞！

不過我發現佢成日都老點我嘅

Google map叫我經過好多民居，

行咗25分鐘，終於嚟到第一站嘞！

呢個神社好特別，起喺懸崖上，下面係海灘，

值得一嚟，而且有人話手信要御守吖嘛，我咪嚟囉。

一場嚟到沖繩海灘，落吓水先。

第二站，又行咗四十分鐘，係嚟參加漫湖公園櫻花祭。

都有盛開中嘅。

但係唔算密，我諗品種都係問題。

不過會場熱閙已經值回票價啦！

道路兩旁好多小食賣。

呢檔最有睇頭，個妹妹堅係識煎㗎！

大家早有準備，不過坐定定又唔似賞櫻喎！

係坐響櫻花樹下欣賞傳統舞蹈呀！

一場嚟到，我準備好㗎！

賞完櫻就行過去奧武山公園，見識吓沖繩嘅滑梯。

呢個唔係主題公園，個滑梯已經咁得睇，好嘢！

小朋友都好獨立，好嘢！

見識完就落去牧志駅，途經鹽屋，今次一定要食🍦啦！

可以自選加咩嘢味道嘅鹽，我隨咗辣召外，全部試勻。

其實目的地係呢度：那霸市第一牧志公設市場。

最鐘意就係行超市同行街市架啦！

已經兩點幾，仲有好多人嚟食飯，應該好好味嘞！

街市買嘢係平啲㗎！

沖繩喎，梗係要食番串菠蘿啦！

玩完返去拎行李途中，發現咗佢喎！

可以入去同🐱🐱一齊玩，一齊飲咖啡㗎！

齋飲唔玩都得！不過今日我齋睇咋！

轉場，跟住兩晚住呢度。

都幾高尚喱！

每次book民宿交🔑嘅方法都好特別，

今次仲搞笑，要去停車場架單車旁開盒仔。

我嘅至愛，洗衣機💕⋯⋯

有廚房，不過今次無用過。

兩張床，可以一張放行李，好方便。

小餐枱，小電視，日式部屋feel。

最鍾意日本民宿會提供埋Wifi蛋嘞！

仲有個小露台可以晾衫架！

入廟拜神，入屋梗係⋯⋯洗衫啦！

嘩！呢個真啱駛，呢兩日邊度都唔駛去啦！

呢度多商場同購物點，行過去連環三個supermarket，

越行得遠越平，終於又買埋一大堆⋯⋯

呢邊天氣真真變幻莫測，連日本天文台都信唔過，

嚟之前日日都顯示落雨，但其實只係試過一兩次微雨，

第一日氣溫只係熱香港少少，除低件外套就得，

之後兩日又熱熱哋喎，一件T就OK，

其實日間天氣好舒服，時時維持住一個唔潮濕嘅春天，

點知頭先買完嘢就落雨，加上呢度時時都好大風，

即刻要拎番件䄛出嚟著⋯⋯！

又凍又攰，拿拿聲食個面壁思過餐就返去lu，

聽日本來諗住去美國村，但係覺得宅吓都好喎！