北海道‧冬之旅〈第一日〉

12月26日〈第一日〉

搭中華航空，香港嘅地勤人員好好，好有禮貌，可惜幾程機都delay。

坐咗3個零鐘，見到雪地嘞！好開心呀~~~~~~

兜兜轉轉去到JR方向，嘩！好吸引呀！我記得架，呢度就係我個plan嘅最後衝刺嘅目的地，
我要買芝士蛋糕、蜜瓜布甸............總之，8日後我會番嚟架。

好快就出晒呢幾日嘅火車飛，真好，仲有旭山動物園號套票，一直都好擔心，
因為我29號去動物園，用套票緊係無問題啦，但係30號返當日係旭山動物園休園，
怕唔用得套票返，好彩原來都用得到，而值得大讚嘅係票務站嘅女職員，
英文好好呀！溝通全無問題，佢好好人，我哋3人各要1張登別回札幌的單程JR票，
要4千幾円1張，佢就幫我哋一次過出咗一套4張嘅車票，原來咁樣仲平，4張總共7千幾円咋，
4張車飛係不限方向，日期可用至2011年3月，總共慳咗5千幾円呀！真係出路遇貴人！

札幌JR地下街步行5分鐘，就到酒店對面，好方便，多謝朋友個朋友嘅好介紹。

Best Western Hotel Fino Sapporo，唔算熱門，但係都幾細心又好方便。

 大堂好細，只有小小幾張梳化，而且每次入嚟都有一陣薑茶味。

大堂旁邊有一間房，有免費上網同printer，search到地圖都可以即時列印。

酒店有得借用i-pod speaker，當然要自備i-pod啦！呢個杯就係speaker嘞！

房間貫徹大和精神 - 好細，我就係瞓喺窗邊果張加床嘞，因為鐘意可以開少少窗，如果住著開唔到窗嘅酒店，好痛苦架。

放濕機都可以借用，感覺良好，唔駛第二朝瞓醒變人乾。

Set 好個陣先，唔可以同香港失去聯絡架！Facebook萬歲！

多謝Cindy唔怕麻煩，唔計較咁重，帶個腦俾我哋玩，抵讚！

放低嘢之後，去探探路先，先去東急睇吓三井outlet個巴士站位置同班次，
因為諗住1/1去買福袋吖嘛，搵到後四圍逛逛，搵吓有乜好食，可能係因為星期日，
壽司大排長龍，最後都係去拉麵共和國食拉麵，選擇咗梅光軒，因為............呢間唔駛排隊囉。

拉麵買相幾好，可能因為我唔鐘意食拉麵，覺得麻麻地。

返去之前買定宵夜同早餐，最緊要有牛奶，香蕉奶都好好味！

係時候睇吓今日嘅收獲，每年必買嘅月曆，今年買貓貓同狗狗。

雖然無帶諾怡去，但係姑姐都會記得買手信俾佢架，
呢個袋香港有得買，不過日本平D，而且......................話晒搭過飛機架，我好鐘意隻蕉呀。

好好味嘅北果樓夕張蜜瓜布甸，三幾吓就食晒lu。

今日係好滿足、好充實又好好彩嘅一日，聽日要一早起身，因為就嚟新年，
好多地方會陸續閂門休息，我哋要同時間鬥快呀！要快D執好嘢瞓嘞！因為聽日要轉酒店呀！