食個早餐，就要起程嘞！咦......點解有維他嘅？
第二日咋喎！又拉行李走？
事關今次係主力玩台中，但係買唔到台中機票，
所以咪要由台北出發囉，搭10:00自強號，12:15到達。
不過火車係無大型行李位嘅，所以朋友都坐得幾辛苦。
到嘞！台灣真係一個好出力推動文化嘅地方，
連月台都有書庫，俾等車嘅乘客消磨時間睇睇書，幾好！
台中車站分前站同後站，落車上車都係前站，
我哋住後站果邊，可怕嘅係......
由前站去後站係要行樓梯過隧道架，拎住個喼真係好難搞！
一出嚟就見到我哋住果間酒店嘞，係右邊果間。
就係呢間嘞！喺酒店網評價都幾高，一早鎖定要住佢啦！
入到去，地下大堂旁邊有一個公共地區，一齊參觀吓啦！
呢度就係交誼廳嘞！我哋都有買食物反嚟呢度食架。
酒店雖少，但係堅係五臟俱全，好似交誼廳旁邊個洗手間咁，
有兩個櫃放有牙線棒、棉花棒、化妝棉同髮圈......
以上都係一般酒店可能會見到嘅，
但係我都係第一次見到獨立杯裝漱口水咋，好貼心呢！
交誼廳旁邊有個廚房，係大家公用嘅，自律就得嘞！
食完嘢自己喺度洗番乾淨啲食具囉，有洗潔精提供架。
有微波爐翻熱食物，有焗爐烘麵包，仲有奶樽消毒器添！
仲有我最鐘意嘅自助洗衣房！有洗衣粉提供架！
可惜，第二晚嚟咗一班講普通話嘅學生，
佢哋成晚分頭霸晒四架洗衣乾衣機，不斷將啲衫乾完又乾，
朋友同佢講佢仲態度好差，呢啲年青人真係......！
最後佢哋再將乾衣制較多一粒鐘上去瞓覺，自私！
結果我等到零晨拎起晒佢哋啲衫囉！哼！
睇番房入面啦，小小房間，好乾淨，而且設備齊全。
想住特色啲，樓上幾層係畫滿插畫嘅主題房，下次住吓先。
安頓好就出發嘞，每次都要過呢條隧道架。
呢邊就係前站嘞，所有主要交通都喺呢邊架。
呢度就係我哋第一個目標嘞，咦，大排長龍喎！
就係佢：宮原眼科，唔係嚟睇眼，而係嚟食雪糕？
無錯，你可以選擇買家庭裝......
不過更加多人會揀呢個杯，但係通常都要排隊成個鐘頭架！
我哋無浪費光陰排隊，先入去入面睇睇先，
旅遊書話入面好似哈利波特嘅世界嗰喎，又真係幾靚噃！
但係入到去都唔知點影先影到個偉大嘅設計。
其實呢度係一間手信店，而且全部都包裝得好靚好有特色。
啲貨架都好特別，又舊又歪歪斜斜，但係好靚喎！
又有壁面介紹土鳳梨嘅知識，仲有蓋印區添！
玩完影完一大輪，條雪糕龍都係咁長，
所以我哋去第二度食嘢囉！大熱天時食鍋物？
坐巴檯喎，都幾得意吖！過晒食飯時間，大把位。
一人一鍋，NT198一個餐，同香港食個快餐差不多啦！
係咪都幾豐富呢，食到好飽架！
餓底們，開餐嘞喂！
沒有留言:
張貼留言