第四集：だいすき!!

上次講開香里奈，咁就不得不提『だいすき』啦！〈港譯：最喜歡你〉

呢套劇2008年1月首播，故事講述一個智障嘅單親媽媽，

如何衝破重重障礙，用單純嘅愛感動身邊每一個人，

證明憑佢嘅努力同決心，可以親自養育最愛嘅囡囡。

呢次香里奈為求突破，唔單止放開model形象將長髮剪短，

仲要模仿智障人仕嘅行為舉止，令人另眼相看，

推介，要睇啊！

第三集：牛に願いを Love&Farm

嚟到第三擊，今次揀咗一套2007年日劇：

『牛に願いを Love&Farm』



故事好簡單，講述一班年輕人喺暑假發生嘅熱血故事，

無錯，係日劇常用嘅橋段，務求令觀眾集集都喊餐飽，

鐘意佢嘅原因都好簡單，

完全因為呢個故事係發生喺北海道牧場，

係我嚮往嘅生活呢！好想夏天去北海道呀！

四年後嘅今日睇番，演員都變好多啊！

玉山鐵二好cool啊！比Boss時年輕得多。

相武紗季同香里奈都無乜點變，但係......

戶田惠利香就差d認唔番。

幾時可以好似佢哋咁，

喺一大片向日葵中間度跑嚟跑去呢？

初五 @ 玩轉北海道機場

執好行李，放落樓下大堂寄存先，同一位置影張行李相先，比起上次，今次好輕鬆。

放好行李後，先去北海道大學門口影張相先，之後入去參觀吓啦！

呢個時間好多大學生返緊學，我哋好似好阻住人哋咁，

而且我哋都無乜興趣慢慢行，只係喺門口玩吓，睇到雪，又嚟癲嘞！

盡情玩啦！最後一擊嘞！一陣上咗JR就唔會再掂到雪架啦！

玩咗一陣，決定提早去機場，換返D輕便服裝先，

第一間見到就係KT店嘞！入面好多made in Japan嘅產品架。

跟住見到一間好大好大嘅Royce。

可以近距離睇埋條生產線，唔駛俾錢入白之戀人睇啦！





全新機場真係好靚。

終於去到我哋嘅目標：『多啦A夢空中樂園』，位置喺國內線同國際線嘅3樓連絡通道。

呢度個workshop係教小朋友畫多啦A夢嘅，『圓圈加一點，圓圈加一點，下面畫支波板糖......』





對面係遊樂場，滑梯下面個軟墊，係一個豆沙餅嚟架，係咪好可愛呢？

失控百厭星表演軟骨功。

好大個6面積木呀，好似幾好玩咁喎！

機場無乜人，我哋又特登早D嚟，連香港人都無乜，兩個罷晒成個場。

頭先D部份都係免費嘅，呢個入口處入面就係收費區嘞，小朋友入場費300円，最後我哋無玩。





好明顯諾怡即刻情緒低落，唔緊要，去下一個景點補償吓啦！





就係：多啦A夢餐廳嘞！快D入去食嘢lu。

點解要剝晒鞋嘅？

因為大家明明有檯有櫈唔坐，偏偏揀坐地下，坐完後腳都痺埋。

不過D食物真係好吸引，連D餐具都有多啦A夢個樣架！

食雪糕喎！即刻開心番晒啦！

Jal喺起飛前兩個半鐘先可以辦理登機手續，仲有時間，細蚊仔唔想行，於是就打住機看行李，

而我同表姨媽就去最後衝刺，我只有兩個目標：La Teo芝士蛋糕同埋帶子，好開心終於買到。






寄咗行李之後，我哋諗住再行吓，落到2樓入境大堂，居然見到多啦A夢迎接遊客呀！

好奇怪無乜人會去影相，只係喺旁邊等一陣就可以輕易合照嘞！

大雄旁邊仲少人添，可惜見唔到技安、技蘭、呀福、靜宜同小叮寧啦！

〈一睇D名就知姑姐係咩年代嘅人啦！〉

寄晒行李，減低咗想買嘢嘅慾望，所以只係不停咁......試食。

番茄味布甸，都幾好味，不過費事再寄倉，試吓就算lu。

試到上癮，見到有類似試食攤位就行過去，

其實以前連長腳蟹果D都有得試，但係而家只可試甜品。

終於係時候要入閘嘞！真係好唔捨得呀！幾時可以再嚟呀？

入到候機室，發生咗一件不快事：

事緣表姨媽去咗最最最後衝刺，姑姐要看住大家嘅隨身行李，

兩位小朋友見到有個小型遊樂場，問可唔可以去玩，當然可以啦！

但係無幾耐，姑姐已經聽到佢哋鬧交，但係人又多隨身行李又多，行唔切過去制止，

無幾耐見到表姨好緊張返過嚟叫停，因為有人已經開始鬧到掟緊嘢，

掟緊果D係玩具木珠，如果傷到人點算呢？

姑姐嬲到震，唔明白點解兩個咁大個都會發生咁嘅事，

無論如何，郁手就係錯，喺公眾地方影響其他人就更加唔啱，

最後，姑姐要佢兩個企喺度反省，直至所有人登機最後先可以上機，

希望你哋會明白同好好記住呢一個教訓。

由於姑姐仲好嬲，唔想同佢兩個坐，要佢兩個一齊坐再學吓點樣相處，

唔同一齊坐都有好處，就係佢哋有乜嘢需要都要自己搵空姐，姑姐就好忍心唔幫手，

終於，搞到佢食完個兒童餐我都唔知，只係影到呢張殘局。

嚟果時個餐無得揀，今次大人餐有得揀，有海鮮長通粉，表姨媽話好味；

姑姐食飯，應該話係飯焦，相當難食，不過個桃味啫喱加番分。

後記：雖然仲有錢，又未過磅，但係都只係買咗一個芝士蛋糕，因為保存期只有一天，

第二朝，即刻開嚟食啦，咁貴嘅蛋糕，緊係要用返隻KT碟嚟Serve啦，

真係好好味呀！下次要到達果日先買一個喺酒店食，回程果日再帶一個返香港。

 


