7月24日，關西遊第一天@京都〈下〉，晴。

其實我哋真係幾好彩，

今日除咗上午落咗一場雨之外，其餘時間都好好天。

喺咁好嘅天氣之下食完個下午茶後，

我哋就向住下一站進發嘞！

上返JR，向京都方向搭去稻苛站。 

唔駛左搵右搵，一出閘就會見到我哋個目的地：

「伏見稻荷大社」，

先來參見狐狸大人先啦，佢係稻荷神嘅使者嚟架！

就嚟日落嘞！姑姐要行快幾步先！

近鏡望吓狐狸大人吖！都好威猛吓喎！

都係cute版好睇啲，啲繪馬咁吸引，邊處捨得掛上去呀？

呢啲迷你鳥居都好可愛啫！

姑姐最想睇嘅嘢，開始見到嘞......

呢道就係聞名嘅「千本鳥居」嘞！

鳥居由大至細排列，唔知係唔係真係有一千個呢？

每個鳥居都刻有人名或者公司名同日期架。

影落好睇，但係鏡頭背後係好殘酷架，

因為我哋不斷俾好多好多蚊攻擊我哋呀，

所以，影飽相後，即刻走人啦，

去到大門口，有一個好心人幫我哋影咗張合照，真好！

玩咗成日，個天都仲未黑，於是，就去京都車站行吓先。

先去Agnes b格格價，然後買埋聽日一日巴士劵，每張500円。

又行咗一大輪手信店呀、藥房呀咁，就決定要回程lu，

我哋諗，不如試吓行返去啦！都係兩個地鐵站之嘛！

行咗一陣，就已經唱起：「天色已漸沉、落日如霧燈」嘞！

但係呢一行，就行咗起碼40分鐘呀，

其實邊行邊傾邊睇邊影，本來都可以應付嘅，

但係對於幾個一夜無眠又玩咗成日嘅人嚟講，

真係體能極限嘅挑戰呀！

其實沿途行都唔見到有幾多食肆，所以，當我哋見到有間拉麵店，

又攰又餓嘅我哋，就梗係二話不說直衝入去啦！

呢個就係今晚嘅晚餐嘞！由於我係唔鐘意食拉麵嘅，

所以，有得食就算，無法評論佢好唔好食，

食飽嘞，盛惠2810円。

食完麵又有力量向前行嘞！

大家都好攰，所以決定要早啲返旅館休息啦！

呢度係旅館大堂，係用天然純木做主題，

再用竹嚟襯托出傳統嘅東洋味道。

呢兩晚住嘅平新旅館，我哋住3樓，雖然細細哋，都有Lift搭架。

房間都幾寬敞舒適，仲有獨立浴室添。

我好鐘意瞓塌塌米，返到嚟已經有專人舖好床嘞！正！

一入房就有點心歡迎你，今晚係京名物 井筒八ッ橋。

樓下有大浴場，嘩！姑姐最鐘意架！

不過因為只有室內，通風系統好差，

淨係企一陣都覺頭暈暈啦，所以最終姑姐都係無浸到lu。

另外一個主要目的，就係去大浴場旁邊嘅呢間房，

嘻嘻！好嘢！有得洗衫。

不過咁，可能無乜人用，所以都有啲塵，要自己抹吓至用得！

就係呢一點，我都有啲奇怪點解呢間旅館會被評價咁高呢？

好啦！今日攰死嘞！大家早啲瞓嘞！