7月24日，關西遊第一天@京都〈上〉，雨天。

拖咗大半年，終於開筆嘞！姑姐，係咪真係忙成咁呀？

唔得嘞！堆機呀！要快啲開工嘞！

話說上回講到：姑姐帶住隻跛腳做手信，喺泰國返香港，

點知班機Delay喎！心急死我嘞！

我仲有下一場架，遲到搭唔到機就慘嘞！

好彩，只係Delay一個鐘頭左右，返到嚟仲趕得切食個晚餐添！

講返正題，今次我哋試新嘢！搭樂桃航空，係廉航，

貪佢用盡時間，零晨機去晚機返，仲要...........平！

00:35起飛，去到關西國際空港先至晨早05:25；

機票$3309，因為要等齊人攞到假，所以遲咗少少，

如果唔係仲平啲添！

好啦！先睇吓隻機先，嘩！桃紅色，好Fancy喎！

而且仲好乾淨添，空姐空少都好有禮貌，唔錯！

不過可能我自己有少少憂閉恐懼症，覺得架機好焗！

朋友就覺得無嘢，不過大家都係成晚都瞓唔到！ 

好彩！話咁快就到啦！嘩！成個停機坪都係樂桃啲機喎！

所有樂桃嘅航班，都會喺第二航廈辦理出入境手續，

一踏入嚟，唔......雖然都乾乾淨淨，

但係......真係......好有臨時搭出嚟嘅感覺喎！

落到樓下，有免費穿梭巴士到第一航廈，因為搭JR要去果邊，

咁我哋都跟大隊啦！車程大約10分鐘，好快。

順利搵到綠色窗口，大家記住要準備好所有證件呀！

前面個家庭派出個爸爸急步去買車飛，

但係攞證件嘅媽媽就慢慢喺後面行，仲要嚟到慢慢搵證件，

終於搞到搭遲一班車lu！要等多30分鐘架！

好！成功買咗張關西 Area One Day Pass，盛惠2000円，

如果第一站係京都，強烈建議要用佢，真係好抵架！

因為搭Haruka去京都基本車費都2980円啦！

75分鐘後，我哋就到達京都嘞！

雖然都嚟過京都好幾次，但係京都自由行就係第一次，

先認識吓呢度嘅地下鐵先，呢度地下鐵只有兩條主要線：

「烏丸線」同「東西線」，

其實都好易搭！而家要買飛搭烏丸線去「四条烏丸」。

四條烏丸，先得果兩個站就210円，因為係返工時間，都幾多人架！

資料顯示，要搵20號出口，搵到出口都唔好開心住，

四個人四件大行李，點知......出面仲落雨喎！點算呀？

於是，我安排3個朋友喺站入面睇住啲行李同等我，

我就出去搵吓酒店嘅位置先，因為我知係喺橫巷，

我諗一個人出去搵會快啲！點知問咗啲人都唔知，

終於係一個剛開店嘅店員指點下，終於搵到嘞！

好彩，返去接朋友們出到去果時又開始好天嘞！

就係呢度嘞：「平新旅館」！嚟梗兩晚嘅住所。

一決定要嚟京都，就決定要住日式旅館，

左揀右揀，就決定呢度啦！

話說「平新旅館」有140年歷史，

而家已經由第五代繼承，

連京都府政府都頒發一個「京之老舖」盾俾佢，

再加埋網上酒店評價都唔錯，應該信得過啩！

重點係：唔算貴喎！素泊每晚每位5775円。

旅館對面係一個公園，好有民居feel。

旅館大堂有各個旅遊點嘅資料，仲有呢張木製地圖。

旅館轉角有間蔬菜店，每日經過都會幫我打打氣！

點解蔬菜店都會幫人打氣呢？

睇吓！有無開心咗呀？

好啦！放低行李，出發去玩嘞！記住係出口20，

我見有旅遊書教出口21，

但係果邊係無電梯架，要搬行李就慘嘞！

我哋搭返地下鐵去京都車站，支出：210円。

今日有張one day pass，我哋會盡用架嘞！

 先搭JR去第一個站：「奈良」，要親親小花鹿先！

唔駛一個鐘嘅車程，正好俾大家補眠一下！

一覺瞓醒，到咗嘞！

等我同大家介紹，呢位朋友叫做「遷都君」

2010年誕生，係「平城遷都1300年祭」官方代言人嚟架。

到達奈良JR站，諗住先到遊客中心查詢一下先啦，

見到有兩個中年日本婦人在當值，喜出望外嘅係：

兩位日本婦人居然用英文同我哋溝通喎！

佢俾一份地圖我哋，仲幫我哋喺地圖畫好記號，

教我哋沿住三条通直行，就會搵到小鹿架嘞！

不過，30分鐘嘅路程，我哋起碼行咗成個鐘呀！

梗係啦！沿路有咁多手信舖，朋友們又點會錯過呢？

終於見到小鹿嘞！好靚仔喎！

我就硬係唔明，點解啲鹿見到遊客就係咁衝埋嚟索食，

但係就唔敢行埋賣鹿煎餅嘅嬸嬸果度嘅？

我就唔係幾敢餵嘞！影吓相，睇吓手信就算囉！

可能係大家都唔夠瞓啦，

朋友們對於東大寺同春日大社都無興趣喎！

而且大家剛才已經行咗好多路，

所以......最後決定搭番的士去JR站嘞！

盛惠1060円，四個人去旅行最fit，一架的士啱啱好！

下一站：宇治，見到呢個名，會諗起乜嘢呢？

我哋並唔熟日本歷史，都無諗住去源氏物語博物館，

我哋個目的地好近，只要沿呢條路行5分鐘就到囉！

睇吓我，一馬當先，好似有啲嘢吸引我過去喎！

就係呢度嘞：「中村藤吉本店」，好肚餓呀！

雖然已經係下午茶時間，但係......仲有好多人等梗位呀！

天氣又熱，好彩有把免費扇派啫！

等位期間，大家又去睇吓啲綠茶手信囉！

終於有得食嘞！好好味呀！四個餐，盛惠5150円，

好豪華呀！特登搭JR嚟淨係為咗食個綠茶tea，One day Pass萬歲！

抖抖先，下半天待續！