北海道‧冬之旅〈第四日〉

12月29日〈第四日〉

終於等到你哋出場嘞！個個嚟都係為咗睇吓你哋架啦！

呢隻白眉嘅，唔係皇帝企鵝，佢哋係巴布亞企鵝，一樣咁cute！

綿羊好得意，真係好似卡通片D公仔咁。

另一邊呢幾隻就喺度眠一眠，唔知佢件羊毛衫保唔保暖呢？

其實天寒地凍，佢哋都好慘架！

兩隻長頸鹿，好似有D孤零零咁！

東門得一間餐廳，排咗成半個鐘先入到嚟，而且D餐都唔平，

我呢個餐選咗3樣食物，咁就要1200円嘞！但係就好飽。

好鐘意佢哋嘅設計，完全唔駛整污糟隻手，就可以喞D醬落食物度，份量啱啱好，

後來我喺超市見到朱古力混花生醬同練奶混果醬，即刻買咗兩包返香港搽麵包。

食飽去睇D自閉症嘅猛獸，呢度得一隻老虎，佢不斷行緊同一條路線。

呢隻北極熊都係，只係重重覆覆行同一條路，好似好悶咁，而且仲好污糟。

最後去到企鵝館，睇吓周忠師傅叉起腰回眸一笑幾有韻味？

突然間一陣騷動，大家紛紛讓開，原來咁啱呢個時間係企鵝仔第二場巡遊完番屋企，
我哋就正好企喺大門口，睇吓旁邊呢隻啡色肥企鵝，佢係無份巡遊架，
當佢知道D企鵝返嚟就即刻出去大門口迎接佢哋，但係佢好似好嬲大家唔帶佢出去喎，
不斷呱呱叫逐隻鬧佢哋，笑死我！初時我以為佢係老大，後尾知道原來唔係喎，
佢係皇帝企鵝嘅細仔小皇子，我諗佢應該係妒嫉，真係好似小朋友咁，好可愛呢。

凍到D水喉都結晒冰，都係時候要走囉！

其實本來plan咗去雪之村玩雪，因為佢啱啱喺動物園旁邊，但係原來雪之村喺動物園東門，
出咗去就唔可以入返動物園，而返去火車站嘅巴士就喺動物園西門，
如果唔係經由動物園穿過去，由雪之村行去巴士站要成30分鐘以上，我哋都唔肯定識唔識行......

考慮今年降雪量唔多，最怕出到去好多雪上活動都無得玩，到時真係兩頭唔到岸，
其實喺動物園內有好多海報介紹雪之村，但係又唔可以連繫，真係有待改善。

最後唯放棄，係今次行程之中嘅遺憾，只好早D返酒店四圍行吓。

都唔明點解話旭川係北海道第二大城市，周圍都無乜好行，8點就閂晒門，
雖然酒店介紹話附近有1300間食肆，但係我哋行完一輪都唔知食乜好，
最後決定喺便利店買嘢返酒店食，俾起外面D餐廳，今餐好抵食呢！

飯後仲有Donut、水果同甜品，好滿足嘅一餐！

晚飯後再努力上網睇吓D資料，因為旭川真係無乜好玩，呢次經驗教訓我下次唔好再喺旭川住，
真係有D嘥時間，火車站酒店係好方便，但係最大問題就係開唔到窗，瞓一晚都爭D焗死，係一次唔係幾好嘅經驗。

聽日無端端多咗半日，盡最後努力搵吓有乜地方好去，因為唔想又係行街買嘢，就係咁，聽日我哋就經歷咗一個難忘嘅旅程。