今日係第三日，都係我心目中嘅重點行程。
雖然今日開始用Kansai Thru Pass，
唔應該搭JR，但係，要搭特色小火車又唔同喎！
時間就係金錢吖嘛，所以我都係選擇咗搭JR，
京都站至馬堀站，每位320円，
希望準時去到車站，
而且上午少人啲希望可以買到小火車飛。
我知好多人都會由嵯峨野上車，
但係我唔想同人迫，所以揀咗反方向行，
先搭JR去馬堀站〈記住唔係龜岡站啊！〉，
然後漫步去嵯峨野線龜岡站，
咁買到即場車飛嘅可能性又高啲，
當然，最好可以買到半開放式設計嘅5號車啦！
一落JR唔駛諗啦！沿路都有路牌指示，
包唔會行錯路架！
步程十分鐘左右，一啲都唔攰，
梗係啦！見到咁靚嘅景同埋咁清新嘅空氣，
仲唔停晒步大大力索多幾啖咩？
遠睇近睇都咁靚，香港人真係多見城市少見樹木，
唔捨得走呀！
話咁快就行到嚟龜岡駅嘞！
沿住樓梯上去就全買飛嘅地方啦！
姑姐嗱嗱聲行快兩步上去買飛先！
上到嚟都好多人吓！而且有一個泰國旅行團添，
好彩買到！片道600円。
可惜買唔到5號車吖，無所謂啦！
我哋買到嵯峨野4號2號車，10:35由龜岡開出，
呢度全部人手劃位！好原始架！
買好飛先10:05，仲有25分鐘買吓嘢影吓相，
10:28小火車準時到達嘞！
全車指定席，上車快啲搵位坐定定先，
11分鐘後會經過第一個站：保津峽，
不過唔駛落車住，如果落錯車，就當廢票架啦！
沿途所睇到嘅就係河川景色。
全程23分鐘，就會到達嵐山駅，
出閘後跟住大隊就得嘞！
但係就算好似我哋咁，影完相D人已經散晒都唔駛驚，
因為總會有路牌指示嘅。
嘩！到咗竹林嘞！
好彩唔係好多人，我哋花咗好多時間喺度影相，
可惜限於器材好一般，而且成個竹林好暗，
見到咁靚嘅景都影唔到靚相添！
然後有路就行啦！會經過野宮神社，
雖然並無宗教信仰，
但係我哋一般都無入寺廟，只係路過就算！
雖然係炎炎夏日，但係一路行都唔覺辛苦，
行吓玩吓就到嘞！
都有人唔想行，坐人力車漫遊嵐山架！
去到路口，見到呢啲路牌都暈暈哋，
都係放棄把啦！唔睇路牌，見到路就行啦！
呢程買咗幾條巾，佢係一面紗巾一面毛巾，
啲花又靚，好好用，做手信都啱。
係時候醫肚嘞！
嚟到「稻」嵯峨豆腐料理，
見個Set好吸引喎！而且入面環境清幽，
所以我哋決定今日就喺度消費啦！
啲定食都唔算貴，叫咗4份總共6840円，
啲豆腐好滑好香，話晒係佢個主題嘛！
不過個甜品「自家制黑本蕨」呢，
我哋就真係唔識欣賞嘞！不過聽講佢係嵐山名物嚟架！
食完又再四圍行，行咗好多間好多間手信舖，
又經過大本山天龍寺。
然後去到嵐電嵐山駅，旁邊有足湯，我都好想試吓，
仲有得租單車添，租成日先至1000円咋，
真係心郁郁呀！可惜朋友們都唔吼吖！
呢架紫色嘅嵐電列車好靚呀。
呢架可以去到四条大宮，但係我哋無搭，因為想搭巴士吖嘛！
喺路上見到有個藝妓坐人力車，真係好傳統嘅畫面呀！
到咗巴士站，見到班次仲有十幾分鐘，
於是跑去對面想買豆腐雪糕，點知......雪糕全面無貨！
今日全日用Kansai Thru Pass，
除咗JR外，大部份車都可以搭，如果仲唔肯定，
上車前睇吓入口會有呢個小魔女圖示，就即係可以用啦！
玩咗半日，又食飽飯，就梗係......瞓晏覺時間啦！
上車就大昏迷一陣，搭車返旅館退房嘞！
沒有留言:
張貼留言