7月28日，關西遊第五天@池田→神戶，晴天

今日只有兩個景點，但係都要搭幾多車架，

首先一早搭御堂筋線去梅田，再轉阪急寶塚線去池田，

一出閘就有箭咀指示方向，但係只有方向，無地圖喎。

車站出口有張檯，類似遊客咨詢中心，有幾個叔叔坐喺道，

我哋過去問吓啦，叔叔極熱心，直情帶埋我哋過去。


真係好，去到邊都遇到好人。

只要方向正確，沿途都有指示，睇吓！仲有300米。

到嘞！呢道就係：即食麵博物館。

介紹過你識，呢位就係安藤百福先生，即食麵係佢發明架，

咁佢即係我恩人啦！因為姑姐係食即食都大架嘛！

首先，巡例都要睇睇展館介紹吓麵嘅歷史啦！

好多遊客嚟到都以親自製作杯麵為重點項目，

但係姑姐有時都係一個幾掃興嘅人嚟嘅，我覺得：

整好之後又要拎，拎番香港又要搵地方放，

擺明係收藏即係唔會開嚟食啦！而且姑姐最唔鐘意儲嘢，

所以，我都只係影影相就算嘞！

相反，如果有小朋友嚟我就會去鼓勵佢哋整嘅，要多嘗試嘛！

你睇呢個日本小朋友幾開心，孭到成身都係麵，

呢個都係值得我哋學習嘅地方，「自己的麵自己孭！」

如果喺香港，好多父母己經將所有嘢孭晒上身，

然後將小朋友放上BB車行都唔駛行啦！

雖然唔會參加，但係都要去八吓，

嘩！難怪要排90分鐘啦！咁多人！

正式整麵之前，先去睇睇片，注意：係親子喔！

睇吓呢位爸爸都一齊戴起頭巾，佢幾留心？抵讚呢！

所有廚具都已經預備好啦！

整好之後，如果唔想壓爛個杯麵，自助幫佢打打氣啦！

雖說係預約制，也可試試即場有無位嘅！

整好後梗係要喺呢個指定位置影張相啦！

如果肚餓的話，都可以即場買個杯麵喺道食嘅。

但係，都唔係容易架！又滿！

最後，出去睇吓杯麵嘅種類有幾多？

可以砌出一道牆呢！你食過幾多種呀？

玩咗一輪，大家正預備買啲同杯麵有關嘅手信，

點知，我哋呢程嘅Shopping Queen遇到重大嘅打擊：

「唔見咗張Kansai Thru Pass呀！」

唉！乜嘢心機都無晒啦！唔買嘞！起程去下一站嘞！

我哋要搭寶塚線轉阪急神戶本線到三宮駅。

為咗要趕住嚟呢道食午餐，神戶牛呢！一出車站就見嘞！

還好，前面唔夠10個人排隊，應該好快有得食！

網友大力推介，午餐比較便，一於試試啦！

由於有一位團友唔食牛嘅，所以我哋兵分兩路，

約好大概45分鐘後樓下等，落到嚟，已經排到轉埋彎lu！

食完又去坐車嘞！今次搭阪神本線到山陽須磨，

然後再轉山陽電鐵本線到山陽垂水駅。

車站出面就有無料巴士搭嘞。

係佢嘞！每個鐘頭有四班，不過淨係假日先有咋，

其他日子就要自己行過去嘞！聞說條路都好好行架喎！

咪講笑！大熱天時，我點都就到星期日至去啦！

目的地到著：唔知點解旅行唔少得嘅Outlet！

呢道室外都有俾小朋友玩嘅設施。

一入室內就見到KT推廣梗水機，我唔係Fans，

更加無本事買架水機返香港，

但係就對佢旁邊任拎嘅KT扇比較有興趣嘞！

其實今日主要目標係呢道：Agnes b吖嘛，

但係無乜平嘢喎！不過咁~~~都有收獲嘅。

買完心頭好，又落番梅田喎，點解呢？

見我哋左望望，右望望，因為要達成朋友嘅願望嘛！

好彩搵到！係一蘭拉麵呀！

上次喺心齋橋食唔到，今次一定要食到為止架嘞。

等咗唔駛五分鐘就有位嘞！自助買飛先啦！

有人叫佢自閉拉麵，有人叫佢做自修室拉麵，

因為每人有一格自我空間，當然都可以選擇拉開，

但係嘅然呢個係佢嘅特色，梗係要自閉一下啦！

大家埋頭苦幹做乜嘢？就係度身訂造一碗自己口味嘅麵囉！

呢道有圖有字，教晒你成個流程架嘞！

姑姐碗麵得咗嘞！似乎唔錯喎。

我唔客氣嘞！連唔鐘意食拉麵嘅姑姐都覺得佢好食喎！

食飽仲有時間，搭車返難波後，唔返酒店住，先去千日前，

係呢度嘞！我哋要搵嘅係佢：AKB48 Cafe & Shop

姑姐一把年紀，梗係唔會沉迷偶像啦！

係團友個仔鐘意AKB48裏面嘅「篠田麻里子」，

而麻里子又就嚟畢業嘞喎！所以咪幫佢掃吓貨囉！

老實講，我真係唔知「篠田麻里子」係邊個同埋係點樣，

所以要好似傻婆咁對吓啲相同埋日文字，頭都暈埋！

團友仲勁，攞住啲貨問果道掃梗貨嘅宅男，

終於就掃到咁多嘢嘞！母愛真係偉大呀！

返到去，張Kansai Thru Pass都係時候功成身退嘞！

姑姐對呢張Pass極力讚好呀！因為佢真係幫我哋慳咗唔少架！