赤口〈上〉 @ 開拓之村 → 拉麵共和國

今日又要趕兩場，早D起身去等巴士啦！

上午先去開拓之村，要去新札幌轉巴士，如果去新札幌，可以搭JR或地鐵，

計過度過，搭JR快D平D又近D，我哋選擇咗搭JR，

去到巴士站，等咗一陣就有車嘞！

前年我喺呢度摸門釘，今年查得清清楚楚至出發，門口好靚呀。

我又嚟嘞！今之一定要入場！

小朋友免費入場，大人門票分680円同1000円，有乜分別？好似話有得入館同無得入館喎！

一場嚟到，緊係要入館啦，但係後來發現，成條村都無人嘅，根本無需要買1000円嘅飛。

其實呢度都幾體貼，售票處就有儲物櫃，係免費嘅，大家可以輕輕鬆鬆慢慢行。

諾怡話呢度D雪好似蛋糕上面嘅忌廉咁白咁滑喎！

每一間屋仔都仿照一個古代建築物而起，呢度係古代嘅客棧。

以前嘅髮型屋，你個人入到去就會有聲音講嘢，嚇死諾怡。

跟住嚟呢個體驗學習棟蓋印仔，順便睇吓有乜嘢學。

呢度有工作坊，教大小朋友做D古代小玩意，當日有一對年老夫婦帶住孫仔嚟做雪橇。

我哋唔識日文，所以無本事參加，然後，我話想去睇吓以前D學校，所以就去北海中學嘞！

喺度大家玩咗好耐，個個都玩到好開心，嘉頤笑到收唔到聲。

真正返學時無得坐最後一行，而家補償番。

其實有好多館我哋都無入，一來太凍，行到對腳有少少麻痺，

二來入館多數要脫鞋，都幾麻煩，所以後來都係選擇性咁入。

出返大門口先發現，原來可以免費借雪鞋、草鞋、大褸、帽同毛毯，早知借對草鞋啦！

玩咗半日，又係時間走嘞，大家係唔會放過任何玩雪嘅機會架。

為咗俾多D時間大家休息，我決定直接搭巴士返札幌，時間只係用多20分鐘左右，

但係唔駛轉車走嚟走去，而且好抵搭，320円就可以返到札幌嘞！

大家都好好瞓，可惜日本巴士D坐位唔係幾好坐。

中午返到札幌，為求方便，於是去咗拉麵共和國食拉麵。

選擇唔多，每人揀咗一款，檯面有烚蛋，免費架！

諾怡見到烚蛋就好開心，不過我要佢食晒拉麵先可以開始食蛋。

呢度可以點半份拉麵，對於小朋友同埋唔鐘意食拉麵嘅我，啱晒！

D細蚊仔好鐘意去呢D佈景板影相架嘞，諾怡緊係一馬當先啦！

但係你又邊夠嘉頤咁襯呢？呢個回合，嘉頤勝！

諾怡見到呢間神舍，唔知邊度學番嚟，雙手合十再拍吓前面條繩，

點知條龍就突然發聲重雙眼閃紅燈，嚇到佢呱呱叫！