7月26日，關西遊第三天@大阪〈下〉，又是晴天

退房前，又再去行多次錦市場，
團友們似乎真係好鐘情呢度喎！

然後又行咗一陣藥房，居然撞到朋友喎，
大家交流一下，發現原來都係大阪果邊嘅藥房買嘢平啲。
我哋帶住依依不捨嘅心情，
拖住大大小小行李離開京都，向大阪進發lu。
京都真係一個好值得慢慢游嘅地方，我會再嚟架！

我哋之後幾日會住難波，要喺梅田轉御堂筋線。

地鐵5號出口，有電梯，但係就要過馬路，
官方網站指示要出6號出口，但係要行樓梯架，
有行李就唔係幾方便啦！

對面就係南海電鐵，要去玩去買去食都好方便架！

Check in喺8樓，我哋就住6樓，
呢間酒店唔係好出名，但係我就好鐘意嘞！
淨係睇吓門口個花樽，係鮮花嚟架！
而且日日都換，房入面都係日日有換新鮮花啫！

都係和式客房，間房都幾大間架，讚！

安頓好之後，就出去搵食lu，
不過記住要先喺8樓交低鎖匙先，呢個安排有少少唔方便唧！

第一站，行去黑門市場，睇吓有咩平嘢買先！

入到去大部份舖頭都閂晒門，遠遠見到呢記燈光火著，
就快步過嚟八吓先，哈哈，夜晚有好多平嘢喎，
朋友封咗個綽號俾佢，叫佢「日本佳寶」喎！

有水果蔬菜啦......有海鮮啦......我哋都有消費架！

然後向住心齋橋方向行，一心諗住去食拉麵。

就係呢道嘞：自閉嘅朋友最啱食嘅一蘭拉麵！

點知......原來......呢道......已經停止營業嘞！激死！

唯有去食馳名嘅鱆魚丸啦！呢盆價值500円，
〈不過姑姐就唔係幾鐘意嘞！〉

最後，我哋決定要食串燒，咁至有日劇Feel架嘛！

嘩！幾豐富！呢餐豪一豪啦，盛惠9970円。

返去經過「激安之殿堂」，梗係要去入吓貨啦！

返到酒店，咁快又開定茶？未飽咩？

係食飯後果呀！喱~~~頭先喺千成屋買嘅特價水蜜桃呀！

四個和歌山水蜜桃，只係需要518円咋，抵呀！
好啦！今日都好頻撲吓，大家又係時間休息嘞！