韓國玩雪之旅第一天@ High one Resort

今年農曆新年，同朋友一家人計劃去韓國玩雪，

由於都幾早book好機票，價錢尚算公道，

搭大韓零晨機，機票大人$4353；細路$3353，

過年喎！A380喎！好耐無搭過嘞！抵啦！

其實我都幾唔熟韓國，plan果時都雞手鴨腳，

所以，我對呢次行程都無乜期望，

我嘅旅程亮點係......呢個小朋友！

喺起飛前幾日，大韓就打咗電話俾我，問小朋友想食乜？

有四個餐俾佢揀，我哋建議佢揀Pizza，

諗住就算搭零晨機瞓咗都可以take out嘛！

幾開心，全無睡意喎！老友！

呢個就係Pizza，同想像中好有出入，食評話：唔係幾掂！

一到埗學吓買地鐵飛啦！我哋而家要先去搭Arex去首爾站，

然後轉地鐵1號線去清涼里火車站，識唔識買呀？

其實都尚可理解嘅，因為全部有中文架嘛！

只係我哋唔熟悉佢哋嘅路線啫！

由機場去到首爾站，全程53分鐘，大家都要眠一眠嘞！

大家車票同小朋友車票，同樣都係每次要退按金架。

話說由機場去古汗起碼有3個方法：

方法一，從機場直接搭巴士到古汗，第一班車9:30，

我哋5點幾就到機場，唔會咁等啦！

方法二，機場搭巴士或地鐵去江邊「東首爾綜合客運站」，

再轉巴士去古汗，差不多半個鐘有一班車，可以考慮。

方法三，搭機鐵去首爾站再轉地鐵去清涼里站再轉火車，

由於考慮到自己唔熟路，火車應該最可靠啦！

所以最後選擇方法三，

但係又好怕買唔到火車飛喎，資訊科技年代，梗係網上訂啦！

不過可能過年期間啦，全部海外網上訂購都無效喎！

唉~~~心諗，唯有博一博啦！到時睇吓有無飛買嘞！

點知，死心不息嘅我，喺上機前再上網check一check，

居然突然開番俾我哋海外遊客訂喎！開心死呀！

成人車費KRW15900，小童KRW9000。

轉轉折折，拖住行李小孩，一行五人，行到一額汗，

終於上到呢架9:10開出，去古汗嘅「無窮花號」嘞！

網上訂位係無得揀位嘅，唉！居然編排咗五個走廊位俾我哋，

即係話，小朋友要自己一個人坐囉，激死！

搭咗3小時25分，終於到咗古汗火車站嘞。

隨咗探吓洗手間之外，就係買番一杯平到震熱飲先啦！

暖粒粒咁，每杯都係KRW400咋！

落到馬路，兩邊巴士站都係無指示滑雪場嘅接駁巴士喺邊嘅，

好彩好快有的士，於是我哋就分兩架車上去嘞！

古汗火車站至check in center，車費KRW9000啦！

呢度，就係我哋幾經波折至訂到嘅「High 1 Resort」嘞！

話說喺訂好機票後，我已經即極去搵滑雪場，

首先，龍平已經開始接受預訂，可惜佢一間屋只可住四人，

咁我哋都想住新啲，所以一直打聽High 1，

但係Agoda、Hotel.com等等都搵唔到喎，

官網又無預訂方法！咁唯有託一個移居韓國嘅朋友幫手啦！

酒店用e-mail回覆，話我係waiting list，11月15日再覆我，

直至11月22日，我終於收到Confirmation嘞！開心死啦！

每房每晚KRW360000，最多可以住5人。

但係由check in center到酒店呢條大斜路，

係無任何交通工具，要自己拖喼上去架！

我諗：如果大風大雨大雪天點算呢，即係話：

除非自駕，否則，我哋呢啲自由行根本唔係佢target啦！

好彩，入到嚟見到都即刻開心番晒，兩房一大廳嘅設計，

好適合一家人或者一班朋友一齊住，呢間係瞓床嘅房。

隔離就係瞓地下嘅Ondol，啱晒我呀！

寬敞嘅大廳，有客廳飯廳同露台。

呢度係開放式廚房，住3晚梗係要煮吓飯仔啦！

呢個雙頭電磁爐，煮一陣就呱呱叫，真係辛苦晒煮果個呀！

廚具都算齊全，所有餐具都預咗五份，剛剛好！

有兩個浴室，五個人都唔駛排好耐隊沖涼，幾好呀！

由露台望出去，係滑雪學校嘅範圍，斜道極平，適合初學者。

天氣太好，根本無落雪，唯有出去視探吓環境先啦！

大家都肚餓嘞！一心諗住食韓式嘢，但係選擇真係好少。

呢度有六間酒店，分別喺六個區域，

全部可以搭免費Shuttle，亦可以搭去古汗火車站。

番嚟後，大人去煮飯，細路沖完涼就興致勃勃去舖床嘞！

嘩！好豐富呀！大家一齊食餐團年飯啦！

小朋友最鐘意多啦A夢，見到呢款朱古力奶就買嚟做早餐啦！

喺度玩，要睇天氣，今日天氣好，但係無雪落，

唔知聽日點呢？滑唔滑到雪呢？