開年日 @ 瀧野鈴蘭丘菱公園 → 狸小路

今日大家興致勃勃，一早起身預備好行裝，諗住搭8:30開出嘅『旭山動物園號』去旭川，

點知，落到去橫風橫雪，去到JR站見到人頭湧湧，姑姐都心知不妙，於日拿拿聲去收吓風，

原來因為大風雪，朝早7點起就停咗旭川方向嘅JR列車。



咁究竟等落去定退飛呢？D職員話唔敢肯定開唔開，叫我等吓，

其他路過嘅香港人就話叫我退飛，然後又有D台灣人經過好無助咁問我嘢，

最後，我決定唔再等嘞！不如去咗第二個地方玩先啦！

我將呢個消息宣佈俾團友聽，佢哋都好失望，好唔開心咁跟我搭地鐵。

由於聽日小樽已經買咗Welcome pass，無得改，

我決定先去『瀧野鈴蘭丘菱公園』玩雪，

搭地鐵去到真駒內站，等轉102號巴士，

等候期間，兩個失望嘅小朋友就喺度寫日記，記低呢一刻嘅心情。

唔識日文，睇唔明呢度d巴士行車時間表，見到102號就上啦！

點知原來呢架102係唔去丘菱公園架，好彩司機叔叔好好人，

幫我哋聯絡下一班車，叫我哋喺度等15分鐘，車錢就俾下一班車就得嘞！

要落車等，兩隻嘢仲開心，等候期間，不停玩雪。

成個坐落d雪度，呢個動作恨咗好耐啦！

兩隻嘢一定係想死啦！將d雪向住我個鏡頭掟。

分秒不差，巴士嚟嘞！車上只有一個公公同一個婆婆，兩個人帶住滑雪用具。

去到公園，人影都無隻，我哋就跟住公公婆婆尾，婆婆睇得出呢四隻冒頭烏蠅唔識路，

於是就指示我哋大門嘅方向，嘩！個門口好靚呀！







自己喺大門口影張相先啦！姑姐要去check吓D巴士時間表呀。

D雪幾厚幾靚，真係好似睇緊戲咁呀。

呢度係大門售票員，不過冬天係免費入場，真係好抵玩！

一入到去見到有班小朋友喺度學緊滑雪，全部細細個好叻呀！







背後就係滑雪嘅地方嘞，好......高架。

戲王之王，有幾驚呀？

搵咗一輪，終於見到輪胎雪撬滑雪嘅位置嘞！

初初諾怡好緊張，叫我同佢一齊玩一個車軚。

去到山腳位，個職員會叫你坐低，原來係唔駛自己拉個車軚上去架，

只需要坐定定就有條鋼纜拉你上去，好方便喎，不過地面D雪唔平，會"銀"到個pat pat啫。





只要衝破心理關口，諾怡都唔驚lu！





嘉頤個膽大過沙煲，唔叫都自己走上去玩啦！

仲要招招積積添！






我哋3個都玩得好開心，重覆又重覆，總共玩咗6次呀，

如果唔係表姨媽話停，我哋肯定會無王管係咁玩落去，緊係啦！唔駛錢喎！






玩咗頭兩次之後，我覺得應該要先暖一暖先，見到前而有幾個門，應該係暖身嘅好地方，

我喺前面一開門，望到入面都O咗咀，係一個好吸引嘅室內遊樂場：彩虹的巢Ｄａｕｍ

小朋友入到嚟，忍唔住又玩咗半個鐘，大人就喺旁邊嘅休息室坐吓，

知唔知點解有咁多小朋友？都唔係公眾假期，

其實佢哋係幼稚園學生，由老師帶佢哋嚟玩架，

喺日本做幼稚園老師真係勁，要帶小朋友去雪山，我見小朋友自理能力好高，

如果喺香港，淨係著衫呢個技能，好多小學生都唔識。

玩咗一輪室內，又要出嚟舒展吓筋⻣先。

其實嘉頤都幾有運動細胞架，而且又夠大膽。

玩咗四次，又要佢哋地室內抖抖先，俾D散紙叫佢哋地買嘢暖吓胃先。

係我最愛嘅粟米湯呀！大家飲過後都讚不絕口。

回程嘞！沿途再影吓D雪景先。

喺五日行程裏面，兩個都話最鐘意就係呢個公園。

都唔算好凍，只係-6.9度啫。

等車期間，都唔放過玩雪，明白嘅，如果我係小朋友我都會係咁。

返到狸小路，首先搵嘢食先，呢間餐廳D嘢幾好食，而且又唔算貴，大家都食得好滿足。

嘉頤又食吉列嘞！熱氣，但係佢鐘意。

諾怡極鐘意呢個蛋包飯，食到一粒都無剩。

我哋由狸小路1行到狸小路6，呢兩個小朋友都算合作嘞。






去激安之殿堂，諗住入番D食物，呢度一枝大蔬菜汁比便利店細盒裝仲要平，

兩個百厭星又搞搞震，咁又玩一輪。




 

佢哋咁肯行，因為兩個要買手信比朋友吖嘛！

終於佢哋買咗一箱嘢，好彩呢度免稅再九折，慳番少少！

行到好攰，表姨媽話想食甜品，大家都舉手讚成！

點都要喺電視塔前面影留張相先，影完仲有排行呀！

搭一個地鐵站都要200円，我哋都寧願行，反正而家大通同札幌地下街都開通咗。

行到腳抽筋，佢兩隻嘢又踩背又腳底按摩，姑姐真係老懷安慰。

下午果餐太飽嘞！夜晚決定食杯麵。

無呃團費架！佢哋食得好開心架！