北海道‧冬之旅〈第八日〉

1月2日〈第八日〉

要走嘞！今日乜嘢行程都無安排，因為淨係由酒店拉行李去JR站都有難度，

去到JR站，臨走都要買個鬆弛熊福袋，公平嘅姑姐諗住俾嘉頤吖嘛！

裏面D精品都幾靚架，有公仔、飯盒、仲有張毯......

有20張coupon換donut，淨係D donut都超過2000円啦，所以又買咗一盒。

去到機場有太多行李，諗住先寄完行李再回頭去買嘢，我仲未買芝士蛋糕吖嘛！
點知一過磅，航空公司職員話超磅，計咗一大輪，話要補27900円，
嘩！咁貴？真係自食其果，於是又扮可憐啦！事實上真係好可憐吖嘛，
職員見我哋隨身行李都有好多，諗咗一陣，問我哋係咪應承唔會再買嘢？
我哋緊係乜都話得啦！於是叫我哋抽起一件做手提，就俾得哋過嘞！

好心嘅先生，對唔住，我雖然無買芝士蛋糕，但係入閘後......

呢隻紫心係新款，淨係機場至見到，忍唔住又......

之前都有提到，華航唔係唔好，電影選擇又多，但係就成日delay囉，
今次仲驚險，由於我哋喺台灣轉機只有50分鐘時間，都預咗要跑過去，
我哋又咁多行李，已經有D擔心架啦！我哋坐第17行，一定俾前面塞住出唔到啦！
點知，低處未算低，由札幌至台灣班機delay咗25分鐘，其中有一個空姐見到我哋咁多行李已經非常黑面，
咁我咪趁一個資深年長空姐行過時順便問吓佢囉，呢個空姐好好，
一睇得張boarding pass就話俾我知一定趕唔切，會安排我哋搭3個鐘頭後另一班機，
我問佢係咪一定有位？佢話無位都會安排其他航空公司班機，總之保證我今晚一定返到屋企。

既然係咁，當架機停定後，我都係用正常速度行出去，
點知一出去，就有華航職員舉起牌搵我哋，除咗我哋3個，仲有其他4個人情況同我哋一樣，
原來架機等埋得哋，我哋就跟呢個好有禮貌嘅職員9秒9跑去登機閘口，
佢見我咁多行李，仲幫我將最大果件即時寄埋，真係無言感激。

想唔想知究竟我哋3個人有幾誇？下面係未買鬆弛熊福袋、

未入閘最後買薯條、薯仔湯之前影嘅......大大細細總共12件。

由於今次嘅行程係由我自己編排，兩個朋友又乜都無所謂，
我都係將自己鐘意嘅行程編落去，所以我自己就玩得好滿足嘞！
再次多謝兩位朋友嘅合作、諒解和信賴，
經過今次，下次要再去定山溪、洞耶湖、美瑛、富良野、網走、釧路、稚內......
總之，北海道，我仲會再嚟架。

