7月25日，關西遊第二天@清水寺，大晴天。

 7月25日，一覺瞓醒，出發嘞喂！

由於姑姐衰孤寒無book旅館早餐，

所以辛苦大家要出外覓食啦，

就算姑姐係一個唔駛食早餐嘅人，都要顧住啲團友架！

好啦！我哋就決定第一站就去京都台所：「錦市場商店街」啦！

因為佢就喺我哋間旅館附近，好方便啫！

簡單嚟講，呢度係一個有蓋嘅街市，貨品好新鮮好吸引，

我同班團友仔都行得好開心喎！行吓行吓就行咗個幾兩個鐘，

不過......我哋無食過嘢喎！

沿住錦市場一直行到尾，就會見到「錦天滿宮」。

嚟呢度嘅人，主要祈求學業進步同商業繁盛，

姑姐又無書讀、又無生意做，影張相留念就走人lu！

離開錦天滿宮之後，就開始使用尋日買好嘅巴士一日票嘞！

今日無論去邊，我都會盡量搭巴士架嘞！

一程200円，搭三程以上就抵番啦！

喺巴士站等咗一陣，好快就等到去清水寺嘅巴士嘞！

只要車尾上車，落車時喺車頭入咭過機就OK嘞！

搭到清水寺站落車，抬頭一睇就見到路牌，都好容易搵啫！

落車後沿住斜路登上清水坂，沿途都有小舖，

邊行邊上斜都唔會覺辛苦嘅，

行到見到可以抖吓涼嘅地方，我都好想坐一陣呀！

終於嚟到清水寺嘅正門：「仁王門」嘞！

當日都見到啲香港人租晒傳統和服，好有氣氛咁漫遊清水寺喎！

清水寺入場費每位300円，我哋其人有兩個團友無嚟過，

佢哋都話唔想入去喎，但係我就極力游說佢哋要入去，

一場嚟到，真係值得入去睇吓嘅！

第一站，就上去睇吓「戀愛占卜石」先啦！

聞說只要企喺其中一方嘅石前，合埋雙眼能走到另外一邊果舊石道，

就可以戀愛成功嘞！

當日有一班卜卜脆嘅女學生喺道玩得好開心，真係青春無敵呀！

以下呢個都幾得......人驚！

以英文解釋：請將你嘅煩惱事寫喺紙上面，

然後將紙浸入水中，只要紙溶喺水裏面，你嘅煩惱就會隨之消失架嘞！

但係......埋嚟睇清楚，點解張紙會整成人形嘅？

煩惱事一定係其他人咩？睇吓，啲人都係寫其他人嘅名落去架，

好......惡......毒......呀！咁似我哋嘅打小人嘅？

呢啲嘢，都當係見識吓啦！就係咁，我哋就喺道玩咗一輪嘞！

離開地主神社，沿路離開清水寺，會見到清水大舞台，

希望有一次能夠喺紅葉片片嘅時候嚟到啦！

再落去，大家去音羽の滝排隊，希望飲到自己心儀果兩條水源！

三筧清水中：有學問、戀愛同長壽，你想飲到邊一種呢？

離開時，行過呢處好似一條綠色隧道，真係舒服到吖！

好啦！睇完名勝就入正題嘞！

又到咗團友們最開心嘅購物時間嘞：又行吓二年坂......

又行吓三年坂，大家買到忘晒型，

沿途都係全靠試食維持姑姐嘅生命咋！

不過手信舖嘅又係好吸引嘅！好彩姑姐定力夠啫！

爭啲餓死嘅時候，仲要見到咁吸引嘅食物添！

喂喂......朋友仔，入面有咩咁好睇呀？

幾時變紅呀？好期待呢！

購物方面，姑姐只有一個目的啫，

行嚟行去終於搵到你啦：「よーじや」。

行咗大半日，走人囉，沿途見到可愛嘅和服妺妺仔。

又見到成熟嘅和服美女。

返去，搭206，攰攰哋，喺冷氣巴瞓醒一覺就到京都駅嘞！

去到京都駅再轉巴士返旅館。

〈雖然呢個方法有啲愚蠢，但係反正係一日票，

又唔熟路，呢個搭法就最安全啦！〉

返到嚟已經6點幾，但係......我哋仲未食過嘢呀！

今晚，要食好味啲嘅！估唔估到係乜呀？

開謎嘞！係「京極かねよ」鰻魚飯呀！

我哋都點咗鰻魚飯面舖上京風甜蛋卷嘅「金絲丼」，

食完後大家都讚不絕口，老字號都唔平架，每碗2100円。

舖面好古老，有啲唔起眼，但係真係值得一去。

跟住，我忽然醒起呢兩日都忙得很，

未買聽朝開始要用嘅Kansai Thru Pass，

所以，我哋又利用張一日卷搭番車出去京都車站，

嗱嗱聲搞掂咗，呢張Pass真係好抵用架，

令我哋慳番唔少銀兩呀！

買完又搭巴士返去嘞！

嗱！姑姐真係麻麻哋鐘意行街，

所以，得到團友嘅批准，佢哋三個去行街，

我就返去洗吓衫浸吓浴同敷吓藥咁啦，

真係好囉！大家咁獨立又明白事理嘅態度，我鐘意呀！

浸完浴瞓得份外好，聽日又有力量嘞！