今日，第四天，發生好多事......
今日如常食早餐，計好時間搭shuttle落古汗火車站，
但係......雖然成個站一個人都無，但係，無車飛賣呀~~~
咁......唯有行plan B啦！
我哋決定搭的士去古汗巴士站搭長途旅遊巴去東首爾啦！
由於我哋五個人四件行李，一定要分兩車啦！
但係去到巴士站，見唔到佢哋喎，點算呀？
問題係：今次我哋都無租wifi，都無漫遊......
來來回回喺巴士站附近搵，有個韓國女子過嚟幫手，
但係咁情形，神仙都無辦法啦！
然後又有個韓國叔叔過嚟了解吓！太好嘞，佢識普通話架！
佢同我搭的士四圍搵，然後......車咗我去報警！
佢一路幫我翻譯，感謝！
然後，我哋坐警車返巴士站，我決定，先去東首爾，
去到市區，搵個free wifi都應該容易啲啦！
呢個時候，巴士飛已經去到夜晚7點，即係成11點先到市區？
於是我就請叔叔幫我叫的士，因為新年好多的士都唔肯車，
叔叔真好，仲幫我講好價呢！但係都好貴呀！
架車啱啱上車高速，司機接到電話，然後將架車泊埋一便，
嘰喱咕嚕同我講一大餐，然後俾個電話我，
我只知道對方係police，然後又係一輪嘰喱咕嚕，
轉轉折折，終於......我同團友對話到嘞！
於是司機哥哥就車我哋去會合嘞！
真相大白嘞，原來，個司機車咗佢哋去太白巴士站，
呢個巴士站離古汗較遠，一般司機都唔會選遠唔選近啦，
就係咁，先搞出呢個大頭佛，激死！
都怪自己唔做足準備功夫啦！就係咁白白浪費咗一日添！
落雨，塞車，終於，千辛萬苦去到東首爾，
喺江邊站轉地鐵到弘大，
搵到呢間guest house已經係夜晚11點嘞！
以下呢張係第二朝補影嘅。
今次住DW Design，由於係Guest House，
Check in時間最夜至11:00PM，今次都好驚險呀！
我都幾鐘意呢度，好似屋企咁，又乾乾淨淨，職員又nice。
每層都有一個廚房，朝早可以自己喺度煮早餐，好玩！
太夜嘞！好彩弘大附近都有啲食肆係開24小時，
於是，我哋就去食咗今日嘅第一餐：石頭飯。
但係，都係全部係辣嘅，同小朋友嚟真係好難搵食架！
今日，真係超...............攰！要抖抖嘞！
沒有留言:
張貼留言