北海道‧冬之旅〈第七日〉

1月1日〈第七日〉

酒店樓下就係北海道大學，入去感受吓文化氣息先。

只要有雪景，周圍影相都咁靚。

行好耐先去到課室，喺到返學都要預多少少時間起身，唔係實遲到。

都係自己唔好，去到第七日，對於時間有少少鬆懈，一下唔記得睇時間，

就係差果5分鐘，就俾架三井outlet巴士走咗，要等多一個鐘先有第二班。

去到買到福袋後，就要醫肚，好鐘意呢個food court，好乾淨又好安靜，

喺個Tray上面果個係call機，當你order嘅食物整好之後就會BB響。

呢個豚肉丼真係好好好好味，係即場睇住佢用炭烤，好香啊！

就係呢間嘞！好似係連鎖，但係呢幾日都係第一次見到。

可選3塊肉、4塊肉或5塊肉，我擇咗3塊，少食多滋味吖嘛！

濕毛巾任用、水任飲，但係要自助，飲飽食醉就自己分類放好。

每一間食店嘅食具都唔同，食完野自己將食具交回所屬餐廳嘅返卻口。

離開三井outlet，就搭車返札幌去Sapporo Factory，因為見到佢有玩具反斗城，

只要有100円shop，我哋3個無論去到邊都可以買到嘢架啦！呢度都有收獲。

返回市區見到市電，今次無緣搭到都要去影吓相先。

經過大通公園，影咗幾張燈飾相，凍到手震震，影得唔係幾靚。

攰到死，返酒店附近松屋食牛肉飯，係全程最抵食嘅一餐，仲幾好味添。

每位460円，仲平過食麥當奴，係一間唔錯嘅平民食肆。

100円shop同玩具反斗城嘅收獲。

飲飲食食又買一大堆，三兄弟薯條好味，下面盒湯好抵又好味，200円8包。

每次嚟到都買俾諾怡嘅Edwin福袋，5000円有7件衫，真係抵。

今年買到130碼，出年再去可能買唔到俾佢嘞！

之前買仲有件羽絨，今次變成薄外衣，都幾好睇。

聽日要走嘞！今晚要努力執行李，終於執到3點幾，要好好珍惜最後呢幾十小時呢！

北海道‧冬之旅〈第六日〉

12月30日〈第六日〉

原定今日一早起身即刻去小樽，魔鬼朋友突然話先要去一個地方，

所以我哋都係要去番大通站先，沿途經過北海道廳舊本廳舍。

一場嚟都點都影幾張啦！喺雪景襯托下，呢間紅磚屋都幾靚吖。

呢個電視塔，係喺魔鬼舖頭入面影嘅。

終於安全離開魔鬼舖頭，向番JR站出發。

搭咗40分鐘JR，到達小樽駅，一出站左手邊就係三角市場嘞！

入面冷冷清清，我覺得今年真係少咗好多人遊北海道。

第一個景點係舊手宮線跡地。

因為積雪地滑，行咗好耐先嚟到目標之一嘅LeTAO。

有試食，呢款芝士蛋糕真係好好味，心裡面盤算住到機場要買幾個，可惜......

目標二北菓樓，呢兩間舖門前特別大風大雪，我覺得其實應該係人為嘅......

好好味嘅夕張蜜瓜布甸，雖然係貴D，但係都要一試。

有無試過喺旺季居然可以影到一張無乜人嘅風景相？真係好靜。

實在太大風太跣嘞！團友行得好辛苦，剛好北菓樓門前有個巴士站，

睇到有散策，等咗一陣有架巴士嚟，唔理三七廿一就跳上車，

呢條線係循環線，搭反方向，坐咗大半個圈終於去到運河，坐咁耐都抵番。

次次嚟到都係日頭，今次只係4點，就影到夜色初上嘅運河。

運河嘅另一個角度。雖然呢度顯示有成2.4度，但係D風吹到我哋好凍~~

凍到騰騰震，加上大年夜怕D舖頭早收，影咗一陣就急急去運河食堂搵食。

食完去咗火車站旁邊嘅長崎屋逛逛，買好水果預備返札幌，點知，

臨走團友話想行吓100円店，於是齊齊上去啦，唔去尤自可，

點知見到Sanrio福袋，呢次唔可以再忍嘞，2000円，就買一個啦！

揀好之後回頭一望，周圍都無人嘅，行好遠先有收銀處，

收銀員見到我好急咁幫我收錢，又見到佢哋跑來跑去，然後帶我個團友過嚟，

原來，佢哋今日7點閂門，真係唔好意思，要搭職員電梯離開呢！

返到酒店打開一睇，真係唔錯呢，淨係個飯盒都值1500円啦！

仲有今朝嘅魔鬼Agnes b，喺日本買就慳咗千幾，但係唔買咪仲慳！

預告：今日已經買好多嘢，聽日仲高危，因為聽日嘅主打節目係去outlet買福袋，朋友，要控制自己呀，只怕有本事買，無本事攞咋！

北海道‧冬之旅〈第五日〉

北海道‧冬之旅〈第五日〉

3點幾終於返到新札幌嘞！發現今日完全未食過嘢，入麥當奴食少少嘢先！

然後，我哋抵擋唔住地道超市嘅魔力，又入去買咗一大堆嘢。

諗住去埋洗手間先搭車，點知又遇到魔鬼嘞，係福袋呀，點算呀？

2000円一大袋，又可以睇到入面嘅嘢，真係好抵呀！但係要.........忍！

因為我哋要趕時間返札幌，今晚有重頭節目：去蟹將軍......旁邊嘅蝦蟹合戰。

11樓，網友都話4-2店嘅好D，所以，唔好問，只要信。

我哋揀咗4200円呢種，可以食齊3種蟹，90分鐘任食唔嬲。

呢個係盛載蟹殼嘅罐，個個都滿載而歸，哈哈！

毛蟹、鱈場蟹、松葉蟹排好晒隊，任君選擇。

隻蟹腳仲長過隻前臂，真係大滿足！

多謝網友提點，喺網上download咗coupon後，我哋就有免費汽水飲lu！

食飽一定要做吓運動先，最好嘅運動緊係......shopping啦！

而家狸小路真係好識做生意，好多舖頭都請咗D台灣留學生做售貨員，

好似呢間咁，除咗溝通無障礙，買嘢仲有9折添。

食得太多蟹，一致通過要食雪糕做甜品。

其中一部份收獲，點解香港無咁多腳趾襪嘅？應該再買多D！

預告：聽日要去一個好浪漫嘅地方，小樽。