感想：上次帶兩個姪女去旅行係去星加坡，一行12人，大大小小有照應，所以都唔擔心，

今次人少少，反而責任大咗，加上落雪天，去旅行又要格外小心，

好彩有表姨媽一齊，唔止幫手照顧小朋友，對景點食物又容易滿足，

搞到我哋四個日日都有好多爆笑位，真係好開心呢！

下次要再約埋一齊去旅行啊！不過，日本呢個地方似乎唔係幾啱你生活喎！

至於嘉頤諾怡，喺旅程中都發生咗好多激死人嘅事，但係總結嚟講都抵讚嘅，

小朋友嚟講，算係好合作又唔怕辛苦架嘞！合格以上啦！

一於......下次再玩過。

初四 @ 旭山動物園

初二果日取消咗旭川之旅，大大細細都好失望，

經過商量後，我哋決定都係要去旭出動物園，因為係重點之旅嚟吖嘛！

方案一：搭旭山動物園號；方案二：搭巴士，

由於唔係日本假期，旭出動物園號都好吉，好輕易就買到飛嘞！

可能係太開心嘞！諾怡行去JR站途中第一次跣低。





好開心呢！終於可以搭旭山動物園號嘞！我好想快D睇企鵝同北極熊呀！

唔好講咁多，快D出發啦！

車箱總共有五卡，每卡都有不同動物造型，仲有企鵝姐姐同我哋影相，係一架好好玩嘅列車。

剛剛果日有個台灣電視台拍嘢，好似係講一家四口北海道之旅嘅故事，

講真，都好干擾吓！

無無聊聊，由內到外都咁無聊，無聊到扮睇書。

呢邊就入型入格啦，唔會浪費任何一分鐘嘅小朋友。ZZZZZZ........ZZZZZZ

終於見到企鵝嘞！不斷聽到大家話：卡嘩依！

佢哋跌吓跌吓咁真係好cute，可惜時間太短嘞！

同企鵝仔近距離接觸。

喺呢邊一睇完，我即刻同佢哋去企鵝館門口再等，因為果度係龍尾，可以睇多次。

去到無幾耐，就有一班幼稚園小朋友嚟排定位，等睇企鵝仔，又讚一次：佢哋真係好有秩序架。

諾怡拍埋幼稚園小朋友旁邊，原來已經好大個lu。






真係大個嘞！好有心機咁睇緊企鵝成長過程。

經過幾小時戶外活動，好凍嘞！不如去嘢啦！





今次呢間比西門出口果間平好多，表姨媽食烏冬，佢話好味喎。

姑姐又食咖哩飯，貪佢有隻半熟卵。

小朋友，唔駛講啦！又係熱氣嘢！

兩姐妳都揀相同嘅餐，但係最搞笑個餐係只可配咖啡，無得改！

第二之大合照，今之仲有雪人添。

扮豹？

諾怡喺呢方面好合作，唔會扭計買嘢，影吓相已經滿足，最後只係買咗一板原子筆。

唔想行果條長樓梯？搭shuttle啦！等開車期間都不忘整古造怪。

要走嘞！玩盡佢啦！

差D跌，但係好開心！

等巴士期間，都要踎底執雪玩。

去到旭村車站，10分鐘內開車嘞！大家急急忙忙去洗手間，上到車啱啱好，

坐定定大家開D零食食吓啦，呢包糖極好味，下次都要再買。

呢幾日搭咁多JR同地下鐵，兩個小朋友都已經好熟手嘞！

仲會記得每去一個地方都搵吓有無印仔。

今日大家都咁開心，就豪一豪佢啦，蝦蟹合戰放題中。

諾怡好鐘意食蟹，食多D啦！蝕少D。

好彩小朋友有半價，平均每人3000円，90分鐘任食。

今日唔算肚餓，點解決一檯食物呢？

最後都順行完成，無再order蟹，反而壽司有翻單，嘉頤食咗11件。



聽日要走嘞！今晚仲要執行李，於是決定豪搭地鐵返去啦！


〈PS：今日發生咗一件事，事緣『蝦蟹合戰4-2店』結束營業，所以要去本店，

但係姑姐唔係好肯定本店正確位置，旅遊書地圖上嘅指示又係錯嘅，

於是姑姐就先安置佢哋喺一個室內嘅地方等，然後就自己出去搵，

都係5分鐘啫，兩個小朋友就玩到鬧交，居然講出『以後無親戚做』呢D對白，

小朋友，你哋知道嗎？點解姑姐要搞呢個旅行呢？

除咗想你哋多D見識外面嘅世界，就係要俾你哋多D一齊玩，製造美好童年回憶，

堂姊妹，係好親嘅親人嚟架，我希望你哋大個都會好似親姊妹一樣，

互相關心，互相扶持，請你哋唔好再講呢D說話嘞！〉