北海道仲夏花之旅第三天

七月二十六日〈星期四〉第三日

今日要同Hotel Gracery暫別嘞，
不過，我哋七月三十日會返嚟架！




以我嘅經驗，搭地鐵的話就直接搭lift去L1地鐵站，
但係搭JR就行地面好啲，搭去G樓過對面馬路就係嘞，
尤其是要拉住行李的話，地面好易行又無樓梯。



話咁快就到咗小樽嘞，仲會喺度住兩晚添。



就係呢間Dormy Inn嘞！一出JR就見到，極方便，
我簡直高度推介呀！點好法？講少少先啦......



大堂都好骨子，坐喺度都唔係幾想走架。




大堂有免費咖啡機，沖杯咖啡睇吓報紙都不知幾舒適。




知道呢度有免費洗衣服務，其實未夠鐘check in，
只係一心潛入嚟睇吓洗衣機個位置，
點知，見到對面間餐廳寫住夜晚有免費拉麵食，
正！今晚浸完溫泉一定要嚟食番碗！



講住咁多先！時間差唔多啦！我哋要去對面搭JR嘞，
路經三角市場，入去行吓啦！



諗住睇定去邊間舖頭食海膽先......



夠鐘嘞！要起程啦！一個鐘頭一班車咋，
遲咗就麻煩嘞！Go Go Go！




350円，大約30分鐘，呢架列車就帶我哋去到余市嘞！



到嘞！好緊張啊！呢個係我好恨去嘅行程嚟架......


去到余市駅再轉1250円的士，就到達山本果園嘞！
呢度入場任摘任食水果收費1050円，自動有9折，
而家呢個季節係摘車厘子，正！
不限時，發達lu，實回本啦！
入到去個司機會俾聯絡電話個收銀員，
我哋走果時同收銀員示意，
佢就會幫我哋call番呢架的士架嘞！
簡直係五星級服務呀！



睇我幾勤力！雖然我肥C大隻，
但係都唔怕辛苦不停擒高擒低起勢摘架！
梗係啦！咁大個女都未見過咁多車厘子呀！




嘩！呢D就係貪心嘅香港人嘞！足足摘咗3盒呀！


食飽後再行入啲，見到一地都係未熟嘅蘋果。



果園好大好大，行都行唔晒，款式有好多，
有桃、蘋果、黃色車厘子、士多啤利、提子、
藍梅、栗子、梨、合桃......可惜其他水果唔係當造。


可能呢個季節遊人唔多，離場時，
工作人員再每人送一盒俾我哋，開心死啦！




報告：領隊一有得玩就失職，居然唔記得睇JR時間，
的士司機好好人，指指個鐘，示意我哋未必趕得到架嘞，
然後，佢喺車內攞咗份巴士時刻表俾我睇，
又再踩盡油啱啱好時間送我哋去JR站，
但係我怕我手忙腳亂買車飛誤時，
到時送車尾，咁又點對得住大家呢？
於是都係決定搭巴士啦，其實搭巴士仲貴啲，
不過就坐得好舒服喎，而且大家仲可以眠一眠添，
而且所需時間都係差不多啫，都算係一個好經驗嚟嘅。


番到去夠鐘check in攞房嘞，
比起前兩晚市區酒店，呢度好得多。




房間望出去就係JR站前個中央巴士站。



間格幾特別，後面仲有衣帽間同書檯。




另一邊就係小客廳。




放低行李就即刻出發嘞！



聽日開始潮祭，呢度有時間表，
我哋主要想睇巡遊同煙花。



到處都有佈置，大家都準備好聽日嘅活動嘞！



想趕住日落前去到運河，
因為想一次過影晒天光同天黑嘅運河吖嘛！
大家同一時間影，中間三張相係三部唔同嘅相機嘅作品，
點解中間果張影到個天藍色咁靚嘅？

玩咗成日，大家又攰又餓，於是近近哋去運河食堂，
唉！有時真係唔好貪方便！

聽日，一齊去參加潮祭吖！