7月27日，關西遊第四天@和歌山→大阪〈下〉，晴天

返到和歌山駅，就要諗吓今日餐晏仔嘞！

按照原定計劃，應該係要去黑潮市場嘅，

但係呢道嘅巴士差不多成個鐘頭一班，

錯過一班車就麻煩嘞！

可惜我哋又偏偏搵唔到個巴士站喎，

見有幾個中學生等梗車，就問吓佢哋啦！

點知佢哋完全乜都唔知，失望！

呢個時候，有個伯伯主動過嚟問我哋想去邊，

然後就再多兩個伯伯過嚟一齊研究吓，

真係好熱心呢！

喺大家一番努力後，終於搵到個車站嘞！

大約35分鐘就到站嘞！

落車見到一個超大但係曬到C嘅停車場，

差啲暈低呀！好彩見到麵包超人迎接我哋唧！

繞過Marina City，要行差不多10分鐘左右。

目標在望嘞！我哋嘅目標係：黑潮市場！

呢道好似一個室內有冷氣有幾乾淨嘅街市。

有得賣各種海鮮......

仲有熟食......

呢個咁有型嘅，係註場劏魚師傅嚟架！

一日有幾場，即場表演吞拿魚解體，好精彩架！

其實午餐時間一早已過，

所以，我哋求其搵咗一間放題填肚啦！

環境唔錯，食物......一定食得飽啦！

價錢，2000円一位，都唔算貴嘅！

食飽後，各自去行街，我對於果啲手信無乜興趣，

反而對呢個水果市場極有興趣，所以就入去逛逛嘞！

嘩！去旅行最鐘意買水果食架嘞！但係佢都唔係主角。

和歌山喎！梗係買水蜜桃啦！

老板不斷開啲桃俾人試食，真係好好好好味噃！

左揀右揀，老板見我哋咁有誠意，

就喺個盒道塞多個桃落去，

咁我哋忍唔住又買定今晚飯後果嘞！

回程嘞！會經過紀州黑潮溫泉喎，下次嚟住吓先！

呢程巴士直接返到和歌山市駅，搭車返大阪啦喂！

返到去，例牌行吓心齋橋啦！

然後返去「日本佳寶」掃吓特價魚生先。

馬不停蹄，兵分兩路，我負責去買鱆魚丸。

朋友負責排隊買芝士蛋糕，呢個確係好食喎！

其中一位團友唔想食生嘢，

所以我臨返去次前幫佢買個松屋牛肉飯，肯定啱食啦！

嘩！大家都辛苦嘞！飲杯！