北海道‧冬之旅〈第五日〉@ 探險之旅

12月30日〈第五日〉

話今日係探險之旅，確係有D誇張，不過，之前咁多日都係依照plan好嘅行程嚟玩，
最多都係將D時間改少少，但係由於旭川無嘢好玩，所以就多咗半日出嚟，
本來諗住搭JR去美瑛賞雪，但係交通配套唔方便，我就唔敢冒險，
於是決定都係返去札幌附近嘅地方，最後，我哋決定搭多一個站去新札幌！
呢個決定令我哋展開咗一個難忘嘅旅程，喺度，要好衷心多謝兩個團友對我嘅信賴。

揸住旭川去札幌嘅車飛，加少少錢就可以搭到去新札幌。

好容易就搵到巴士站，呢度指引好清楚，我哋喺10號站搭車，

車站前有各車詳細時間表，未有車可以坐吓先。

因為仲有時間，我兩個好鬼鐘意買嘢嘅朋友就爭取時間，

掉低可憐嘅行李，走咗出去7-11買嘢！好彩仲記得準時返嚟。

巴士裏面有附近巴士時間表，真細心！

搭咗10分鐘就到嘞！目標在望嘞！但係中途站嚟嘅？同司機哥哥溝通吓先，

佢叫我唔駛擔心，穿過一個森林公園，總站落就啱架嘞！放心晒！

到總站後，司機講咗一個令得晴天霹靂嘅消息俾我聽，佢話：今日呢度休館！

吓！咁點算呀？呢度荒山野嶺，死喺度都無人知喎！原車走又唔憤氣......

司機話架車唔會再番嚟，吓！咁點算呀？後來同司機哥哥雞同鴨講一大輪，

大約明白佢嘅意思，係佢架車唔會再番嚟，不過一個鐘後會有下一班車。

原來係咁！多謝司機哥哥，我哋3個就好似酒店職員送客咁並排揮手道別。

睇吓，咁靚！係人都唔捨得走啦！

行過少少另一個角度。

天色咁好，隨手咪埋眼舉起相機都可以影到咁靚嘅相。

鎖晒門都要伸手入去影番張靚相，下次有機會一定要入去參觀吓！

玩咗成個鐘，鬼影都無隻，只係有一家日本人揸車上過嚟望吓！

既然無人，呢度D雪又無污染，可以無皇管喺雪地上碌嚟碌去lu！

反正無人，我哋都肆無忌憚咁將D行李放晒喺車站裏面就走去玩lu！

越來越接近巴士到來嘅時間，但係仍然係毫無動靜，莫講話車，

連烏鴉都無隻飛過，其實我都有D心驚，究竟有無誤解司機哥哥嘅意思？

好彩，踏正2點43分，巴士到嘞！真係好似飄流荒島獲救一樣，好開心呀！

開拓之村，呢度居然係行程中最難忘嘅經驗，我會再嚟架！

其實都怪自己唔check清楚D資料，今次好彩無事啫，唔係都唔知點穿過森林公園返市區，
北海道嘅冬天4點就天黑，再無車都唔知點算，到時可能就要兩個朋友陪我瞓街嘞！