大年初一零晨 @ 機場 → 札幌 → 白之戀人

1月22日〈年廿九〉，

食完飯，一齊睇吓電視之後，

11:30，出門口同呀敏會合lu，

出發前，睇吓我哋嘅彈藥先......

何止d細蚊仔緊張呀，我仲緊張架！

責任重大喎，又怕佢哋凍親、跌倒、肚餓、行到攰......

12:30左右去到機場，已經可以開始CHECK IN，其實CHECK IN完都無乜好做，

因為d舖頭都已經閂晒門，唯有早d入去啦！

今次好近，係2號閘口，行一陣就到，

而家先至1點幾，仲有2個幾鐘先登機，影張相記得個時間先啦！

兩個初初冷正經，睇書喎......都唔知有無倒轉拎架！

咪睇而家個機場咁多人呀，後面d團友係搭CX嘅，一陣間就上晒機架嘞！






睇吓！烏蠅都無隻~~~~~~

鏡頭一轉，兩隻馬騮就變咗兩隻死豬嘞！

小朋友，跟我去旅行要瞓機場架，問你哋仲敢唔敢？

我哋搭好耐無搭過嘅Jal，好心急呀！快D登機啦！

上到機，再瞓！ZZZ......ZZZ......連飛機餐到咗都唔知。

兒童餐個樣都幾好，最鐘意佢架飛機，好warm。

叫醒諾怡睇睇個餐，佢驚喜到O咗咀！

稍為清醒D，即刻擺好post影相！

小朋友禮物係手工紙，由於係新年，每人都有一封小利是，裏面有朱古力同八達通套。

朝早9點幾，見到雪啦！降落啦！

Jal D空姐好好，當行李運送到輸送帶時，會有3個空姐協助，

其中一個仲成個人跪埋上去行李輸送帶出口，接住D行李慢慢放落行李帶，

覺得佢哋好專重乘客D行李，很少見呢！

過關果時，我哋四個話係親戚要一齊過關，我就認呀敏做表姐，

於是，兩個小朋友就由呢一刻開始叫敏姨姨做『表姨媽』，又幾順耳喎！

今次過程好順利，可能人少，去到綠色窗口都無人排隊，好快買晒呢幾日嘅車飛，

上到JR自由席又即刻有位坐，兩個小朋友一見到雪景就成個醒晒。

The Best Western Hotel係老地方，唔駛頭昂昂四圍搵出口，話咁快就去到嘞！

行咗出地下街，而家係佢哋兩個真正第一次接觸到雪，好興奮呀！

放低行李，拿拿聲去白之戀人，諗住食番個蛋糕甜品buffet，細路仔實鐘意啦！

點知，而家限定必須要3日前預約，最後都係食唔到，大家決定改變計劃淨係影相。

嘉頤姐姐 @ 招牌位置。

諾怡發功 @ 同一招牌位置。

唔鬧交果陣時，兩個都心心相印嘅~~~~~~

都話要走架啦！完全借咗聾耳陳隻耳，繼續喺大門口再玩。

 

明明大家都好肚餓，但係有得玩就癲架嘞，

兩位小朋友嘅家長：唔好再問我佢哋聽唔聽話，自己睇啦！

行返去最近嘅宮之沢，是但入去一間餐廳食嘢，由於已經過咗食飯時間，無乜人，

平平哋，無乜驚喜，呢個係我嘅咖哩飯同生菜沙律。

諾怡嘅炒飯加餃子定食。

嘉頤嘅白飯加餃子定食。

表姨媽個餐好豐富，有飯又有麵。

呢D造型相都呃都吓人，其實諾怡根本就食唔晒要嘉頤姐姐幫手。

食飽飯去樓上超市入貨，買定D零食飲品同早餐，見到呢款幾特別：係杯飯。

奔波咗成日，都係時候返酒店嘞，

呢度四四正正，地點適中，又可以開少少窗有新鮮空氣，我鐘意！

安頓好D行李都已經6點幾，大大細細都好攰嘞，我叫佢哋一齊喺我間房眠一眠，

然後我一個人去火車站附近買便當返嚟，今晚食『和幸』炸豬排，

大家都好攰，食完都無影到相，要早D瞓嘞，聽日一早要去旭山動物園架。



今日大家都好滿足咁瞓覺，預備聽日去動物園，但係，世事難測......