7月27日，關西遊第四天@大阪→和歌山〈上〉，晴天

酒店一過對面馬路就係南海電鐵站，去機場好方便架！

返工時間，人來人往好忙碌喎，好彩呢度地方大，

咁就算我哋四條烏魚頭岳岳都唔會太阻住人啫。

我哋仲有幾日玩，未駛上去搭飛機住！

今日我哋嘅目標係：和歌山，

但係由於我哋係用Kansai Thru Pass，

唔可以搭JR，所以係搭南海電鐵去和歌山市駅。

差不多一個鐘頭車程，就去到和歌山市駅嘞！

一出嚟有個大巴士站，我哋要搭巴士去和歌山駅

〈唔同架，即係JR站呀〉，

巴士站都好清晰好易搵嘅。

我哋要搭『0』號車，可以用Pass架！

十零分鐘就到啦！

落車後，入去JR站，

正常一般都要show show張車飛先入得架啦！

但係如果你話俾票務處嘅工作人員聽，你要去探Tama，

佢就會俾你入閘架嘞！

入去之後，請你跟住呢D咁cute嘅腳印行啦！


我哋今日就係特登嚟搭「和歌山貴志川線」嘞！

上到月台，買張一日票先，

用硬幣刮咗今日個日期組合，

就可以全日搭嚟搭去順通無咗囉！

張飛價值650円，如果鐘意得意嘢的話，都算值回票價嘅！

首先，我哋上嘅係呢班玩具列車，架車係咪好靚仔呢？


裏面都好得意架，有床仔、給印、扭蛋......


全程29分鐘，我哋就到達貴志駅囉！


遠遠喺對面岸影返過嚟，呢個站似唔似一隻貓呢？


呢位懶洋洋嘅朋友，就係呢個站嘅站長：小玉嘞！


當然呢個只係焯頭啫，覺唔覺得cute版親切好多呢？

周邊商品先至係主菜，其實車站好細，

只有一間好細好細嘅coffee shop，

同一間好細好細嘅手信舖，但係見佢一直都好好生意喎！

可惜正值暑假已過咗士多啤利梨節，

如果唔係，我一定要去試吓呀！


行咗一陣，見到有車嚟嘞，決定上啦！

呢架係草梅列車，都靚喎！

當然入面都係充滿草梅圖案啦！

途中，見到對面有主角小玉嘅列車，

我哋梗係即刻衝過去轉車啦！

果然係唔同啲喎！好多貓貓呀！

好多款唔同嘅貓貓櫈喎！坐邊張好呢？

成個上午就係咁轉嚟轉去搭晒三架特色列車嘞！

上半場休息，下半場.......待續！